《病港２》: ９５
106
陳一劍拍著掌：「好、好、好！」示意這場戰鬥該暫停了。
受陳一劍的聲感染，早就目瞪口呆的學徒們皆紛紛拍掌。
眼見氣氛漸轉平和，薛墊仁便停下手，將口中的匕首收回。
我亦收回三傘，回到一邊坐下。
「Ｍ……」瑞希寶睜大圓溜溜的眼睛，雙手掩住了嘴巴。
「唔？」
「我睇到連個腦都跟唔上……」瑞希寶按住頭頂，致使髮蔭蓋住眼睛：「眼花啦……」
「第十一組，可以返埋原位，薛老師都有勞你，工作人員可以先將傷咗嘅學生，送入去醫療室治理。」陳一劍行到訓練場正中央，站在薛墊仁一旁向大家說明考核真正的用意：「其實，剛才並唔係測試你哋嘅戰鬥能力，而係睇你哋嘅積極性同戰意，如果頭先連企上前對付敵人勇氣都無嘅人，你哋宜家可以離開，因為我哋唔需要觀眾，我哋只需要戰鬥人員。」
話畢，全場靜了一會。
「自己走！！我已經標記哂剛才連戰意都無嘅人嘅名！！！」陳一劍又作出咆哮式說話。
幾個學徒慢慢站起，低著頭行到門口離開。
走著走著，訓練場只餘三十餘人左右。
陳一劍眼神確認過每位學徒的名字和樣子，才回復寬容的表情：「呢到嘅人，恭喜你哋，你哋係真正第十一期嘅學生，包埋嗰堆啱啱送咗去醫療室嘅人，應該仲有三十幾人左右。」
「嚟緊會再出通知俾你哋，幾時有下次訓練同課堂上，解散。」陳一劍宣佈。
「喂，我哋下次見！」瑞希寶跟我和丹尼爾學長，說。
「下次見……」丹尼爾學長對我多了幾分觀望的態度。
學徒一下子往門口離開，直至場內只餘下兩位，第十一期學徒導師的大病獵。
薛墊仁再度掏出匕首：「要繼續分出個勝負？病獵大師。」他放在兩手之間戲耍，十足溜溜球一樣。
「勝負已分啦，薛老師，佢最後一把戳住你嘅遮，會射出鉤抓，只係佢無撳到個制。」陳一劍中肯道出。
「係？」本來自信滿滿的薛墊仁，一臉愣然：「我唔信……」
我把鉤傘給他，他一手將傘身倒握，眼睛盯住傘端的管口，為求確認真偽馬上按下了按鈕，管口隨即噴射出小鉤抓。
「呼──」他即時側頭避開。
管口射出的破風讓薛墊仁清醒過來，眼也眨不著：「係我輸咗。」
我循例說句評價：「你都唔差，招招殺著，特別係嗰招前後三連擊。」如果任意一招我都反應不及，很大機會就落敗。
薛墊仁，名副其實的大病獵。
「但係，點解你會混咗入第十一期嘅學生到？」薛墊仁轉換話題。
「喔，Ｍ佢原本只係想企喺到觀戰，但係有隊差個人，我就叫佢幫幫手，填夠人入去。」陳一劍代我解話。
「差一個人？每年都係……」薛墊仁說。
「應該係湯婆，佢又返咗嚟收徒弟。」薛墊仁搖搖頭。
「湯婆？」我即問。
「你應該未見過？協會另一個病獵大師，我哋每年招募一次病獵之後，佢都會返嚟病獵協會一次，揀一個最有潛質學徒出去修行。」
「真係個拐帶我哋年輕學徒嘅老太婆。」薛墊仁嘿嘿一笑。
「雖然佢已經六十幾歲，仲老過我，不過望落只係似四十歲，每次見到佢我都覺得好神奇。」陳一劍對湯婆的評價。
「佢會喺邊到修行？」我又問。
「無人知～」薛墊仁插著褲袋。
「嚟緊月尾，我哋學生會上山搞訓練營，Ｍ你有冇興趣參加？」
「上山？你哋唔怕遇到盜賊？」我反問。
「遇到盜賊，都係我哋試練元素之一。」陳一劍答。
「睇下到時得唔得閒。」
參加完一堂交流課，我又到化驗室看看藥師吉的進度。
多日無見，他總算能告訴我一點成果，但在回報之前，他拿出個空的玻璃瓶，更現場調配不同成份的藥水遞給我飲用。
「請你飲。」
「咩嚟？」我拿上玻璃瓶，嗅一嗅裡頭：「無味。」
