《病港２》: ９３
101
「好吧。」沈子帝像坐了下來，悠悠說起往事：「呢一切，都由一件單純嘅事開始。」
「願聞其詳。」我坐下來，聽他細說。
「我同阿哥，原本係住喺灣仔區嗰邊嘅人，我哋負責喺近樂滿嘅農場大廈養雞，照顧天環人嘅專屬食糧。」
「天環人，上環同中環嘅居民？」我不是第一次聽到這叫法。
「嗯，樂滿大廈嗰頭專門飼養雞隻，我負責將多餘嘅雞隻拔毛、放血、斬件，我阿哥負責照顧佢哋生出嚟嘅雞蛋，喺倖存區一隻雞蛋，價值一萬籽。」沈子帝停頓一會，續說：「雞蛋呢種奢侈食品，我哋本來就只能夠遠觀，唔能夠食用。」
「但咁你樣講得，最後應該係打破咗呢條規矩吧？」我說。
「嗯，因為我就快生日，我阿哥就問可以隨便食幾多隻雞蛋都得嘅天環人主管，乞求一隻雞蛋，結果當然俾佢侮辱一番，話佢唔配食，於是阿哥就特登偷咗隻雞蛋俾我，而呢隻雞蛋亦令我哋陷入萬劫不復之地，佢第二日俾農場守衛發現咗，當時幫雞拔緊毛嘅我，就隔住間房聽住佢俾人毒打嘅聲音，因為盜竊奢侈品係重罪，佢俾人打死都唔會有問題……」
說畢，沈子帝反問我：「如果面對呢種情況，你會點做？」
「如果係親人，我會救佢。」這令我回想起，以前去康城救回少佐的經歷。
「我做咗同你相同嘅事情，拎住把原本係幫雞隻放血嘅刀，殺咗兩個守衛。」沈子帝回答。
「唔……」我繼續聆聽。
「我哋見人都殺埋，最後下場都會係死，就索性殺哂成個農場大廈單位嘅雞，食咗一大餐我成世人覺得最好味嘅燒雞，但食飽冷靜先剩低嘅只有後悔，咁啱個天環人主管嚟睇場，佢嬲到幾乎想殺咗我哋……」
「於是，你哋殺埋佢。」我替他說下去。
「你都知。」
「因為殺人係個循環。」我說。
「殺咗身為天環人嘅主管，就真正係大件事，我哋唔可能再喺區入面生存，所以逃出咗倖存區，轉折咁去咗山上搵食，我阿哥盡量俾哂所有搵到嘅嘢我食，但始終都係好餓，被迫一定要入返倖存區覓食，喺個世界唔依賴倖存區宜個群體社會制度，根本就唔會生存得到。」
「嗯，的確係咁。」就算是最強的獨行俠，都不能三百六十五日在外面遊走。
「於是我阿哥又入返去搵食物俾我，結果佢成幾日無返嚟，我就知佢今次俾人捉到正，我企喺鯨寨倖存區嘅大門前面，只係感覺到無助同孤單，我想衝入去救返佢出嚟，但我明顯就無宜份力量……」沈子帝咳一咳，繼續說故事：「就喺呢個時候，一群人影同火光，出現喺我身後，我慢慢轉頭望過去，真正嘅「雙子盜賊」出現……」
「佢叫咩名……」
「佢兩個係分別叫做「馬谷川」同「大河孝」嘅男人。佢哋兩個邀請我，一齊入去破壞呢個腐敗嘅倖存區，於是我就跟住宜一班惡人，衝咗入去，最後佢哋解放鯨寨嘅監獄時，我見到被虐待到傷痕累累嘅阿哥，我揹住佢一齊出去。」
「你哋就係咁，加入咗「雙子盜賊」旗下？」
「可以咁講，因為除咗投靠呢班人，我哋都無處可去。」
「咁點解後嚟，「雙子盜賊」呢個名會落咗去你哋到？」
「因為太多人虎視佢哋，我哋就代替佢哋出面處理任何事情，久而久之外界嘅人就認為我同阿哥，係雙子盜賊。」
「正版喺木城門後面？」
「入面叫「寬恕營」，我哋所在嘅外面叫「復仇營」。」
「兩者有分別？」兩個地方的名字意思，顯然大為不同。
「我唔可以再透露落去，只希望你聽完我嘅故事之後，願意將藥劑交還俾我。」沈子帝似乎知來硬的不行，態度一改放軟。
「你仲未講到重點。」
「……你點稱呼？病獵。」
「Ｍ。」
