《病港２》: ７８

「你身為大病獵咁高位，居然無參與成為狩獵嘅一份子？」我行到棺木前插腰，凝望面無血色的女病童：「唔知嗰位富豪，需唔需要死咗嘅病童。」

「因為宜單生意，最後幾乎俾一個病獵大師全部包攬，嗰個人係病獵協會僅有嘅高手之一，湯婆。」富馬史一邊說，一邊搬開掩蓋地洞的數塊木板。

「可以講下佢？」

有實力者，都是我未來需要拉攏的對象。

「無人知道佢太多事情，佢應該喜歡獨來獨往，只係知道係個上咗年齡嘅女人，有人話佢同病者戰鬥嗰陣，就好似一隻蝴蝶起舞。」富馬史將木板一一搬開後，那猶如深淵的地洞終於呈現：「入面係通去邊到……」





「呢到好似有啲嘢。」我注意到棺木裡，藏有一封信。

那信件一開始被女病童的後腦勺壓住，所以沒能察覺。在我把信件拿出並細閱後，對眼前已魂歸天國的病者，多了一份認識。

信件內的字跡極為慌亂，應該是在混亂或危急的情況下撰寫：

「倖存區外面好似發生混亂……出面好嘈、好多人跑嚟跑去，我唔知發生咩事……宜家我同嗰女，仲有一啲住客匿咗喺唐樓到，但我已經、已經開始聽到樓下單位有笑聲……係病者嘅笑聲……安全起見，我叫嗰女匿喺棺材到再鎖實，諗住帶佢出去，咁就算我俾病者殺咗，佢都唔會有事……讀到宜封信嘅人啊！請你好好照顧我個女……病者已經用力拍緊我門口……十字鎬……我要搵我嘅十字鎬……」

信封內還有一張小照片，是個女兒騎在父親肩上的合照，那女兒戴住個玩具王冠，結合前文後理，我猜測書寫信件的這位父親，便是竊屍王。而她匿藏在棺材中的小女兒，應該就是眼前死不瞑目的病童。





難怪，這名竊屍王是揹住棺木在身，可惜的是她女兒依然受感染了，即使是棺蓋沒有打開的狀態下。

「咩信嚟？」富馬史見我讀了書件好一會，便問。

「無嘢，就只係一件悲劇。」照片我放回棺木中，並將棺蓋合上：「安息。」

富馬史疑惑一笑：「同病者講安息？」

「成為病者之前，佢哋都係併命想要生存嘅人類。」





富馬史無話可駁，轉了別個話題：「有無興趣睇下，下面到底有啲咩。」

「個洞入面？」我低頭凝視那漆黑一片的地洞，連它有多深都不知道。

「下面應該俾呢個竊屍王，挖咗一個通道出嚟，我喺對面大廈監視咗竊屍王好耐，佢一到朝早就會跳入去。」富馬史隨手拿來單位裡一枝原子筆，將它掉入到地洞內：「聽下有幾深先。」