「碳酸飲料啊，喺呢個時代好難再飲到。」他抱手、微笑。
「咕」我不虞有詐，將它喝下。
久違的甜甜味道，滋潤住我苦澀的舌尖。
一種豁然的幸福感，圍繞整張嘴巴。
「呼……係無氣嘅汽水，幾年無飲過。」我都快遺忘以前作為人，可樂是隨意在便利店就買得到。
「加多粒冰啦。」藥師吉從冰箱，拿了塊正正方方的冰給我。
簡單一顆透明的冰塊，加在微溫的可樂中，喝下去又變成另一種感受。
「我同我嘅同事研究過，你俾我哋枝藥劑嘅基因譜，某程度上，佢都算係一種病毒，而且侵蝕能力極強，可以將病者本身變異嘅細胞消滅，從而令到本體變返好似個正常人咁，但只係轉換另一種形式，變做成另一種怪物咁解，我諗……呢隻病毒係利用人工方法造出。」
「即係話，唔係由大自然生成？」
「唔係，但利用咗大自然一方嘅病毒去結合。」藥師吉指住東面，說：「港島嗰邊係咪有好大樹林嘅？嗰到嘅植物，其實係因為某種元素搞到過度生長，特別係樹鄉嗰株「香島樹」，可能兩者之間有關連，你有時間可以唔可以帶啲嘢嚟，俾我研究下。」
「例如？」
「等陣啊……」藥師吉從工具箱裡，東翻西找出幾樣小工具給我。
有小鋤子、大針筒、皮革小刀，總共三樣。
「去樹鄉附近，挖啲泥土俾我、割啲樹皮落嚟、仲有用針筒插一插香島樹，拎啲樹液返嚟。」藥師吉想要給我一個工具腰包。
「你個腰包就唔需要。」我只將工具拿走。
「你兩隻手拎住？」藥師吉怔然。
我輕輕掀開黑袍，將每件工具逐一收納到袍套內。
「哇……原來內有乾坤。」藥師吉差點想伸頭入黑袍裡看，還好我及時按住了他的頭。
「好快會帶嚟俾你。」
「我慢慢等啊～反正我好得閒。」
「啊…」臨走前，我還有件事想問：「藥師吉，你知唔知拍賣行幾時開？」
「拍賣行？夕鯨國有兩個，一個喺銅鑼灣，另一個喺中上環嗰頭，後者好似要受邀先有資格去，而且籽價唔係一般人買得起，都係啲上環人嘅交換種子嘅遊戲，唔到我哋平民玩，銅鑼灣嗰個反而可以參與下嘅。」
「知道喺邊頭？」
「世界貿易中心會。」
鏡頭一轉，我就來到藥師吉說的世貿易中心會。
半圓型的中心入口，算是個人來人往的交匯處，下方是拍賣行和股票中心，上方高聳擎天的則是寫字樓。
我從商場櫃檯的職員口中得知，拍賣會就位於商場最高層，有分大、中、小房進行拍賣，因物品價值而定，參與當日拍賣的話需事先申請，不設資產審查，只需交上報名費和穿著正式服裝便可。
想要攜同高價品進入寬恕營的話，應該只能在這裡找到了，一般外面的店舖攤位，應該都不會夠這裡高級。
「我想參加宜到拍賣會，幾時會有？」我問。
「呃！今晚會有一場嘅。」職員指住檯面貼住的時間表。
「八點半，就參加呢一場。」
「好，咁參加費用係二千五百籽嘅。」
當我正在袍內找籽，不知夠不夠付費的時候，一個高大的身影從我旁邊出現：「我幫佢俾埋。」
他一手交上連同自己合共的五千籽予職員點算，職員收到之後交由後方的籽算員處理。
我回頭望望這位好心人是誰，原來是舊相識：「方景亨？」
「好耐無見，估唔到喺到遇到你。」他微笑。
他是那個在鯨寨的版圖酒吧，第一次與我結隊去搜索物資的召集人，然後還一起去了跳蚤市場分籽才解散。
他沒改牛高馬大的紳士痞子形象，口中仍然時常含住根煙，讓煙絲透露著孤獨的滄桑感。
我對他最有印象的，還是那招裝作生無可戀，要吃最後一枝煙的演技，實際上煙草裡塞了孢花，讓嗅到煙味的人都給笑死了。
「最近過成點？」我循例問一句。
「幾好，差唔多洗哂啲錢買開心。」他背靠住櫃檯，呼出一口煙。
