女兒，希望你能彌補我的遺憾: 第十五節 - 下一個她
「Ronald, 聽講你生左個女wor，宜家係邊度做野啊？ 」去飲宴最尷尬的就是一班大家互相認識、但又很久沒聯繫的人，為了避免冷場去刻意找話題。
「係啊，兩歲啦，開始跑來跑去，好活潑。」
晚宴在這種膚淺至極的對話中步向尾聲，一對新人和雙方家長都在會場門口準備送客，恭喜之聲此起彼落，我亦隨著大隊緩緩步向大門。
「恭喜Uncle， Auntie。Auntie 今晚好高貴啊。」迎面而來是阿恩的父母。
「多謝啊Ronald。招呼唔到啊，你咁多年個樣都無咩點變過。女女幾大啊？」一句話就能令Auntie 開懷大笑，女人就是愛聽恭維的說話。
「兩歲啦，開始跑來跑去，好活潑。」女兒今晚應該不停打噴嚏，不停被我提著。
「似你wor，鍾意做運動。」
「係掛，哈哈哈，得閒搵你地飲茶，唔阻你啦，恭喜你地。」我跟著大隊繼續向前推進。
「恭喜你地，快d 生番個啦！等我個女有伴。」我跟阿恩說。
「唔會好似你咁啦，一結婚就生，二人世界一輪先啦。」阿恩仍然這麼的愛取笑我。
「寸小我一陣都唔得ga wor..」
「唔得架，唔會讓你ga..」
「唔同你玩啦，祝你地以後都開開心心啦！」不知道阿恩有沒有將我的真正身份告訴他，不過所有事都俱往矣，有沒有都不再重要。
突然間，有人拍了我的肩膀一下。
「Ronald， 阿恩都有請你啊？」原來是話劇社的阿發，阿恩安排她坐另一圍，所以整晚都沒看見他。
「係啊，你呢排點啊？睇你IG好似你都就快結婚啦，恭喜你先。」臨散席都要寒暄幾句，真麻煩。
「多謝多謝。我都係咁啦，仲係打政府工。你個BB點啊？」
「兩歲啦，開始跑來跑去，好活潑。」今晚的標準答案。
「話時話，我地上次見你有無五年前啊？係東京撞到你同你老婆拍拖嘛。」
「係啊，係啊，有四、五年啦。不過，果個女仔唔係我宜家個老婆。」幸好太太不在場，否則一場大屠殺在所難免。
「唔好意思，搞錯搞錯。走先啦，下次約埋其他人出來飲野。Bye」
討厭的阿發，亂說一通後就離開了。難得可以放下阿恩，又無故被提起四五年前的事...
———————————————————————————————————————————
「你班黑警放開阿琳啊，有咩就拉我，我同你地死過！ 你班仆街冚家鏟，淨係識蝦女人，夠膽你唔好放TG，過來同我隻揪。」
「Ronald，你走啦。我叫劉曉琳，身份證XXXXXX，我唔會自殺架....」
「唔好啊！阿琳....」
「做咩事？阿琳係隔離房訓緊覺啊。」太太在旁邊驚慌地說。
「我發惡夢，見到阿琳比黑警拉左，無事啦，繼續訓啦。」我驚魂稍定下來。
「d 黑警咁過分，兩歲小朋友都拉？」太太問道。
「唔知架，宜家d黑警，仲有底線架咩，無人性架。」
「係姐，都唔會拉兩歲小朋友既...」
「發夢既野，邊有話合唔合理架，我過去bb房望一望先。」
我立刻跳下床，離開房間，不僅為了查探女兒的情況，更重要的是要盡快完結對話，避免被她識穿真相 - 在夢中被黑警拉的不是小女恩琳，而是另有其人...