「Ｍ，跑馬地蓄洪池下面嘅事，只係一宗悲劇，你無需要太過記住。」
「悲劇？嗰到至少都上百條人命……」
沈子帝沉默半載，默默道出：「約莫一年半前，我阿哥喺外面執到個嬰兒返嚟復仇營，本來見佢無父無母，就諗住養大佢，畢竟喺呢個世間，大家相遇到都係一種緣份，點知不出半日，森林就出現異動，出現喺我哋附近嘅病者數目，比平時多至少十倍以上。」
「繼續。」
「為咗安全，我同其他手下，都一齊入咗有天然障礙嘅寬恕營入面躲藏，而我阿哥就無咁做。」
「原因？」
「因為佢知道，如果抱住個嬰兒入去寬恕營，入面嗰班毫無人性嘅狂人，一定會搶住煮佢嚟食，佢哋好明白嬰兒肉到底有幾美味……」
「所以，佢就抱住個小嬰兒，喺凌宵閣死守？」我猜。
「佢同病者喺呢個凌宵閣廝殺血戰咗足足一日一夜，我好想帶埋手下出去幫手，但嗰個病者數目根本唔係我哋控制到，出去只有送死嘅份……」
「後尾點？如果病者聚集咗，除非其他地方有咩大動靜，否則應該會長期停留喺一個地方。」我說。
「後嚟，寬恕村入面嘅市集，有個自稱係嚟自南方嘅牧師，佢用某啲材料合成咗一桶神秘藥劑，成功引走大量病者落山，之後我再帶兄弟出去殺剩低嘅病者，可惜嘅係，當我入到凌宵閣嘅時候，我阿哥已經變咗咁大隻吞肥，而佢一直保護嘅嬰兒都唔見咗，我諗都已經死埋。」
「無垢嬰？」馮覓的研究裡，好像有說過。
「你都知道都唔出奇，你都係病獵。」沈子帝又咳一聲，說：「當時嗰位南方牧師，都話我阿哥帶嚟咗無垢嬰，係一種持續吸引大量病者嘅生物。對於佢變成呢隻體形極大嘅吞肥，牧師佢推測出，我阿哥最後不敵被感染成病者，喺變成病者之後即刻食咗無垢嬰，從而突變成呢一種特殊病者。」
看來那個牧師，都清楚不少事情。
「佢向我提出咗一個方法，可以解救佢阿哥，就係要偷一批馬俾佢，而馬只係倖存區有。」
「就係咁，你哋達成呢單交易。」我說。
「而且佢話我聽，喺某個時間點可以混入北角、灣仔、天后宜三個倖存區，因為到時呢個三地方將會淪陷，我哋可以趁機而入。」
「……」我瞳孔不禁擴大。
「如同佢講一樣，三個地方真係淪喪咗，我同手下就以拯救人嘅旗號，將當時逃唔切難，仲留喺天后區嘅居民，帶入渠道話係避難，然後同佢哋講，想要出去只有打通去對面區的路，但實際上係幫我哋打通去景賢里，方便我哋往後嘅劫馬行動。」
「打通之後？」我問。
「……」沈子帝沒有答。
「佢哋打通之後點。」
「……」
「屠殺咗佢哋，然後佢哋因為長期缺乏營養，不見天日，一個二個變成竊屍賊，到你哋因為劫馬要重返蓄洪池嗰陣，見到佢哋變哂做病者，就屠殺佢哋多一次。」我代他說出。
「Ｍ，總有一日，你都會面臨一啲不得不殺嘅局面。」
「我會殺人，但唔殺無辜嘅人。」
「你已經知道咗真相，所以點？迫我面對過錯？要我自我反省？已經無得返轉頭，當日我阿哥可以為咗我偷一隻雞蛋，我都可以為佢殺死一批難民。」
「我陣間再答你。」我掉下聽筒，回去一旁休息。
如果沈子帝所說屬實，那一年前夕鯨國三個主要糧食供應區淪陷，都是牧師所為？不可能，他一人之力，應該無法做到這個地步。
良久，沈子帝又從食道掉下了罐頭，向我示好。
「喂。」我接起聽筒。
「考慮成點，Ｍ。」
「真小人，總好過偽君子，我有個建議……」我說。
「嗯？」
「同我合作。」
「同你合作？」
「呢個，係唯一救贖到你，亦係我願意俾藥劑你嘅方法，否則過唔到我良心嘅底線。」