「咁快？洗咗去邊。」
「賭錢？女人？煙酒？呵，男人不外乎宜啲。」方景亨眼角瞧向我，問：「你呢？打算嚟買咩。」
「唔知，我都想睇下有咩買。」看看有哪些物品，可能合符雙子賊的口味。
「兩位，已經登記好，今晚請準時入場。」職員各給我們一塊數字牌。
我一人拿走一塊牌，繼續邊行邊談。
「你似第一次嚟，洗唔洗帶你行行先。」方景亨問。
「當然好，如果唔麻煩你。」
「拍賣會樓下唔洗講，全部都係玻璃廚櫃，用嚟展示俾你睇下一場拍賣會有咩嘢買咁。」方景亨舉起三隻手指，說明不同拍賣房間賣的東西是什麼。
小房，物品價值一萬籽至三十萬籽：
拍賣品大部份為，不是必需的日常用品。
中房，物品價值四十萬籽至六十萬籽：
拍賣品大部份為，一般人不會需要用到物品。
大房，物品價值七十萬籽至九十萬籽：
拍賣品大部份為，藝術奢侈品。
拍賣會場亦因應不同房間，有不同的裝潢。
例如小房，像間擠迫的酒樓，椅子密密麻麻排放在一行行，而大房就相對寬敞，裝潢都相對豪華，有真的在拍賣的感覺。
「大概就係咁，無咩特別，今晚見。」一一介紹完之後，方景亨就向我道別，然後繼續獨自在拍賣行遊逛。
為了今晚有錢預備不時之需，我回去找了最近生意盛隆的王達尼，只要一需要用到錢，就必然回去找他出面。
因為，說實話，在這裡生活一段時間的我，都還分到哪些種子的價值是多少。
不過我每一次回去，公寓都好像起了變化似的。
上次休息空間被大量麵粉佔據，今次則變成個採礦場般，王達尼將一整層的單位都買下來，放置他購入的不同的礦石，不知用意為何。
梁氏兄弟仍然擔當住他旗下的員工，兩個人站在一部齒輪機器前，雙手握住柄杆，重複做著出攪拌的動作。
「又有咩搞作。」我一入門口便問。
「小老闆你好！我哋磨緊石頭！」他們一起答。
「小老闆……？」他們為什麼這樣稱呼我，前面加了「小」字。
「咦，你唔係仲日日喺馬場咩？」王達尼驀地出現。
「你啲麵粉點解變哂……」
「礦石？哈，生意緊係越滾越大。」王達尼隨手撿起一塊銅石，說：「你聞下，聞唔聞到咩名。」
難道他賣的，是能放入口有味道的石頭？
於是我摘下面具，輕輕一嗅：「……」
沒任何味道。
然後，我又張口一咬。
「咔」他媽的，硬到不行。
這東西根本不能放入肚。
「喂，Ｍ你傻咗啊！」王達尼卻馬上收起銅石，視如財寶的握在胸前：「你做咩食石頭啊！」
「你又問我有冇味，我以為搵到啲食得嘅礦石咁奇妙。」我說。
「我只係想叫你抽象咁諗下，聞唔聞到錢嘅味道渣！」王達尼把銅石掉回到堆積如山的同類上。
「錢？點解會有錢嘅味道。」
「近排，聽聞三個疫區都差唔多搶返？」王達尼說。
「灣仔俾病獵協會搶返、天后我同富馬史一齊拎返，北角我無聽講過……」我將鳥嘴面具重新戴上。
「北角我都係最近聽返嚟。」
「係？」
「我有時會去酒吧，打聽下近排有咩市場供應短缺，當日我去咗間唔係同志酒吧嘅酒吧，聽到有個人講北角疫區入面嘅病者已經死哂，糧食好返會供應正常返，好快有返炸薯片食。」王達尼一句入面有幾句重點。
「人講你就信？」我說。
「我當時都係咁講！之後，佢拎咗張病獵執照我睇，原來佢係病獵嚟！咁佢知道呢啲行內消息唔出奇。」
「之後？」
「之後我就去炮崗嶺對北角嗰個邊境睇下，又行樓梯去附近嘅高樓望下，果然見到北角成條街好似俾人打掃過咁……見唔到任何病者……」
「居然？」我記得上次去，一街都是病者。
「所以我知道又係一個機會，嗰天就係要俾機會我賺錢。」王達尼又自作小聰明，對我作出提問：「我問你，一個新嘅居住區重新開放，最緊要係咩？」
