2019／發夢撞返做ptgf時嘅舊客之後（又）跟咗佢返屋企: 4 熊仔餅

洗埋洗衣機，好餓。但阿風屋企同我屋企一樣，無咩嘢食。 

我屋企無嘢食係因為，我阿媽話食零食唔好。小四咁上下買咗盒熊仔餅想遲啲食，俾阿媽罰我食完一塊後要企喺門出面睇住佢逐塊逐塊食晒成盒。佢逐隻逐隻樹熊咬甩耳仔後隔住度閘俾我睇。當晚我就發燒。38.7度，入瑪嘉烈。從此我再無買過嘢食返屋企。 

阿風屋企無嘢食就應該係因為，佢無去買，佢爸爸媽媽又無買。阿風好似由細就成日得佢同家姐係屋企，但佢無因此愛好整潔或者自理能力超群。可能因為佢家姐做晒啲家務，又或者因為佢俾家姐逼住做晒啲家務，所以唔想再做。都有可能，唔太清楚。之前嚟，間屋都未有咁亂。 

我成日覺得屋企係一個人嘅秘密，好難想像可以任無關人等自出自入；但我哋第一次見，全油尖旺都無房，我話不如下次啦，阿風就笑笑口問我，不如唔好走啦好冇，今晚不如上去佢到。經過樓下百佳佢拖住我行咗一圈買咗兩盒入面有瓣橙嗰啲啫喱，臨俾錢時氹我出去等。仲記得，一開燈，就見到枱到有一大筒熊仔餅；阿風去沖涼時見我一直望，話，我可以隨便食。 

尋晚我拎住杯攪唔均嘅咖啡粉加暖水望住阿風，佢可能以為我想佢試，拎走飲咗啖後話，屌，乜鳩嘢，唔撚好飲啦。佢真係好鍾意講粗口。然後佢話，佢阿爸阿媽收到call今晚唔會返。鍾意嘅可以去佢度洗咗衫先。地庫好暗，睇唔到佢表情。 





於是我哋等170，坐車，一路無講嘢，經過百佳佢提我買即棄底褲，返到屋企佢就除衫，衝入沖涼房，係我幫佢掛起啲衫。佢背脊瘀咗一大撻。佢沖咗好耐涼，一路沖一路叫，沖完出嚟見我睇緊電視，屌一聲就熄咗佢。但我沖完出嚟，佢喺床度明明都係碌緊新聞，有時覆telegram。瞓啦，聽日返工。佢講完，都係繼續用手機，無同我講嘢。其實我覺得佢成晚都無瞓。我諗，同床異夢就係咁解。 

我無問佢中間掉低我去咗邊，因為我哋都無講好要一齊行動。就算真係共同進退，我都唔知我會唔會連累佢。佢要做嘅事。會令佢手腳擦傷背脊瘀晒沖涼慘叫嘅事。     

其實我都唔知點解可以撞返阿風，走失，又重逢。係奇蹟，發夢咁。 

就好似，想像唔到可以成個金鐘都係人。我幾乎以為全香港嘅年青人都喺晒嗰到。如果有個夠勁嘅炸彈爆炸，香港就會斷代。嗰種規模，嗰種意志，似足啲倒模惡托邦片。裝扮亂中有序嘅蒙面青年軍結社行軍，八個montage後包圍政治機關。搖港鐵，落巴士，逼海富買乾糧，掉落物資站座山墊住寫label，一橫一直切去急救站十字，zoom out做前景後面係朋友會合，剛毅眼特寫，急zoom航拍黑海。唔知仲以為香港年輕人做慣呢類劇本，前一晚收到通告唔洗prep第二日即開鏡。乳豬呢，幾時切咗。唔知。 

真係，咪玩啦，臨時演員都係演員呀，無劇本都算，direction都無句，點搞。 





我幾想尋日真係做戲。咁一cut就可以回歸日常，再拍落去我哋一定會贏：無論中間會有幾多沮喪，幾多恐懼，要隔幾多波折。但如果要承受咁多，我會唔會寧願唔要，只求唔再失去。唔知。但其實已經，無得揀。突然之間。

阿風屋企連餅碎都無，應該得我哋背囊入面有乾糧。明明尋日成日都唔識餓，而家好想塞飽自己。有啲似乎無來由嘅想像，想食餐好。常餐都得，要火腿奄列加牛油方包，茶走，加份西多，再加個菠蘿油。Pizza都好，厚批加芝士。想飲珍珠奶茶。想食熊仔餅。想有人抱住自己，最好係阿風。我可以落樓，但就返唔返嚟。 

我諗起張外賣紙。唔知好唔好食。唔知一個送唔送。又見到張pizza hut傳單。我想像半張枱俾個pizza盒佔據，中學Christmas party一樣。阿風收工返嚟，聞到浸油味，唔係，佢見到我仲喺度一定又會話：痴撚線。諗到就覺得滿足。 

我喺背囊搵返個檸檬味瑞士卷出嚟，食住挨住窗叫外賣。窗外城門河喺夕陽下閃閃發光。兩套黑衫黑褲，有阿風張床又香又暖嘅味。 

⋯⋯但我都係想食熊仔餅。