「你想點樣合作？」
「至少搞掂到嗰個牧師。」
因為我感覺牧師他，會遠比雙子盜賊恐怖。
沈子帝想了一想，回答：「俾時間我考慮。」
「你諗好嘅話，試下喺口腔位置，放條粗繩入嚟。」我說。
只要有東西在吞肥的食道，他便會不斷作出吞嚥的身體本能，這個過程中繩子會慢慢被吸落胃部，到時我捉住努力爬上去就可以了。
當然，這是最美好的設想。
實際情況，倒是要試試才知道。
待真的過了半天左右，沈子帝才依我所說的放入到吞肥的嘴內，繩子就像條蟲子一樣，不斷觸動吞肥喉嚨，令他下意識做出吞嚥的行為。
如此維持五分鐘後，一條又濕又黏的繩子就從食道口出來，我如見到救命索一般，將繩子捉住，然後施盡渾身解數，抗衡吞肥吞嚥的吸力，在口腔外拉住繩子的沈子帝，當然也要使盡全力。
慢慢地，眼前正滑落一團混沌的唾液，在到達我頭頂一刻就馬上閉氣，從那黏性的阻力中破出。
吞肥的食道極富彈性，喉管黏膜完全緊貼住我。
「差少少……」我向外面喊。
「等陣……」沈子帝語氣變得謹慎。
「咩事！？」我問，但沒人回答。
「你好。」外面有另一把聲音。
「牧師？你嚟宜到做咩。」沈子帝問。
牧師？
他就在外面！？
「想嚟睇下枝藥劑成唔成功，但照咁睇……你仲未注射？」牧師洞悉出。
「未，一陣就會。」
「洗唔洗幫你，拉一拉你手上嘅繩，你睇落好辛苦。」牧師說。
突然出現的牧師，令我感到異常不安。
「或者，我可以幫你注射，反正復活藥我唔係少。」牧師在槍針安裝了藥劑，我認得出聲音。
「咔」
「……」沈子帝沒說什麼。
「拉我上去、拉我上去！」我輕喊。
我見外面的沈子帝沒再使勁拉我上去，自己又距離逃出只欠兩米左右，於身拼身一博，打算徒手從喉嚨爬出。
這段時間，牧師走上二樓，跨欄跳到吞肥的肚上，在沈子帝一早弄好的皮層下，作出注射的行為。
「嗖──」牧師應該打了藥劑到吞肥身上。
原本只差一點點距離的我，瞬間被本身就緊貼住皮膚的食道收縮擠壓，我有預感再不放棄，執意爬上去，只會在這裡給狠狠擠壓而死。
於是乎，我只好放棄繩子爬出，滑回到食道以下，先回到空間較大，收縮時間較慢的胃部裡。
眼看這隻巨型的吞肥，正以肉眼看見的速度慢慢收縮著，我預測自己尚有九十秒時間思考，在三分鐘之後，胃部任何事物都會被輾壓成渣滓。
「真係有用？」恍惚的沈子帝，向牧師問上一句。
「你見唔到我注射入去嘅疫苗，用緊極高速嘅速度，侵食緊佢變成病者嘅任何一部份病毒細胞？好快，佢就會大致變返以前嘅樣。」牧師答。
我先把傘子找回來，在這危急的狀態下，我竟然找到吞肥的胃內有第三把傘子，它的模樣都跟劍傘和盾傘差不多，但我沒時間研究是什麼來頭，於是一併打走再算。
「可以點做……」我望著這逐漸收縮的空間，就如絕望的計時沙漏。
找固體物件頂住胃膜的劇烈收縮！？還是……
我靈機一動，看見放著紅酒在入面的紅酒櫃。
這些紅酒就算被吞入胃裡，且經過一段時間，都沒有明顯損毀，原因是紅酒櫃保護得妥當。
同一道理，如果我把自己收納在一個安全的空間……
說不定可以躲過一劫。
我沒再多想它的可行性，立刻找尋全胃內最堅固的東西。
最後，我慌亂的視線中，終於在一個大夾萬上停下來。
我將那個早已被撬開的大夾萬打開，然後盡量將所有物件搬到夾萬附近，提供少許的防護，然後關上鎖頭壞掉的夾萬。
在夾萬裡那一片漆黑之中，我聽到胃部一點一點將物件壓破的聲音。
「咔──」