「係你？」我答。
「咳，呢個答案啱一半啦，真正答案係呢啲礦物。」說罷，王達尼一如上次躺到麵粉堆一樣，躺睡到礦石片塊上。
可是，他背脊承受的不再是輕輕的麵粉，而是三尖八角的石頭。
「嗚呀！！！」理所當然地，他痛得馬上彈起身了。
王達尼痛到一半，就被自己激烈的反應弄得笑過不停：「哈哈、哈哈哈……」
「睇嚟，我哋搵日要見下心理醫生。」我拍拍他膊頭。
「咦，我真係約咗一陣睇心理醫生喎。」王達尼收起笑容，抓抓頭：「可能我一諗到要喺到做有錢人，就太過興奮，得意忘形，你知唔知有得由窮小子奮鬥到大富翁，係件幾好玩嘅事。」
「不如繼續講埋點解礦物重要，因為要重新起過啲嘢？」我說回正題。
「一嚟喇，做糧食嘅工具一受污染就唔用得，一定會換，二嚟有好多地方，都俾病者破壞咗，仲有城牆、工具呢類嘢，一旦政府要換哂，一定要向供應商買，到時我就會係其中一個貨源……」
「得。」我拍他的膊，不用他說下去：「我只要知道自己投入嘅錢，無白白掉倒入海就可以。」
「另外，今晚我想你幫幫手，同我去拍賣行一趟。」
「咦──」王達尼對我去拍賣行一事，感到訝然：「你都學識咗享受生活？買下嘢咪幾好！得閒放鬆下自己！定係諗住買嘢送俾人？」
我走到窗邊：「某程度上，係買俾一個人。」默默凝視著遠處的太平山。
「咩人啊？」
「好似叫大河孝？仲有另一個叫馬谷川。」真正的雙子盜賊。
「嗰個叫大河孝嘅女仔都幾幸運喎，仲有阿馬谷川小姐，要你親自去拍賣行揀禮物。」
「……」我有時真的分不出，王達尼到底是真心還是扮傻。
「得喇！今晚陪你去。」王達尼拍拍心口，望下手錶：「仲有時間，一齊去個見醫生先。」
「見醫生？」
「啱先咪話我約咗去見心理醫生囉。」
「吓？原來你認真。」
107
如是者，雙手插著棕啡大衣的王達尼，帶著我去一起見那位心理醫生。
我向來覺得，心理醫生十分騙錢。
心藥還需心藥醫，哪僅是一、兩小時開解能夠處理到？
「你好少會哂呢啲無謂錢。」沿路上，我說起。
「唔係啊！呢個心理醫生真係好把炮，好多名流都會預約，我都係賣麵粉嗰陣，識咗個有錢佬，大家講起錢財吹到兩句水，然後佢介紹我去，仲俾咗幾張免費體驗卷我，真心覺得有用。」王達尼舉起姆指。
「咁厲害？喺邊。」
「養和醫院啊，你最意嘅馬場隔離啊。」
養和醫院外觀差別不大，我印象中是間擁有最優良的醫療服務的機構，現在單看出入醫院的居民衣著打扮，都可以看出是達官貴人出入的醫療重地。
雖然接近邊境，但有鋼牆保護妥當。
換轉是以前，醫院總是個繁忙的地方，如今相對優閒得多，醫院內的工作人員都帶住微笑上班。
大堂入口有一個攤位，特別吸引我注意。
第一個是專門供人賣血的攤位，醫護會即場進行抽血，每五百毫升血，價值二千籽。
那攤位滿是居民正在排隊，他們摺高了手臂衣袖，一個二個等待著賣血。
「合法？」我不禁自問。
「呢家唔係舊社會啦，開放啲喇，Ｍ。」王達尼說。
「兩位，入去之前消消毒先。」一位護士往我們全身噴上消毒藥水。
醫療器材中，基本的心跳儀和呼吸機還是隨處可見。
王達尼把我帶到心理醫生所在的樓層，他看起來很熟路，那裡和兒科屬於同一層，可以見到一些兒童病患在遊戲場裡嬉戲。
我們坐在會面室門外的椅子，等到時間一到四點，王達尼就帶住我行入。
「醫生好耐無見！」王達尼把入面當做家一樣，先是放長雙腳躺到沙發上，然後手摘一顆果盤上的紫葡萄：「開始得治療未？」
