《如果你見到呢段字，救我！》: Day 11

Day 11

今日係德利明死忌，我眼白白睇住佢當場死亡。

原來死亡可以好接近，無奈嘅係我哋咩都做唔到。

今朝起身覺得神志清醒，仲可以控制自己，於是心情舒暢咁去煮個靚早餐食，順便係窗口偷望下德利明狀況。

點知，當我放眼望去，就目擊到佢觸電一刻。佢全身黑到同炭無分別，髮型變成爆炸頭，全身衫褲燒到穿咗，隨即倒地昏迷。





我即時跑去營救佢，但由於我無鑰匙，根本就無辦法入去，嘗試過踢門，可惜踢極都開唔到，電光火石之間，我諗到可以打爆窗口玻璃入去。

當我辛辛苦苦入到去，已經見唔到佢屍首，相反，只係剩低一部熏黑嘅電腦同埋一甖骨灰，上面刻畫著德利明個名，死因為觸電至死。

一部電腦要漏電、電流強到令人觸電至死，兩樣事件同步發生嘅機率到底有幾高？

唔通真係避唔過要死嘅命運？

都係唔好諗咁多，處理佢身後事比較重要。





早登極樂，我一定會完成你交代落嚟嘅遺願，我暗忖。

我捧著德利明骨灰，打算帶佢翻我屋企，並係草地安葬，令佢無咁寂寞。臨走前，我回望佢間屋鞠躬致敬，卻發現側邊多咗一個招牌。

現正招租。

奇怪？我之前都無見過呢個牌，唔通有人一早知道佢會死？或者只係我多疑，佢預先知道自己會死，所以寫定？

但咁樣解釋似乎有啲牽強，最後決定翻屋企再好好推敲。





「What the HELL？」間屋外牆無緣無故熏黑咗，門口仲有煙冒出，唔通......

我馬上衝入屋，見到廚房同地獄無分別，四處都係熊熊烈火，火勢仲開始蔓延到其他地方。

我記翻起，由於頭先趕住去營救德利明，乜都無理就出門口，所以份早餐仲開住火煮緊，亦引發火燭嘅局面。

我當機立斷，即時攞滅火筒滅火，但我萬萬都估唔到，喪屍病毒會揀喺呢個時候病發。

「我」不單止無滅火，仲衝入火堆入面。

「啊啊啊啊！」喪屍人格嘅「我」慘叫。

雖然意識被搶奪，但我都同樣能夠感受到被火燒嘅感覺。

恰好，長期無翻屋企嘅女終於翻嚟，佢見到呢個情形，嚇到對住我同堆火大喊大叫。





我唔可以死。

呢個係我最後嘅意識，之後已經痛到無咗記憶。

好似過咗好耐好耐，我先有翻意識同控制權。一開眼，發覺自己瞓係梳化上面，周圍嘅擺設都唔似天堂地獄，都係屋企啲傢俬嚟。

我即刻望下雙手，竟然係完好無缺，完全無燒傷嘅疤痕，唔通頭先發生嘅事都係幻覺嚟？

「安先生，我哋幫你滅咗火，下次小心啲啦！」身穿滅火裝備消防員對我講，說罷，佢哋就上車離開。

消防員？係喎，阿女當時係度，應該係佢幫我叫消防車，好彩唔洗等39分鐘咋，唔係就死咗十世。

等等，有消防員到場的話，證實火警係真嘅。咁點解我會絲毫無損？唔通喪屍皮膚係特別構造？





不過，雖然我外表睇落完全無事，但一起身就感覺到全身乏力，個人好唔舒服同心情暴躁，直至沖完涼同食嘢，身心先回復正常，算係執翻條命。

臨瞓前，我重新整合一下今日發生嘅事。

首先，德利明一死，間屋就出現「現正招租」嘅招牌，唔排除係佢一早放租，但都有可疑之處。

其次，喪屍人格有所進化，佢哋智商提高咗，唔會再強行控制我，而係喺適當嘅時候先會用盡方法去整死我。

第三，喪屍皮膚似乎有抗火性嘅能力，唔會令人燒傷，但釀成內傷。

可惜德利明離開咗，有好多疑點想揾人一齊分析都唔得，剩低我孤軍作戰，今日仲差啲死埋，聽日真係要小心行事，唔好再重複今日嘅錯誤。