「啪──」
「咯──」
到最後，恐怖的輾壓聲音漸漸壓迫近至耳朵。
就算看不到，我都明確聽得到……
夾萬正被巨大的重力壓縮，就算鐵製都有一點變形、凹凸跡象。
猶如一部壓縮機，在經過數十秒擠壓後，外頭突然發出一陣巨響，使得躲在夾萬裡的我都被震及，有點腦震盪的感覺。
「嗄……嗄……」
「唔記得咗令兄肚入面，可能吞咗極為堅固嘅物件，要事先刺激佢胃膜進行劇烈收縮，將肚內固體物件壓成渣先。」牧師交低一句，就步出凌宵閣：「救治失敗。」
「你……咁算……係咩意思……」在外面，沈子帝愣問。
「咩意思？由你將我嘅事情透露出去嗰刻，就只有宜個下場。」
「你點知道我同佢……」
「我無所不知。」牧師留下一句，就騎馬離開。
面對這樣的一個人，沈子帝完全不敢埋身對付。
他作為人的深層畏懼，被勾勒出來。
成功躲過一劫的我，則一腳踢開夾萬壞掉的門，從裡面爬出一望，外頭是炸裂一地的血跡和肉塊。注射藥劑強行轉化成勞者的巨型吞肥，因為受不住胃內固體物件的壓力，反而肚皮內臟全給撐破。
但從牧師的說話來看……
他一早知道會有這個結果，如果不事先將胃裡物件進行多次擠壓。
102
我爬出夾萬，走到失落、呆滯的沈子帝面前，他沒任何表情反應，臉上殘留住兄長濺出的血液，從臉頰緩緩流落到下巴滴落。
連他原本穿著的深藍雨衣，都染成一片血色。
「你做錯咗決定。」我說。
「再咁辛苦落去，都無意思。」沈子帝舉起武士刀，做出對自己切腹的姿勢。
「喂，你至少都……」我行過去，想制止他自殺的衝動。
料不知，他尚未說完，目光就斜斜地盯住我，轉為選我做目標。
「如果你一早肯俾藥佢！」目露凶光的沈子帝，眼神猛烈瞪大：「唔會有宜個結局！」
我舉起傘子，打算開盾格擋。
「噠」我按下鈕鍵後，傘子卻沒有打開。
反而在傘端射出一條抓鉤之類的東西，正中鎖骨沈子帝鎖骨！
我呆怔兩秒：「呢個……」
之後，我才意識到這傘子，是收藏在吞肥肚內的第三把傘。
由於它的外型太過酷似劍傘和盾傘，我索性先將它一併帶走，安全之後再看看哪一把是劍和盾的傘，沒想到我無心拾取的東西，竟然就是第三把滿佈奇怪功能的傘子……
「啊…！」沈子帝意圖拔出肩頸上的抓鉤。
我試試再按一次鈕鍵，看會有什麼反應，結果立馬把沈子帝給拉扯過來。從他一面錯愕，步伐虛晃的被扯過來的樣子，可以得知出，他亦不知道這傘子的功能。
待他被拉過來後，我另一隻手順勢用盾傘一擊將他拿下。
「嗄啊……」他被重重打到地上。
我踩住狼狽的他，將鉤傘強行從其皮肉扯出。
「嘶…」血液再濺。
「啊呀嗄……」全身伏在地上的他，牙齒因為劇烈痛楚而顫抖。
最後，他悲怒和痛楚交加的情緒結合，像是昏了過去。
看著沈子帝的傷口暴露於空氣外，吞肥炸裂出的血液又污染了整個凌宵閣，商場一些天花上亦一滴一滴的落著血雨，我便抱住他出去，找塊乾淨的布條，替他包紮好傷口。
他醒來時，陽光正值中午。
可惜他不會見到，因為他被我鎖在山頂廣場一間兒童博物館中。那間博物館，其實就是大富翁桌遊主題的展覽館，入面有一間房是模擬遊戲角色入監獄的場景，但如今它真的給我當作監獄使用，將沈子帝囚禁住。
他倒是不意外，還摸摸自己肩頸上的傷口，自嚐一下是否真的還活著的苦味。
至於我則坐在另一間房，一邊吃著他們收集的罐頭食物，一邊跟自己玩大富翁遊戲，待聽到些沈子帝意圖打開監獄大門的聲音，就行過去望望。
