2019／發夢撞返做ptgf時嘅舊客之後（又）跟咗佢返屋企: 1 家務

我醒時，朝早七點四十七分，阿風已經唔見咗。

唔喺床度，唔喺屋入面。 雖然佢尋晚臨瞓前已經講咗，佢今日會返工。 

你可以瞓醒好似咩事都無發生過咁返工畫圖咩？

「我真係好愛返工，ok？」佢嗰種戲謔到唔知係笑定喊嘅語氣，同佢兩年前嗌「屌！又要返工」時，幾乎一模一樣。 

但講得出我愛返工，佢係有啲唔同咗。我哋最後無傾發生嘅事，都無敘舊。我想攬住佢瞓，佢拍一拍我隻手，反身，話：「返工不了，咪搞」。 





結果四點幾時咪又係攬住我。 

點解嘅。我問佢。 

「妳唔想咩？」    

我先知我搞錯咗，佢原來都仲係連好好哋回答問題嘅勇氣同責任感都無。有膽食胡椒放題，無膽認自己鳩痕。    

雖則我都係照俾佢攬住，仲順住習慣錫咗佢塊臉兩下，對要守護自己嘅身同心一啲責任感都無。不過佢無再做啲咩。 





佢都仲係咁香咁暖。佢張被都係。聞一聞我身上著住佢件系tee，都係。 

客廳電視櫃仲係擺住佢同屋企人啲相，我成日覺得幸福家庭先會擺呢啲出嚟，我屋企就無。佢哋日本旅行東京鐵塔張相前面多咗張婚禮時影嘅全家福，新娘應該係佢家姐，同佢一樣鳳眼鼻又高又細一臉傲氣。我都係第一次見佢著西裝個樣，好是正。窗台掛住黑衫黑褲，梳化掉住佢同我個背囊，連個廳都隱約有催淚彈味。枱好亂，switch，六月九啲單張冚住遊戲帶盒，水費單，電費單，melty kiss包裝，壓扁嘅pocky盒，信用卡單，求其撕開嘅信封，外賣紙，糧單，強積金，保險，pizza hut宣傳單張，仲有唔係俾佢所以無拆嘅信。廚房好亂，堆咗兩三日碗，籃衫半滿，垃圾又唔清。 

雖然佢都係去咗返工，但我唔洗返學，無所事事，佢又無話我幾時要走。我可以幫佢執屋。平日阿媽叫我執房我都成日左推右推，但奇怪地，我幾鐘意幫阿風做家務。戴手套，洗碗時望出窗外，我以為我唔會再見到早晨嘅城門河，有啲懷念。 

食過催淚彈啲衫褲感覺要手洗，但戴住手套捽似乎又唔會乾淨。決定洗咗洗衣籃啲衫之後再分開洗多一機，最後再洗洗衣機。 

唔係無諗過如果阿風阿爸阿媽返嚟我要點算，要點介紹自己，但我諗，我叫佢哋問返麥展風會比較好。我討厭欺暪。但我知佢一定唔會想我講真話（或者佢會話，真話都有唔同嘅講法）。我比較在意佢。如果尋日令我明白咩事，就係，我唔想佢再受傷。 我想保護佢。 





等緊衫洗好時，我喺背囊搵返部相機出嚟，影窗外城門河。

有人晨運，有人經過，有人拖車仔買餸；記得之前，會見到學生跑返學校，阿風會企喺我隔離睇一陣學生妹先去換衫。 

窗外世界如常。

打開電視，仍然唱緊Sing Hallelujah to the Lord。 （撤回撤回撤回撤回撤回撤回撤回撤回撤回我哋係自發㗎。） 

而阿風屋企如此安靜，可以落手打理，衫污糟咗可以洗乾淨。 

香港早晨。