[無糖故]我既女神係樂隊既主音: 第六章

星期六嘅朝早，風和日麗。

十二點正。

「Hello。」我望一望眼前嘅慧，簡直係眼前一亮。

慧著住件白色嘅連身裙，褸住一件紅色嘅短袖外套，下身著左條黑色嘅緊身長褲，加對粉紅色嘅波鞋。
佢放左佢長及肩嘅頭髮，化左淡淡嘅妝。

「好可愛。」呢個係我心入面嘅諗法。





「你諗住去邊度買？」我問慧。

「跟我黎啦，呢頭有間樂器鋪啲野平靚正。」慧邊行邊講。

我地行左一陣，就見到一間小商場。

「入黎啦，間野喺入面。」慧。

「叮叮」





去到商場二樓嘅轉角，我地行入左一間樂器鋪。入面雖然唔大，但係都有幾多樂器，而木結他就佔最多。

「話時話，你想買電定木？」慧問我。

「木啦。我鐘意玩木結他多啲。」我拎起一把木結他，求其掃左幾下。

「客人識貨喎，呢支結他上個月先喺日本運過黎，靚野黎架，聽下啲音色，幾清脆。」老闆同我搭嗲，可能因為我同慧係呢間鋪唯一嘅客人。

我望一望個價錢牌，成$2200，嚇到我即刻擺返好。





「ehh。老細，我係初學者黎嘅，唔知有冇啲有平又岩新手玩嘅木結他呢？」我決定問老細意見。

「嗱，呢枝啦，呢枝美國野，價錢平民化，音色都還可以，幾岩新手玩。」老細拎左一枝啡黑色嘅木結他出黎比我睇，「彈啲簡單嘅譜其實呢枝真係幾好，」老細行近，喺我耳邊細細聲講，「用黎冧女朋友一流呀！」

我望一望喺度望緊鋼琴嘅慧，笑左一笑就話「好啦就呢枝啦。」，跟住就拎左五百蚊出黎。

「多謝幫襯！祝你早日練成結他，彈比女朋友仔聽～」老細笑笑口咁望住我同慧。

「慧，買完啦。」我拍一拍慧嘅膊頭。

「哦係呀。咁不如去食野啦，我仲未食晏呀。」慧講完就行左出鋪頭。

「我地依家算唔算約會緊？」我無端端起左呢個念頭。





「諗咁多做乜。」我細細聲講左句就跟住慧去食晏。

－－－－－－－－－－－－－－－－－－－－－－－－－－－－－－－－－－－－－－－－－－－－－

「咁你之後諗住點？搵人教你？定自學？」慧咬住魚柳包問我。

「應該搵人教。搵到之前自學下咁囉。」我拎起條薯條，擺左入口。

「你想報果啲結他班定係搵識嘅人教你？」

「最好就梗係識嘅人啦。」

「可惜我又唔識人係教結他嘅，唯有你自己去搵啦。」

「咁我搵人教我結他，你搵貝斯手同鼓手，ok？」





「有啲難度喎，我識人有限。」慧扁一扁咀。

「不如咁啦。我地要比啲目標自己，」我飲一啖可樂，「今日二月十七號，我地要參加今年聖誕聯歡會嘅sing con，當然果日之前要搵齊人夾band，我亦都要練好結他啦。」

「好呀。」慧一啖放左四份一個魚柳包落口，「我地陣間就去旺角行人專用區，睇下有冇band show，等我地偷下師。」

「一於咁話啦。哈。」我望住成口魚柳包，塊臉漲卜卜嘅慧，不禁笑左出黎。
「食完就行啦。」我等慧食完，就拎埋枝結他行出M記。

－－－－－－－－－－－－－－－－－－－－－－－－－－－－－－－－－－－－－－－－－－－－－

依家係晏晝兩點。藍天白雲。

一路行行人專用區，我都覺得我同慧好似一對拍緊拖嘅小情侶咁。





但係我地都見唔到有band show。

「睇下果邊！果度係咪有band show？」慧拍一拍我，指住前面一堆拎住樂器嘅人。我地即刻行過去睇。

「大家好呀！我地係Dreaming Birds。今日係我地第一次喺街頭演唱，希望大家可以花少少時間，欣賞下我地嘅演出。」睇落似係主音嘅人一頭紅色長髮，拎住電結他，成個hide咁。「就等我地隊員介紹一下自己先，我係主音同電結他手嘅Donovan，呢位係...」