「我哋角色調轉咗。」一過到去，我便說。
「殺咗我。」他一見到我，便放棄打開囚禁他的門。
「咁益你？」我伸手入囚牢內，說：「你聞下，我身上仲係你阿哥胃入面嘅氣味。」
面對我的挑釁，他沒什麼好回應，僅靠在牆的一邊沉默。
「老實講，我原本已經唔想理你，但我需要知道牧師嘅去向同資料。」我說。
「你見唔到有咩下場？」變得頹然的沈子帝，無力地望著地板：「唔需要監聽器、唔需要針孔攝影機、唔需要任何耳目，佢就好似鬼魅咁出現，知道咗我透露佢嘅事情，然後嚟處死我嘅家人……」
「咁代表啲咩？萬事必有因，佢喺咁啱嘅時機出現，一定係出於某些原因先知道。」雖然除了巧合之外，我暫時都無法給出一個解釋。
到底還有什麼原因，引致到牧師會在那個完美的時機現身……
「你唔放我走都無所謂，我班手下好快就會返嚟。」沈子帝真無趣。
「你真係唔會透露牧師行蹤？反正你都想死。」
「我覺得以佢嘅能力，可以將死人復活，之後施以虐待。」
「令你怕到報仇都唔敢，睇嚟啱啱嗰一幕陰影對你嚟講幾大。」我說。
牧師剛才的行為，無疑是天堂打入地獄的概念。沈子帝等待一年的盼望由最期待的高處，一下子跌到落谷底之餘，更被告知是因為自己，才導致這個結果。
在正常的時代，失去親人已經是很痛苦的事。
更何況，是親情更為罕有的末世。
「我都有失去過重要嘅人，一路上亦都想過放棄，但放棄咗作為人，就等同放棄好多權利，可能就連思念佢嘅機會都無，你自己諗下。」
沈子帝想了好一會，說：「咁你有咩對策。」
「未有，但至少返去研究下宜枝嘢先。」我把一直保管好的藥劑拿出，呈現在他面前。
見沈子帝目光仍徘徊在地面，好像沒什麼話要吐出，我便將藥劑收好、離開，等他的手下回來把他救出。
可在我步出門口前，他出聲了：
「寬恕營。」
他接著說：「如果你入到去寬恕營，或者會問到一啲嘢。」
「山頂公園嗰到？」
「但前提係，你要入去嘅資格。」沈子帝好像說出了重點。
「入去嘅資格？」
「寬恕營入面正常只係俾佢哋原始成員住，復仇營就係俾後嚟加入嘅新人居住，可以話係咩人都可以加入，只要大家啱傾，有差不多嘅背景。」
「又或者，只要你喺倖存區入面做件大事，做個聲名狼藉嘅犯罪者，就夠資格入去。」沈子帝抬起頭。
「殺人？」
「殺普通人？你諗得太簡單，除非你係走去刺殺倖存區入面，權力同地位最高嘅管理者，每一行政區都有一個。」
「唔。」我思考著。
「總言之，你嘅行為係瓦解緊「倖存區」個制度，帶制度嚟衝擊，佢哋就會許可你入去做賓客。」
「奉上禮物得唔得？」老實說，我不太想殺人。
「送最普通，豬、雞、牛、羊，都只可以加入我哋外面嘅「復仇營」，但如果你奉上係貴重嘅寶物，可能可以入去「寬恕營」入面。」
「你講嘅肉品都唔夠珍貴？」
「真正嘅貴嘢，我諗你可以去巴爾市拍賣行睇下，入面每件珍品，只要你擁有其中一樣，然後將佢當做開門費，都夠資格入去。」
「入面有咩咁好，要人俾咁貴重嘅禮物先入得。」
「到時你自己入去親眼睇。」
「咁你？點解你會選擇喺出面嘅「復仇營」住，你地位唔似咁低。」
「我雖然係個壞人，但入面每日發生嘅事……」沈子帝將視線，移到一邊去：「連我自己都接受唔到，所以冇住入去，只係負責守住門口，你喺凌宵閣見到嘅大部份財寶，除咗搶之外，有一半都係啲人特登上山送嚟，就係為咗入去，但可以靠送禮物入去嘅，一年往往得十個以內。」