「噠」

三秒左右，是原子筆從手上跌落到地洞最底的時間。

但是，我們更有意外收穫……

「嘎嘰！」

我和富馬史聽見這一瞬即逝的聲音後，都不自覺抬頭望向了對方。





「係竊屍賊。」那聲音我一聽就知道。

「果然呢件事仲未完，直覺話俾我聽下面會有大豐收……」富馬史凝視下面，眼神看來不願放過。

「下面大概七米深。」我估計完深度，再估計探索下面的死亡率：「但我哋宜家狀態落去，應該得三成機會可以平安出返嚟。」

「都啱，我已經開始攰。」富馬史聽完我一言，就把眼睛從地洞移開：「擇日再嚟。」

「你真係好戰份子。」我抱手，說。

「既然成為病獵，將病者趕盡殺絕就係我嘅職責。」富馬史只是簡單回上老土的一句。

「咁暫時離開吧。」





回去的路上我把苦等許久的王達尼一併接走，他第一眼見到富馬史就話題多多，跟陌生的人都聊過不停，看來我去殺病者的時候把他悶著了。

「富馬史先生，點解你打扮咁鬼似佢呢？又係面具又係袍咁。」王達尼托住下鄂，自問自答：「你哋啲病獵風格嚟？」

「厚袍可以確保減低接觸感染，面具可以顯示你兇殺嘅一面。」虧富馬史會認真回答他。

「即係咩意思？」

「有時候，病獵唔單止要殺病者。」富馬史有弦外之意。

相信，只有一定閱歷的病獵才會明白。

在炮崗嶺往天后關口，我們和富馬史暫且道別，他說要去工坊購回個長盾牌，再向病獵協會回報一下任務情況，適當時候會再來找我一起探索探索。

「天后嘅事仲未完，Ｍ，疫區係有好多秘密，就好似倖存區咁。」這是富馬史和我們分別前，最後一句。





「你又會突然搵到個同伴嘅？」王達尼始才問。

「喺入面無啦啦遇到。」我伸一伸手，拉拉筋骨：「勞動咗成日，要搵個地方休息先。」

「都咁夜～由鐵路返去巴爾市都有排。」王達尼望望手錶，有個提議：「不如喺到搵個地方休息算？」

「嗯。」

我和王達尼在這個一地污水、滿牆油煙的地方，決定要找間旅館休息。說真的，在工業區不寄望能找到好地方休息，只要不太擠迫就行。

但幾乎不熟識炮崗嶺地圖的我們，誤打誤撞下找著了個好地方。

「歡迎兩位！搵緊酒店啊？」在經過一間寬廣的廢車場時，門口有個周圍物色顧客的人將我們攔住。





「你又知？」王達尼張望那廢車場入面。

「嘻，兩個男人夜媽媽喺炮崗嶺走嚟走去，應該都係嗰啲嘢啦～」對方只笑不答，續說自己的事：「搵酒店就啱啦，我哋呢間係全夕鯨國首個「露天廢車場酒店」，只係８０籽一晚！可以隨便入去揀嫁廢車去訓，廢車場中間有投影機播電影，嗰啲位就１４０籽一晚！」

「咁搞笑，露天廢車場變咗做酒店，不過睇嗰樣好掂喎……好多人喺入面訓咁。」王達尼覺得這生意頭腦很高。

在「露天廢車場酒店」入面，有些車疊放了三、四層高，但你仍然可以看到有居民在裡頭訓覺、跟附近的人閒聊，或是觀看酒店提供投射的電影。

「Ｍ，你意下如何啊？」王達尼問我。

「你拎主意。」我答。

「好，就兩位。」

「咁要唔要隱密啲嘅暗角車位呢？畢竟呢啲風氣喺區內唔係太盛行……」廢車場職員領我們進去。

「咳，唔需要，同埋我可以話係有未婚妻。」王達尼利申。

「有未婚妻都玩呢尾嘢……」廢車場職員小聲自喃。

廢車場職員給了我們一個依稀望到電影的車位，王達尼想吹多點風和不想惹到蛇蟲鼠蟻，於是我們睡在被疊放到第三層的一輛豐田四人車當中。

「喂、喂！前面位俾我，我要睇片。」王達尼不能好好開門爬入去，心急得要從車窗鑽進去。

真正想休息的我，則躺在後座上。

「咦，原來播緊《鐵達尼號》。」王達尼遠眺窗外，投射在牆壁的電影。

「達尼。」我說。

「咩？」王達尼他望望倒後鏡。

「無嘢，我講緊鐵達尼號。」

在電影結尾播出那首知名的英文歌曲，我悠悠入睡到夢鄉之中。

翌日一醒來，我就落車走走，因為車子座位太細，我要整晚彎住腳睡眠。

我小心地推開車門，慢慢爬落到露天廢車場的沙地上，大白早那刺耀的陽光，讓人無法完全張開眼皮。

廢車場有蟬叫，還有像豬一樣的鼻鼾聲。

在我對面的廢車中，有位精神的老伯伯托著老花眼鏡，專心地閱讀《病港日報》，其車蓋放住頭條版內容頁，應該是他看完的了。

「阿伯，借嚟睇睇。」我行過去對面，拿上他的報紙看。

「啲病獵好大件事哦～」老伯應該看過了內容。

但新聞的頭條……

是說病獵？

待我打開報紙一看，驚惶之感緩緩流入我血管內。

「炮崗嶺三名病獵於地鐵站下運送「詭人」返回協會，中途出現突發狀況！協會證實一名病獵當場死亡，另外兩人搶救當中。」

「……三個病獵。」我腦裡去來去去想到的，只有瑪昆、劍坤、西門東東昨日和我出征的三人。

到底發生什麼事情……

我焦急的把報紙放下，連跟王達尼交代一聲的心情都沒有，就火速前往病獵協會，打算看看是什麼一回事。

可恨的是，我去炮台山地鐵站才告訴我因為昨日發生一些事，現在維修當中，炮崗嶺的各區來往暫不開放。

「點解唔開放啊！」、

「我仲要返工嫁你老母！」、

「開門啦！開門啊！」

不單止我覺得焦躁，連無法去其他區上班的居民都感到憤怒。

「琴日路軌嗰到發生咗啲事啊！走啦你哋，今日唔開放，返咩工啊，返屋企訓喇！」鐵道職員趕走前來的人。

「我夠資格入去？」我把病獵執照呈出。

「呃……你係病獵？我諗應該可以，請你等等。」

職員協助我入到站內後，他馬上詢問我是不是為某些事而來：

「你係為咗琴日嘅事嚟？」

「琴日發生咩事。」我問。

「聽聞……有三個病獵……」職員正在找方式，把話說出：「好似係佢哋返去巴爾市途中，發生咗爆炸，實際上我都唔太清楚。」

「嗰三個係咪著住黑盔甲、一個拎弓箭、一個又肥又大隻咁？」

「係啊，好似係。」

聽到職員如此回答，我更是心中一沉。

「唔該你。」

我跳落路軌，快步回去。