［愛情甜故前傳--無糖純愛］曾經嘅我地，都係兩條平行線⋯: 83. 各自的心意

「吓…？你講咩呀…」方芷諾似笑非笑地反問咗一句

「就係字面上嘅嘢囉，你係咪仲係中意佢啫？」李靜愉再問多一次

我聽到之後不禁握緊咗拳頭，感覺到手心有少少濕，我格外專心咁聽佢地講嘢

今次方芷諾又靜咗落嚟，佢係咪猶疑緊？定係只係諗緊點樣答…？

「唔係呀…」良久，方芷諾回答李靜愉嘅問題，「冇中意…佢都拒絕咗我啦唔係咩…？」





企喺門邊嘅我聽到方芷諾嘅回答，不禁有啲心痛，有啲難受，我心中好想話比佢知我想收回我嘅拒絕…

「佢都話佢一世都唔會中意我啦…我仲有咩理由去繼續中意佢、追逐佢嘅身影…？」方芷諾又講道

聽到方芷諾咁樣講，我嘅心更加係狠狠地揪咗一下，原來佢一直都冇唔記得，佢一直都記住…

「唔係…唔係咁㗎…」我喺心中解釋，「我收番我之前講嘅嘢，因為我中意你…！」

千言萬語在心頭，但我一句都講唔出，呢啲說話就好似卡咗喺喉嚨一樣講唔到出嚟





勇氣，可以喺一瞬間凝聚，亦可以喺一瞬間消褪…

我鬆開咗本來緊握著嘅拳頭，我連行入去同佢講一聲「對唔住」嘅勇氣都冇…更加唔好講要同佢講我中意佢

「葉子朗！你決定咗要表白就要去！行入去！」我喺心中對自己吶喊道，「行入去…！鼓起勇氣行入去就得㗎啦，葉子朗，你鼓氣勇氣好唔好？就好似當初你拒絕佢一樣同佢講！」

我企喺門邊，心中百感交集似的…我不斷叫自己行入去，但係雙腿連邁步行入去嘅勇氣都冇…

葉子朗…你到底喺度做咩…明明只要好似當初拒絕佢同佢講清楚一樣





…

「冇中意佢…」我對靜愉講咗一個大話，「佢都拒絕咗我啦唔係咩…？」

我心入面其實…對葉子朗仍然抱有一絲好感…我知道，其實我冇完全死心

只不過想比個借口自己死咗條心，唔好再對葉子朗抱有好感，因為就算我再點樣有好感都好，佢都唔會有中意我嘅一日

我望向靜愉，用力地壓抑着自己嘅心事努力微笑

「真係？」靜愉好似唔太信我，「真係唔中意？最後少少嘅感覺都冇啦？」

靜愉輕皺起眉頭，一臉疑惑咁問住我

「嗯，唔中意啦。」我好艱難咁先可以用肯定句回答





你可能會話，我就算厄到人，但都厄唔到自己，感覺呢樣嘢唔係話冇就冇

我知道…我真係知道，但我希望，方芷諾會死心，唔再中意葉子朗

我希望我會死心，唔再…中意葉子朗…

其實我要多謝葉子朗先啱，多謝佢嘅絕情，令我決心要死心；多謝佢出現喺我嘅青春中，即使我同佢之間留下咗一道難以忘記嘅傷痕，但我冇後悔識咗佢

「好啦，走啦～」我裝作若無其事咁對靜愉講道

我同靜愉行出課室，今日係最後一日可以見到葉子朗嘅日子，最後冇見到佢真好…

如果佢聽到我內心嘅說話，咁我就要承受再一次比佢拒絕嘅痛；如果佢聽到我喺課室講嘅嘢就好，至少佢會知道我唔會再係一個令佢困擾嘅事





山有木兮木有枝，心悅君兮君不知

再見啦葉子朗，我對你嘅心意你唔會有知道嘅一日，我同你又一次變番平行線，希望下年我地唔會同班…

…

「呼…好險…」我行咗去樓梯上咗半層匿埋咗，一聽到方芷諾同李靜愉講話要走，我就即刻跑走咗

我唔想佢知道我喺門外聽住佢講嗰番說話，如果佢行出嚟嘅時候見到我，佢會以一個點樣嘅表情面對我？

會係笑一笑，然後假裝若無其事咁同我講一句「拜拜」？定係佢會當咩事都冇發生過…？

呢一刻嘅我，覺得自己好失敗

明明有機會可以道歉，就算佢咩反應都好，只要即刻同佢講一句對唔住就夠，我點解要走？我怕緊啲咩？





「我為嗰一日嘅事同你道歉。」只係一句咁簡單嘅說話，點解我會冇勇氣講？我連企喺課室門口面對方芷諾嘅勇氣都冇

我真係覺得自己好失敗！葉子朗你真係好失敗呀！

今日係散學禮，係學年嘅結束，我冇道歉，亦冇講出自己嘅心意

暑假開始啦，代表住要迎接高中生活嘅來臨，亦代表住我要等呢個漫長嘅暑假過後先會再見到方芷諾

我希望…

「下年可以同方芷諾同班！」








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link