「把遮曾經嘅主人，就係其中一個。」沈子帝望向我的鉤傘。
「即係曾經有條友，將呢把鉤遮當做入場費，都入得去？」我把弄傷沈子帝的鉤傘拿出。
「宜個人，我有啲印象。」沈子帝目光停留在鉤傘上，默默回想起：「佢全身包住繃帶，自稱係嚟自遠方嘅旅人，看門人見把遮造工幾好，於是准許佢入去。」
我在剛才的空檔，有檢視過這把傘子，它應該都是出自「七傘武者」的其中一把傑作，說不定那人都來過此處。
「咔」我將囚牢解鎖。
「出嚟吧。」
「真係唔殺咗我？我殺過好多人。」他說。
「殺咗你一個，都摧毀唔到你哋宜班人。」我說。
我行出山頂廣場，伸一伸懶腰。
是時候回去了。
復仇營經過今次劫馬事件，都應該有損兵折將，但他們是不會滅亡的，世界一日尚有人性和惡意存在，就總有人會上山加入他們，成為復仇營的新一員。
因為，這個世界每天都在一點一滴的，將人的醜陋面逼出。
與其殺了沈子帝，倒不如放他一條活路，說不定哪天我需要幫忙時，就不會後悔這個決定。
反正，他也算不上真正的大奸大惡。
原本我都旨在殺死雙子盜賊，來獲取倖存區各持份者的信任，最後推動與病者們的戰爭。
但牧師的出現，似乎打斷了一切的預算。
我有預感，如果不先將他刪除掉，
就算最後能推動到整場戰爭，
都只會落下失敗收場。
「到底佢係點樣知道我同沈子帝嘅事情……」
回程夕鯨國的時候，我把這個問題想了數百遍。
就在後來得知真相後，我原地發怔接近一分鐘。
辛辛苦苦從鯨寨入去，再返回病獵協會消耗我一天不少時間。
原本，我只是打算將藥劑交給專員去化驗研究。
沒料到我一入門口，就見到一群憂心忡忡的人，同時間將目光移向了我，他們是跑馬地馬場的經營人，阮氏家族全人。
「病、病獵大師！點啊，我哋啲馬點啊！？阿盧官員同我講，你走咗去追批馬，批馬到底點啊！！佢哋喺邊呀！！！」帶頭衝著我而來問話的人，是阮家的長子。
「係囉！你有冇幫我搵返批馬！？」
「啲馬好珍貴嫁，你哋賠唔賠得起呀！」
阮家二女、三女一起問。
除了他們外，我視線更搜尋到石柱一旁等我回來的盧旺山大叔。
他們阮氏一家見我兩手空空而回，更沒有回答他們問題，情緒就開始著急了，當中排行第二年輕的四子，一手就抓住我袍領：「馬啊！答我呀，去咗邊啊！！」
他頸筋、血色都暴露出皮膚外，顯然十分之動氣。
在場，還有眼神變得黯淡的阮秀清少姐，她是唯一沒追問馬匹下落的人，但她應該都讀懂我沉默的答案。
「鬆手吧，唔好太過份。」盧旺山替我拉開阮家四子。
「喂！你哋點樣做嘢嫁，吓！！？年年交咁多籽俾你哋，就係咁白白令瀕臨面絕嘅馬匹俾班賊偷走！！？」阮家長子都一起來追究。
「Ｍ，唔好介意，啲馬啲？」盧旺山替我擋住他們，並低聲問我。
「可以當啲馬死哂。」我回答唯一保持住理智的人。
「咁……咁……大鑊……一隻都無淨？連我俾你騎過去嗰啲都……」盧旺山都呆住。
「嗯。」我點頭。
「好，你去休息下先，我幫你頂住班友……」盧旺山轉身張手，勸慰阮家眾人。
此時，坐在大堂椅上的阮秀清，都忍不住過來追問：「你一早知道，馬場會賊入嚟？」
「係。」
「咁點解、點解唔一早，唔一早講，至少等我哋可以停辦呢場活動……」
「因為捕獲佢哋嘅機會，唔係成日有。」
「你知唔知，我哋家族嘅聲名因為今次……」阮秀清氣到一半，就選擇走人。
餘下他那群在大堂吵吵鬧鬧，鬧著要追究我們的兄弟姊妹。
而我，則把藥劑順利交到化驗人員手上。