「咦，呢位係你朋友？」心理醫生是男的，相貌平平。
「你好。」我坐在沙發一邊。
「你好，我姓麥，名叫巴巴。」麥巴巴醫生就是傳統專業人士的樣子，勝在夠老實。
「係～佢平時都好大壓力我諗。」王達尼又拿走果盤上一條香蕉，即場扒皮吃掉。
「我只係跟佢嚟睇睇，無咩特別，我身心都應該健康。」我利申一下。
「真係？你試下畫顆樹上去。」麥巴巴醫生給我一枝筆和一張紙。
「又係呢啲心理學小把戲？」我內心暗道。
「試下啦。」王達尼拍拍我肩，再走到會面室一道小房大門前：「麥巴巴醫生，請問我可以入去夢境房未？」
「未，要稍為催眠一下你先，你宜家太精神。」麥巴巴醫生手握住吊墜，在王達尼面對輕輕搖動：「你宜家好攰、好想訓、好想返到大本營、好想好想……」
「得啦得啦，我宜家好攰，爽手唔該。」王達尼說。
「呵，你思鄉症真係幾嚴重下」麥巴巴醫生從取一張卡片，拍卡開啟那間所謂的夢境房大門：「入去坐低，戴好耳機。」
夢境房不大，有一百八十度觀景的淡色玻璃，入面有完美符合人體工學椅子，一部連住耳機的方型機器。
「關於今次收費……」麥巴巴醫生在開機之前，先談錢銀之類的。
已經坐好、戴好耳機的王達尼，從大衣裡兩指夾出一張免費體驗卷給她，麥巴巴醫生收下後便啟動了機器，然後輕力關閉房門。
到麥巴巴醫生行出來，我經已畫好他想要的樹。
就是胡亂在紙張上畫幾筆線條，看他能解讀出什麼。
「唔……」麥巴巴醫生拿起畫紙，仔細凝視：「睇嚟，你根本唔在乎結果。」
「嗯？」
「係你心入面，應該一早就已經有答案？無論係我有冇開解嘅能力，定係你面對嘅一切困難，你都有固定咗嘅答案。」
「繼續。」我倒想聽聽，他還能說什麼。
「你有少少離經叛道，但又唔係大奸大惡，因為你無亂畫到張紙七彩、無視我或者撕爛張紙，但你又想測試我，就草草畫咗幾筆，唔係樹嘅直線。」他托入一點自己的金絲眼鏡，問：「啱唔啱？」
「然後？」我繼續問。
「然後你落筆嘅線條，冇柔性、夠直，間唔中有角，證明你係一個可以落下狠手嘅人，背負重擔同責任嘅人，但筆跡唔深，筆尖冇受損，證明你內在都係個溫柔嘅人……呢種人經常會陷入內心矛盾，覺得自己背負住世界嘅重量，同無上限嘅責任，令到自己過得鬱鬱不歡。」
「總結？」
「總結嚟講，你患上咗Adolescent Delusions……」麥巴巴醫生身子傾前，表情凝重：「又稱，中二病患者。」
「……」我整個背脊都貼到落沙發上。
「大概係咁多。」麥巴巴醫生微微一笑。
「我隨便畫幾筆你都可以解讀到咁……」我的震驚在於，他能說出這麼多解釋。
「咁就喺王生出嚟前，再同你免費做多項心理測試？」他問。
為了證明自己不是中二病，我要做嗎？
做吧，這次我不會給他解讀到任何事情。
「A for 咩？你講出心目中嘅答案就可以。」麥巴巴醫生說。
「Apple。」我答。
「B for？」
「Boy。」
「C for？」
「Cat。」
「M for？」
「Mons……」我緊握拳頭，暗暗咬住舌頭：「……！！」
差…
差點讀出來了。
「嗄嗄……」我低頭喘氣。
「你好似讀唔到咁？讀出你原本想讀出嘅答案吧。」麥巴巴醫生溫和地微笑。
「M for Mos Burger！」我讀出。
「……」
「呼～輕鬆哂。」剛好，王達尼摘下耳機從夢境房出來。
「麥巴巴醫生？」王達尼叫一叫他，又叫一叫我：「Ｍ？」
我兩個陷入微妙的對視之中。
「喂，你要唔要體驗下夢境房？」王達尼給我體驗卷。
「唔洗，我隨時可以離開。」我答。
