【新手選項故】《2020》(一個光復香港嘅故事): 【Ch 1】元旦的煙火(7)

[00:30 灣仔站]

最終，我安然無恙咁跑咗入黨鐵站。

今晚我唔想返去宿舍，我怕見到佢嘅嘢又會勾起我同佢之間嘅美好回憶。於是我唯有打電話俾老豆，希望「佢」唔喺度啦……

「女，你今晚會返嚟都唔早d同我講聲先。好在你啊媽早幾日坐咗遊輪出去玩，呢個星期都唔會返㗎啦，你就放心返嚟啦。」

我並無答佢就收咗線。





一路撘車，一路又惗返起頭先嘅事，結果我成程車一直匿埋喺角落抽泣。


「下一站旺角，下一站旺角，next station Mong Kok」

出咗黨鐵站行咗10幾分鐘之後，終於到我嘅目的地。望到呢個熟悉又陌生嘅門鐘，我鼓起勇氣咁㩒咗落去：「叮噹~~」

門開咗，出嚟迎接我嘅係我老豆。

「女，你啱啱係咪去完中環嚟？咁早散嘅？你無整親吖嘛？」





「我無事。」身體無事，有事嘅只係心靈。

「你間房我啱啱幫你掃咗一次㗎啦，你都差唔多半年都無返過嚟，間房已經鋪哂塵。」

「唔該老豆。」原來……已經咁耐㗎啦。

「肚唔肚餓啊，我啱啱煮多咗個麵，你食唔食？」

「我依家無咩胃口食嘢。」啱啱經歷完咁多嘢，仲邊食得落嘢吖。





「。。。。。。」於是大家沉默咗幾秒。

「我覺得有d攰，我都係返房瞓覺先啦，有d咩聽朝先講啦。」之後我就轉身入咗房。

明明成身都好攰，但係攤咗喺張床成個鐘都仲係瞓唔着，仲望緊白色嘅天花板發呆。百無聊賴之下，我坐咗喺窗邊，望住依然人來人往嘅旺角。

房門喺無聲無息間打開咗：「女，你仲未瞓嘅？」老豆問我。

「我……瞓唔着。」

「由你入門口我就已經睇得出你好唔開心啦，有咩咪同我講囉！兩父女有咩唔講得啊！定係你又惗緊你啊媽當日……」

「唔關佢事，只係……」





跟住，我同我老豆一五一十咁講返呢一兩日發生過嘅事。由元旦嘅爆炸，跟住到我嘅夢境，最後講到我點樣睇住我嘅好姊妹喺我面前死……

「……最終，我只可以眼白白咁睇住佢死喺我面前。」

我都唔知點解我會同老豆講，可能我依家真係好需要人安慰我。

「即係你覺得係你害死你個好姊妹同班手足？」佢問。

我臉帶淚水咁點頭。

「你咁惗咪錯囉，你都無惗過會發生呢件事㗎嘛。夢境呢d嘢真係好難令人相信㗎嘛，點知佢係真預言定只係自己幻想出嚟啫。更何況，你都有嘗試過阻止呢件事發生，只係無人相信你。天意嘅嘢，唔係我哋凡人可以改變到。」

「你講嘅每一個說話、做出嘅每一個行動，都未必可以得到你想要嘅結果。」

「就算結果未如理想，但至少你勇於改變，有好多人連第一步嘅嘗試都唔敢踏出，寧願聽天由命，就算真係有機會改變都就咁樣白白流失咗。」





聽到呢度，我終於安心哂。

「好啦好啦，要瞓啦，再唔瞓就唔靚女㗎啦！瞓覺記得冚被，呢幾日朝早都有d凍，因住冷親呀！」

「嗯。」我講完就漸入夢境。