女兒，希望你能彌補我的遺憾: 第二節 - 桃花依舊 人面全非
星期五，晚上八點，我準時在她的公司樓下等她。在車上呆坐到八點半。終於，她來了。
「唔好意思，啱啱個client 單case 好麻煩，佢又長氣，一陣食飯我請。」她急步踏上車。
因應她的身份，她穿的比較老成，臉上的濃妝下亦漸漸浮現歲月無情的痕跡。
「梗係你請啦大律師，又遲到，又要派炸彈炸我！」我道著。
「你結婚都有炸我啦，今次打番和啫，食咩啊？」
「我book左你鐘意果間Sushi啦。」
「咁好，仲記得既，咁快d去啦，我好肚餓啦。」
————————————————————————————————————————————————————————————
「你仲有請邊個中學同學啊？」鏡頭一轉，回到壽司店內，我倆已經在大快朵頤。
「唔係好多咋，阿發，阿強同阿傑囉，我擺十圍咋，你估好似你個世紀婚禮咁咩？」阿恩仍是「寸寸貢亅，我對著她仍舊是毫無還擊之力。因為我結婚時確實在四季酒店大排筵席，足足五十圍…
「咁結婚之後住邊啊？」
「同你一樣，搬去外家同人地父母住囉！」我狠狠地再中一槍。
我這樣強悍 我這樣硬朗 我對著你那輕佻 怎麼不懂反抗
別笑我 我犯賤 被嫌棄 也像蜜甜 別勸我 我自願
下來這條賊船 別理我 我犯賤 被磨折 也是自然
「係啊，你快啲生番個BB啊，唔係無得分身家啊！」自嘲，永遠是最好的化解方法。
「咁又要同你學下啦，結婚半年就有左，跟住就唔使番工，做姑爺係屋企湊女。」她得寸進尺地咄咄逼人，這次我故意面有難色，試她反應。
「好啦，講下笑啫，咁熟都唔玩得，阿女點啊？」她意識到不妥，立刻釋出笑容來。其實，我又豈會忍心嬲怒你呢。一來，這種吵吵鬧鬧一向是我們的溝通方法，二來，你說的全是事實…
「幾好啊，健健康康，日日跑跑跳跳咁，番下playgroup， 聽下音樂咁」
「聽咩音樂啊？」
「無特別，都係啲鋼琴，小提琴果啲，總之咩都聽下咁啦。」我刻意不將真相道出。
「記住教下佢讀書認字啊，唔好學踢波！好似你咁，粗魯到死！」放心吧，我將所有希望押在她身上，我一定會讓她好好成長。
歡樂既時光過得特別快，你一言，我一語，互相挖苦一番下，好快又係時候講拜拜。
「你仲有無下場？如果無就車你番屋企啦？」我問道。
「有司機車我，梗係坐啦！」
————————————————————————————————————————————————————————————
「你好似咁多年都無車過我番屋企喎。」轉眼間已在送她歸家路途上。
「同你分手果陣時，我仲讀緊Year 2，車牌都未考到，邊會有車送你啊，姐姐。」是的，其實我們十多年前已分手...
「又係喎，以前成日坐電車，跟住行番屋企。」她的家在天后廟道，在英皇道那間新酒店隔壁可以走樓梯上去。
「咪成日話當年啦，比你老公知道你仲記住以前d 事，我驚去飲果陣比人拖入廁所打啊！」口裡說不，身體卻很想她繼續說下去。
「你估個個好似你咁小器咩，去飲你果餐果陣，你老婆見到我都好nice 啦。」我根本沒有向她提及過你，她當然不會對你有任何反應呢。
「到啦，快d上樓啦，番到去whatsapp 我啦。」
「ok，你都返去陪女啦，下次就wedding 果晚見啦！」作為一個正人君子，有婦之夫，我是不會胡作非為的。送她回家只是送到她樓下，沒有大家所想的甜故，甚至連goodbye hug 都沒有。
回想當年的往事，
大廈外的鐵閘，閃閃發光，電梯前的青春少艾，身穿旗袍校服，笑容可掬地對我揮手，甜蜜地跟我道別。
時移世易的今天，
同一趟的鐵閘，鏽漬斑斑，電梯前的高貴少婦，一身成熟打扮，莞爾而笑地對我揮手，親切地跟我道別。
下次再會的時候，
宴會廳的大門，徐徐打開，送客中的高貴新娘，披著高貴禮服，滿面春風地對我揮手，珍重地跟我道別。
正當我開車打道回府之際，Spotify 一再好像懂得配合我心情來播放歌曲
十年前即使拼命遷就
十年後相信亦會分手
任哪一段時候 不可擁有 永遠最美麗最優秀
愛情甜酸苦得我 自己感受 照亮長夜最後
只有白晝 不必強求 誰救我不如自救
我決定取道山路回去淺水灣，回家前有一個地方想去...
夜深之時，天后廟道，大坑道，黃泥涌道，車輛都不多，只需十分鐘，就到了目的地 - 黃泥涌水塘公園。
我和阿恩以往來過幾次，玩著名的水上單車，可惜這項活動在數年前已無聲無色地成絕唱。這還不是懷緬那動人時光的最佳位置嗎...
那動人時光 不用常回看
能提取溫暖以後渡嚴寒 就關起那間房
最動人時光 未必地老天荒
難忘的因你太念念才難忘
容易抱住誰十年 最難是放