「咁差唔多係時候去拍賣行囉，唔該哂醫生。」王達尼雙手托著後腦，吹住口哨行出，應該不會想像到，我剛才跟麥巴巴醫生進行了一場絕妙的心理攻防戰。
到巴爾市拍賣行前，王達尼又帶我到名為「果豐銀行」的地方，入面格局完完全全是間銀行的模樣。
「唔係去拍賣行？」
「嗰到啲嘢郁啲都幾十萬籽，緊唔會拎成堆籽去，申請張水果卡喇。」王達尼又說出一些，我不知道的事。
「水果卡？」
「有戶籍喺身呢，就申請到水果卡嫁喇。」
「呢啲我唔識搞，交俾你處理。」我停在銀行門口。
「咁嘅你！」
「你係我財務大臣，呢啲嘢當然你處理。」
「咁你喺到等一等我啦，等陣，借埋你張病獵執照嚟。」
「嗱。」
王達尼入去大概處理了數十分鐘，就領住一張印住哈蜜瓜圖案的卡片行出銀行，它設計雷同信用卡，有安全碼、日期、卡號等等，使我不得不讚嘆夕鯨國的科技水平。
「連康城倖存區都未做到……」我從王達尼手上，接過水果卡和病獵執照。
「如果呢班港島友仔唔係一開波就住沿岸城市，又佔據咁多重要設施，邊有呢啲發展～我哋大本營就真係一開局，由零起家啦，所以大本營人先值得我哋驕傲！」
「大本營人＋１。」我舉手。
「不過提提你啊，你呢張哈密瓜級別水果卡，限額係一百萬籽以下，唔好亂刷嘢，到找數佢哋會上嚟我哋屋企收籽，找唔到會有利息，好恐怖。」
「一百萬籽？咁睇得起我哋……」我說。
「你張病獵執照價值係一百萬籽以上啊嘛，唔好唔見啊！一陣嚟收你張執照去賣唔關我事。」
幾經周折，終於來到拍賣行門口。
隨住時間漸夜，天色步入餘昏。
港島區的大樓開始亮起萬家燈火，香港東方明珠的夜景美色，又再一晚展現在世人面前。
走入拍賣所，入面比起朝早多了一些人。
為接待前來的客人，侍應都會在拍賣行走廊遊走，捧住四瓶飲料問人是否要飲用。
「何蘭水，要唔要一枝？」剛行入走廊，侍應就禮貌地問。
「好啊。」剛剛即場付入場費的王達尼，選了瓶橙汁味。
「我唔洗。」我今早才喝完一瓶藥師吉炮製的新鮮汽水。
「我代佢要埋。」王達尼轉身再拿一瓶何蘭水走。
「你知拍賣行規矩？」
「知～你到時控制我叫唔叫價。」
「話說麥巴巴間夢境房有咩咁舒服，要令你特登過去？」
「我都唔知點講，聽住啲休閒嘅歌聲，放鬆哂全身，慢慢你就會幻想到，自己好似去咗沙灘，拎住塊紗布喺邊海奔跑咁，總之成個都放鬆哂。」王達尼難以用言語描述。
一轉眼，我們就來到大、中、小房前。
「入邊間？」王達尼插著腰。
「逐間逐間入去睇下？」我說。
「你好啊先生，只可以揀一間房入。」一位聽見我們說話的職員，說。
「咁……中房吧。」大房的東西太貴，我買不起。
啊，之前捐了那八千萬籽，突然覺得自己好像傻子。
108
決定去中房的我，與王達尼攜步進入。
入面環境不差，樓底很高，標準的大型活動舞台。一位五官端正的拍賣官，站在講台前，手握一個小木鎚，審視每位進來的客人。
我和王達尼隨便找個遠遠的位子坐下，就開始耐心的等待。
八時半左右，拍賣行中房差不多坐滿客人，經王達尼獨特的財術目光打量，他分析出中房的大部份客人，都是來自夕鯨國的中產階層，多半是管理層級的人物。
「咳咳。」拍賣官清一清喉，用眼神示意保安可以把中房的門關上：「歡迎各位先生、女士，嚟到巴爾市拍賣行，我代表喬津美先生感謝各位參與，本次為拍賣行第六百一十二次舉辦嘅拍賣活動，本次拍賣品合共四十四件，手續費為２０％，感謝。」
話畢，後台職員逐漸運送第一件拍賣品上台，展示給眾人觀看。
