《如果你見到呢段字，救我！》: 後記

【後記】

又去到我最鐘意寫嘅後記，因為咁樣代表我已經成功咁寫好一個故事，雖然只係半短故，寫得二萬幾字同係連登連載咗11日，但短短時間亦好空虛，因為要同大家暫別，希望未來嘅日子可以好快見到你哋。

我係第一次寫比較懸疑嘅故事，故事嘅靈感係源自於打機，我以前玩the sims都成日諗，如果遊戲入面嘅人其實係有生命，咁會點呢？有時候，亦覺得人生同遊戲無分別，同樣都係翻工賺錢咁悶，種種諗法最後都推動我動筆寫呢個故事。

今次亦係第一次係連登寫故，坦白講，自己亦都係唔少連登作者嘅Fans，今次身分轉換，的確係好特別。同時，我亦揾到係連登講故台連載嘅吸引之處，因為可以同讀者有交流，可以知佢哋對呢個故事嘅諗法評價等等。呢樣同紙言有好大分別，紙言就好似孤軍作戰咁，永遠唔知讀者真正諗法，所以得到大家回應同正評，係我最開心嘅事。

作為一個鐘意文字同寫故嘅人，唔單止希望其他人鐘意自己故事，更加希望對方可以從中有共嗚同啟發，呢樣係我認為最難做到，畢竟要影響一個人經已好難，更何況係乏味嘅文字？





最後，我知道自己係內容同文筆上有更大嘅改善空間，我會努力改進，萬分感激你哋㩒入嚟睇呢個故，我哋下次見！

有興趣嘅朋友可以Follow我IG、Fb，
嚟緊會寫啲短文上去。

FB:卡里
IG:curry_car