「咁我地開始喇，我地唱嘅第一首歌，係Beyond嘅光輝歲月。」主音介紹完隊員之後，開始演出。

http://www.youtube.com/watch?v=Fq6gZBTwPFk
.
.
.
「鐘聲響起歸家的信號 在他生命裡 彷彿帶點唏噓





黑色肌膚給他的意義 是一生奉獻 膚色鬥爭中

年月把擁有變做失去 疲倦的雙眼帶著期望

今天只有殘留的軀殼 迎接光輝歲月

風雨中抱緊自由 一生經過傍徨的掙扎

自信可改變未來 問誰又能做到...」
.
.
.
呢位主音雖然冇家駒演繹得咁激昂感慨，但歌聲都幾細膩。的確係合格以上嘅演出。

「...問誰又能做到......」
「....」
「多謝大家。」主音鞠一鞠躬。

「拍拍拍拍。。。」零星嘅掌聲響起，我一望，呢個咁精彩嘅band演出，喺星期六嘅晏晝，只有寥寥十幾人有企喺度睇，但係主音都好似唔介意咁，繼續佢嘅第二首歌。

「喺香港，唔通夾band真係咁難得到關注..？」慧對住我講，眉頭輕輕一皺，「如果女仔做主音，咁咪更加..」

正當我想回應慧嘅時候，一段前奏響起。

「跟住落黎果首係五月天嘅倔強。希望大家聽完呢首歌，會同我地一樣，繼續堅持住自己嘅夢想。」

http://www.youtube.com/watch?v=R2s-H_crYkc
.
.
.
「當 我和世界不一樣 那就讓我不一樣

堅持對我來說 就是以剛克剛

我 如果對自己妥協 如果對自己說謊

即使別人原諒 我也不能原諒

最美的願望 一定最瘋狂 我就是我自己的神 在我活的地方

我和我最後的倔強 握緊雙手絕對不放

下一站是不是天堂 就算失望不能絕望

我和我驕傲的倔強 我在風中大聲的唱

這一次為自己瘋狂 就這一次 我和我的倔強...」
.
.
.
「...多謝大家。」主音再次鞠一鞠躬，感謝在場嘅觀眾。

我望一望慧，發覺佢嘅眼神有啲唔同左。

「喂慧，」我拍一拍慧嘅膊頭，「唔好諗多餘嘅野啦。愈難達到嘅夢想，就愈有實踐嘅價值丫嘛。」

慧望一望我，笑左一笑，用力咁點一點頭，就繼續聽果隊band嘅演出。

「之後係我地嘅第三首歌..」

－－－－－－－－－－－－－－－－－－－－－－－－－－－－－－－－－－－－－－－－－－－－－

搭小巴返屋企嘅途中，我不斷回想起果隊band嘅演出，當然仲有慧嘅笑容。

我地聽到由頭聽到果隊band完show，聽到四點，先各自返屋企。

「愈難達到嘅夢想，就愈有實踐嘅價值..估唔到我會講埋啲咁嘅說話，哈。」我望一望枝結他，「我都要達成我嘅夢想先得。」

「我同你講左幾多次？你唔好阻住我打鼓得唔得！？？」突然我隔離果位兄台對住電話怒吼，嚇左我一嚇。
「我日日又去BAND房練鼓，為嘅就係黎緊個SHOW，你依家話唔比我去！？」我望清楚果個人，佢留住中長髮，著住件黑色皮褸牛仔褲，睇得出好大隻，但外貌佢睇落十六，七歲到，把聲又好響，聽落好有中氣，一睇就知有好多能量係身體入邊釋放唔到出黎咁樣。
「人做老母你做老母，邊有人老母會阻止自己個仔個夢想架！？我都廢事同你講！」講完呢句，果位人兄即刻cut左線。
「都痴撚線！屌。」

「呢位阿哥，唔知我可唔可以問下發生咩事？」我過去搭嗲。

「你邊位呀？」佢好似好不悅。

「我岩岩聽你嘅對話，好似聽到你係打鼓嘅，係咪？」

「做咩咁問？」

「其實呢，我依家就搵人夾緊band，係差鼓手同bass，唔知你有冇興趣？」

「你都幾搞笑喎。」

「吓？」

「你又會無端端喺小巴搵個唔識嘅人夾band嘅？」

「....」我無言以對。

「但係，又唔係唔得嘅。」

「姐係？」

「我都一直搵緊一隊band係差鼓手嘅，咁岩我又搵到一隊未有鼓手嘅band，佢地話咩要喺公開試之前演出一次，所以咪搵埋我。佢地應該玩埋今次就唔玩，去讀書架喇。」佢望一望我，「如果佢地真係唔玩，我又冇得打鼓架喇。如果你地又真係差個鼓手嘅，可以搵埋我嘅。」

「既然係咁，不如比你個聯絡電話我？」

「好。比你電話我。」我比左部電話佢，佢按完一輪就比返我。
「我叫賴家齊，叫我阿齊就得。」

「我叫李頌希，叫我阿頌啦。」

「如果你地搵埋bassist嘅，就call我啦。我落車喇。係咁。」講完，阿齊就落左車。

「咁，依家就只係差個貝斯手。」我望一望阿齊嘅電話號碼。