後台職員將一塊深藍的布掀開，入面放住個花紋特別的口罩。
「由工藝家正花先生，特別手工製造嘅「花紋浮世染口罩」，起價為三十二萬籽，請各位投標。」拍賣官舉出一隻手。
在場有四份之一人，都毫不猶豫舉起手。
「通常一開始舉嗰啲唔洗理～」王達尼說。
「三十四萬，叫價三十四萬仲有冇人？」拍賣官繼續問。
緊接，又有人舉手，拍賣官又將叫價提高，每兩萬、兩萬的遞增，直至叫價到達四十九萬籽，才沒人舉手。
「三、二、一！好，成交，叫價四十九萬籽，由一零三二號獲得。」拍賣官用手上的小木鎚，敲一敲成交檯。
「咚」一宗交易完成。
「第二件拍賣品，為暢銷作家「貓吉」絕版之作，《微笑的病者，不笑的人類》，起價為四十二萬籽，有興趣嘅歡迎投標。」
如同上一輪，那些所謂的客人，只懂得不斷舉手，連真的思考、猶豫的過程都沒有，是來趁熱鬧的？還是富有的人都不視錢財是一回事。
王達尼少有地一言不發，在觀察了接下來連續五場的拍賣後，他才緩緩道出：「Ｍ，睇嚟一陣我哋要投標嘅話，會有困難。」
「你嘅意思係？」
「有好多暗托。」
「暗托……」我逕自思考了幾秒，才望向他：「你係指，有人特登舉手托價？」
「係，如果拍賣行想賺多啲手續費，又或者係佣金，最好嘅方法就係搵自己人托價，托到去佢哋心目中嘅價錢，先賣出去，反正佢哋今次賣唔出，下次再賣就得。」帶王達尼過來，果然還是有用處。
「咁即係話無論我哋點樣投標，都一定係要買佢心目中嘅底價。」
難怪這間拍賣行不設資產審查，我想任何生意，都真的有黑幕存在。
「不過唔洗驚，有方法破解。」王達尼道取出根煙咬住，嘴角呈現微笑道出一句。
「唔好意思，宜到唔俾食煙。」一位職員前來制止王達尼。
「咳，懶型失敗。」王達尼將煙收回，轉為定目在幾名客人身上：「剛才……我已經留意到有幾個人，喺低價嘅開頭同高價嘅結尾，投標率係特別高，只要我再睇多七場左右？可以大概分析出，佢哋平均舉價到幾多會停。」
「咁估到之後你就……」
「我會不斷、不斷咁，喺佢以為我會繼續投標落去嗰一刻收手，等佢哋持續咁俾返自己人收購啲拍賣品，可能七、八件你會話唔緊要，但如果持續十幾件拍賣品都係回收下場，我諗佢哋就唔會繼續咁干擾拍賣。」
「你覺得有用？咁我信你。」在面具下，我對他一向是擺出信任的笑容。
「拍賣……本身就係一場心理戰啊。」王達尼舉起手投標。
「八百二十四號，出價五十萬籽！」拍賣官亦激烈地，進行自己的拍賣審判：「二百三十一號，叫價五十五萬籽！！一百零六號，叫價六十萬籽……！」
「二百三十一號，六十五萬籽！三、二、一，成交！」
接下來的幾輪拍賣，就算是無關痛癢的拍賣品，王達尼都會參上一腳，但又會在叫價去到某高位時，及時停下手讓對方投得。
不經覺間，他特別留意的幾名拍賣行暗托，都連續幾次「投標成功」，使得他們也不得不留意到王達尼這號人物的存在，其中一個暗托更因為多番被王達尼這樣子捉弄，而在投標成功後氣得摔下了牌號。
「呵，咁快就沉唔住氣。」王達尼笑道。
「佢哋互相對望咗幾眼……」我沒有打小盹，持續留意住情況：「準備改變策略？」
「似係。」王達尼點點頭，問：「Ｍ，你有冇咩係想買？你好似話要送嘢俾兩個人。」
「嗰兩個人，係強盜，你覺得送咩最啱？」我徵詢他意見。
「女人同酒？不外乎宜兩樣，唔通會書同筆咩。」王達尼指一指拍賣流程表，第三十九件拍賣品：「第三十九件，茅台酒，無人可以頂得順佢香醇濃郁嘅酒香。」
「就揀佢。」我同意。
