一個中五女學生的故事: 4

早上九點。
要起身準備去街。基本既刷牙洗面加沖涼洗頭，然後開始護膚、化妝。
其實平時都會化少少返學，遮瑕眉毛唇膏同少少睫毛膏。今日都係同平時既妝差唔多，只係多左胭脂、輕輕掃少少單色眼影同埋搽多左睫毛膏，
唇膏依然係最近喜愛既奶茶色，睇上去俾平時更有氣息同埋精神。
有時中意化濃少少，但今日簡單既妝容已經覺得足夠，始終唔想俾人覺得我返學同出街既差別太大，而且覺得顯得我精神、似個人就夠，濃妝唔係每個人識欣賞，
尤其男仔。通常男仔淨係覺得淡色唇膏就係素顏或者深色唇膏就係濃妝，甚至以為偽素顏就係真素顏。佢地唔會知你化幾多心思去扮靚，所以簡簡單單就夠。
衫方面都係淨色吊帶背心、格仔恤衫綁腰同黑色短褲加對converse，簡單出街look就完成，拎埋袋仔執返銀包、鎖匙、粉餅等等瑣碎野就出門口。

落到樓下同大堂既姨姨打聲招呼就出左大門。
行到咁上下就有人大聲嗌我。




「Scarlett！」把聲咁熟既。。我擰轉頭睇，wtf，點解會係呢到架？
「點解你會係到既Figo。。。我地唔係約係地鐵站等既咩？」我有少少愕然。
「黎接你啊嘛。」Figo面帶笑容咁講。
「下。。唔洗突登黎接我啦，頭先嗌我個陣我都真係嚇親。」我有啲尷尬咁講。
「唔緊要啦，可能琴晚太期待今日同你既約會，所以咪早醒左，黎左接你。」佢繼續面帶笑容咁講。
「咁你等左幾耐？」我問佢。
「um。。半個鐘至九個字左右啦，唔係好耐姐。」竟然等左咁耐。
「Sorry啊，你wts我啊嘛，等我快手少少搞掂你咪唔洗等咁耐。」我有點唔好意思。
「唔緊要啦，聽住音樂等你時間好快過姐，而且wts你好似催你咁樣唔係咁好既，陣間見唔到你悉心打扮既樣我咪走寶。」Figo打量左我一番。
「都係同平時差唔多姐。」我回應。




「唔係啊，你今日比平時更靚。」呢個人相當口甜舌滑。
「可能著返自己衫同埋放左頭髮無紮起姐。你今日都比起平時更有型啦。」Figo今日著左白色tshirt、淺藍色長爛牛仔褲，帶左隻casual既手錶，再加對黑色vans，
同埋gel左頭。平時係sporty陽光，今日係隨性abc style。
「你咁講我會怕醜架。」Figo有啲唔好意思咁講，我唔回敬下佢點得呢。
「行啦180」我笑住咁講。
「你笑真係好好睇。」Figo再次稱讚我，我無講野，淨係笑笑口行係佢側邊。
企係佢隔離，真係有所謂身高差，不過應該唔係最萌，因為我都160左右。
今日星期六而且依家係中午時段，所以地鐵站都唔算好多人，都係啲中學生約左朋友或者男女朋友一齊去街，而Figo一樣都係咁耀眼，都係好多女仔望住佢，交頭接耳咁樣評論佢。

「喂Figo！」不遠處有把男仔聲嗌佢個名。




「喂咁岩既啊峰。今日去邊玩啊你？」Figo同呢個叫啊峰既男仔打招呼問好。
「無啊，都係約左女朋友咋嘛。咦，呢個係你女朋友？」我擰轉頭既時候咁岩同啊峰對望左一眼，然後我微笑點頭打招呼。
「朋友咋，你唔好亂講野啦。」Figo好似有d著急，驚我誤會。
「係咩？唔好意思啊。」啊峰語氣似質疑緊我同Figo之間既關係。
「係啊，你唔係約左女朋友咩，快d走啦，你女友等緊你。」Figo想打發啊峰走。
「係啦係啦，唔阻你，byebye。」啊峰講完就走左，同時地鐵都到站，我同Figo上車。
啊峰走左之後Figo就無講野，dead air左。你問我尷唔尷尬？我本身就唔算太多野講，何來尷尬？
良久，Figo問我：「你想食咩啊？」
「我今日有少少想掃街，不如去旺中掃下？」今日有d想食旺中d小食。
「好啊，我少行旺中，你帶我去食好西，嘻嘻。」Figo聽到我咁講似乎無頭先個種尷尬感。
到左調景嶺就轉車去觀塘線。相信大家轉車既時候，都會遇到d大媽或者啊叔係尻衝去另一架車到霸位坐。無錯，無論係咩轉車既站都會出現呢種情況，
包括我身處既觀塘線。不過我有無位坐都無所謂，所以慢慢行入車廂，搵左個企位，Figo就企左係我面前。
佢同我既距離唔係差好遠，所以我望佢係要昂高頭望佢，條頸都咪話唔攰。