「第三十六件拍賣品，中環區當紅明星，蔡先生用過嘅髮梳，叫價六十二萬籽起。」拍賣官再介紹另一件拍賣品。
可是，這次王達尼不再舉牌投標了。
「唔再同佢哋玩？」我問。
「佢哋轉咗策略，我未睇得穿。」王達尼又再默默揚嘴，說：「加上拍賣就快結束，前面我哋令佢哋今日損失唔少收入，所以佢哋都唔會再亂舉，更加會一直留意住我哋……宜家我哋，就按兵不動。」
「嗯。」
一如王達尼所言，暗托們之後除了偶爾舉一、兩下手之外，都沒再胡亂干擾別人最後的投標叫價，直到茅台酒出場，王達尼才再次舉起手叫價。
「佢哋應該會繼續干預我哋？」很可能，我們已成為這間拍賣行的眼中釘。
「絕對會，但睇佢玩唔玩得起。」王達尼又舉起手叫價。
「留名，睇你操作。」
「貴州陳年茅台酒，茅台酒叫價去到三十七萬！五百七十號，叫價三十九萬！」拍賣官的喉嚨都應該喊乾了：「好！仲有冇人？……真係無！？三、二、一！」
在最後一秒，王達尼又悠悠地舉起手了。
「好！四十一萬！仲有冇！無嘅，三、二、一，成交！！！」拍賣官用力敲檯。
「咚！」
貴州陳年茅台酒，由我們以四十一萬投得。
而剛才跟王達尼爭投的暗托，相信都差一點心臟病發，因為在拍賣官倒數到最後一秒前，他應該又以為自己被耍了，但王達尼突如其來舉手，讓他腦裡充滿住不確定性，在能夠思考出正確的判斷前，三秒的叫價時效都已成過去。
遺留在他身上的，就只有這一次拍賣的陰影。
拍賣活動結束後，我和王達尼到認領室，準備進行轉帳和接收拍賣品等等的程序。就在我簽名確認收下時，一名西服革履、儀表堂堂的人，從後台行出，其步伐卻透露出他趾高氣揚的性格。
「啊，喬津美先生。」那些職員一見前來之人，便恭敬地躬身。
喬津美？他的名字好像從拍賣官開場白提及過。
「你好，兩位聰明嘅客人。」喬津美將手放在下巴，有心無意的展示出正戴著的紅寶石戒指：「恭喜你哋，投到宜瓶原本價值五十萬籽嘅茅台酒，而且非常保值，每一年平均都會升價兩至三萬籽。」
「咁要多謝你啲「職員」，咁落力參與宜場拍賣活動，先可以令我哋順利投到嘅。」王達尼刻意加強了句子某些字的讀音。
「請問兩位尊姓大名？」喬津美問。
「Ｍ。」
「王達尼。」
喬津美合上雙掌，說：「我想講Ｍ先生，你非常幸運，有王生咁嘅朋友，其次就係……」
「喂，我哋趕時間，有咩遲啲再講？」王達尼望望手錶，有些少焦急。
「喔，咁我就有話直說。」喬津美將一張卡片，交給了王達尼：「希望你可以嚟我哋拍賣行，成為拍賣師。」
我們怔了一會，才回神過來，看來剛才王達尼的表現，被喬津美一一看在眼內。
「哈，加咗個「師」字，好專業咁。」王達尼接過卡片。
「我哋任何時候，都需要到人才，我可為你提供上百萬籽年薪、中環區住宿、肉品伙食。」喬津美繼續釋出善意。
「可惜啊。」王達尼將卡片捏成皺巴巴的，然後搭住我的肩膀，直截了當地說：「宜條友就係我老闆。」
「所以你嘅答覆係……」喬津美可能這輩沒給過人拒絕，而不知道剛才的答覆就是拒絕。
「我嘅答覆係，宜家好肚餓，同埋好想食枝煙。」王達尼拿出一根煙，再次含到在嘴中。
在收下茅台酒之後，我率先領他離開拍賣行，從喬津美身邊掠過。
「走，我哋去食嘢。」
我說。
一轉眼，我們便在維多利亞夜市集坐下，一邊吃著檯前買來的食物，一邊談論剛剛發生的事情。
「哈哈哈哈哈，啱啱條友俾我拒絕個樣，幾鬼好笑真係……」王達尼邊摘小龍蝦邊說。
「你確實係有一手，敬你。」我買來瓶土製泡酒，來跟他對飲。
「小意思～」他吐出殼碎，一口將蝦肉咬出。