列車開出，油塘觀塘個d站就一定好多人上既，去到九龍塘站既時候就最多人，大陸遊客或者本地人都多，自然就爭先恐後趕上車，驚死呢班係尾班車咁。




Figo就係呢個時候企近係我面前，向我呢邊靠近，避免d人撞到我。開車個陣我失重心，成個人撲左係佢心口、雙手禁左係佢胸口。
「sorry啊。。」我唔好意思咁係去耳邊講左句。
「唔緊要，你無整親就得。」話畢，Figo就順勢攬住左我。我呆左呆，然後將雙手放係佢腰上面攬返住佢。
我感覺到Figo聞緊我頭髮既味道，我僕係佢心口既期間都聞緊佢身上屬於佢既味道。呢一刻雖然身處係非常擠迫既地鐵車廂入面，但我同Figo就好似令到整個氛圍非常曖昧。

雖然係咁，但大家攬住大家呢個狀況只係持續到下一個站開門既時候，逐漸有人出車廂，而我就昂高頭望一望Figo，佢都咁岩望住我，眼神曖昧，看似有情。
但最後都係慢慢鬆開手，回歸一開始既狀態，好似當咩都無發生咁，曖昧氣氛仍在。


旺角站。

「呢邊啊，傻佬。」Figo落車就行錯左離電梯較遠既方向，我笑一笑佢就拉一拉佢手臂，叫住左佢。
「係wor。」佢好似仲有少少尷尬咁樣，我拉住佢手臂行到電梯口面前就鬆開左手。
但搭電梯就係我認為最尷尬既時候，除左男朋友之外，我同所有異性企係電梯上面都會有啲尷尬，因為唔知講咩好。就算有人認為我成日同男仔出街都好啦，
呢個狀況我暫時都係未諗到方法解決。




星期六既旺角地鐵站無論月台上、電梯既人龍又或者大堂上面都係咁多人，好似每一日都無減少過咁。亦都因為咁樣，出閘前後，Figo都拉住我行，好似驚我走散左搵唔返咁，
氣氛再次變得曖昧起黎。直至上到地面，佢先慢慢鬆開手。

「行快啲啦，我好肚餓啊。」我用少少撒嬌既語氣講，然後又拉住佢手臂行入旺中門口。
一入到去，不出我所料，又好多女仔都望住佢，好似雙眼發光咁樣。
「又有好多人望住你wor男神。」我笑住調侃佢。
「雖然你笑係好好睇啊，但唔好再潤我啦。」佢用少少委屈既語氣講。
「你今日好似同平時返學唔同，多野講左。」佢再講。
「可能有得出街心情好個人咪多左野講。」我望住佢講。
「咁以後我多d約你出黎啦，嘻嘻。」佢呢一句其他女仔聽到可能會好開心，我都開心，不過我諗我開心既點同其他女仔唔一樣。
「好啊，等你約我架啦。」睇黎將會係一場戰爭。


去過旺中都會知舖與舖之間都係得好少位置，加上人流多，一定係逼住曬，寸步難行，但即使係咁，都無減少過Figo俾人望既情況，依然好多女仔會望佢，
大部分都係啲一齊出街既女仔。同佢一齊行唔多唔少都有啲優越感，不過唔多，可能我日日返學都見到佢，覺得佢無咩特別。。




「你想食咩？我幫你買。」佢問我。
「我想食麻辣涼皮，要小辣。」我順手俾左三十蚊佢買。佢示意ok。

「麻辣涼皮到。好似好正咁wor，我又要食～」佢講完已經自動打開口示意我餵佢，我亦都好順手就餵佢食。
「都OK wor，你成日食架？」Figo問我。
「無啊，好耐無食喇，無人約我去街啊嘛。」我語氣帶有暗示。
「好好好，我多d約你去街好無？」佢就好似氹女朋友咁樣氹我。
「嗯～」呢一刻似情侶但非情侶。
「我仲想食炸雞啊，係呢邊。」我野都未食完就想拉佢去買。
「食埋先啦傻妹。咁心急，你邊有咁多手啊。」Figo拉住我唔俾我邊行邊食。
「睇唔出你都係吃貨wor，唔知你可以食到幾多野呢。」佢有少少揶揄我。
「咩啊，咁肚餓啊嘛。我仲想買野飲啊。」我開啟左吃貨模式，哈哈。
「咁你快啲餵埋我先啦，啊～」佢又張開口叫我餵佢。我快快手餵完佢之後就掉垃圾，然後拉左佢去賣小食既店。

「唔該要半份香蒜炸雞。」我無等Figo就尻衝左去買炸雞。




「哇你唔等我架，淨係買自己個份。」佢有少少扁嘴咁。
「我諗住share食啊嘛。」我唔介意自己食曬既你咁講。
「係咩，sorry囉誤會左你。」佢語帶少少委屈。
「好似你仲唔開心過我wor。」我笑笑口講。
「係啊，所以要氹。」佢帶點小期待。
「想點氹先？」
  要開始了？