［愛情甜故前傳--無糖純愛］曾經嘅我地，都係兩條平行線⋯: 74. 她的名字

今次係我第一次真正咁中意一個人，對一個人有好感…我唔知道呢份感覺可以維持幾耐，但至少而家我喺心裏冇否認對方芷諾嘅感覺

「葉子朗你真係冇中意嘅人？三年嚟都冇？」Wilson一臉認真咁問道

「冇。」我一如既往咁回答，用嗰個平靜嘅聲線，我口不對心，回答嘅同時，心裏又答：「有，今年有中意嘅人…」

但呢個答案我冇辦法講出口，我只可以將呢個答案收喺心嘅深處，縱使，我嘅眼神裏已經不禁流露出一啲特別嘅情感，但我都只可以裝着同普通人一樣，用平常心去看待呢個女仔，縱使心裏已經牽起洶湧嘅巨浪，濺起無數嘅浪花

我曾經有過表白嘅心，但我始終都唔敢去表白，或者係因為我冇膽，或者真係因為我冇勇氣同佢表白，又或者…真係因為我對佢講過嗰啲過份嘅說話…





每一次抬起頭望向方芷諾，我就愈諗唔明點解自己當初會揀先一步拒絕佢，明明佢身上有九十九個優點，但我眼裏好似只見到佢一個缺點而選擇拒絕，而唯一嘅缺點，大概就係當時嘅我唔中意佢

每一次朝早喺番學嘅路上見到佢，我都好想好想鼓起勇氣行上前同佢講：「早晨！」，想喺佢嘅腦海中刻劃一個唔同形象嘅葉子朗

每一次放學見到佢，我都想行過去小食部行到去佢嘅身邊，自然咁同佢講：「你今日又留喺度做功課呀？」，想行去飲品機，扮作唔小心㩒多咗一包嘢飲然後當請佢飲

每一次聽到其他人提起「方芷諾」呢三個字嘅時候，我嘅注意力都會自然地被吸走，耳朵都偷偷豎起專心地聽着，我想去了解方芷諾…

我想知道關於方芷諾嘅事，想知道、想了解方芷諾嘅想法；想了解佢嘅習慣多一啲；想同佢有共同嘅話題，想知道我同佢有咩相似嘅地方





但宜家呢一刻嘅我更想同佢拉近距離

…

「Time’s up, put down your pens.」監考老師望住時鐘，喺秒針踏正12嘅時候便嗌道

我去到最後一刻先停筆，今次係我第一次Check卷，我之前做完之後就唔會再理份卷，將份卷就咁放喺隔離就算，然後就托住頭發呆

我聽到監考老師叫停筆之後就放低原子筆喺卷嘅隔離，今日考嘅係英文，英文我淨係溫咗Grammar，除此之外關於英文嘅嘢我就冇再溫過





英文呢科我都唔敢講我考得好定唔好，識唔識做，因為都做Reading都冇Model answer咁，我都唔知我答得啱唔啱

坐我後面嘅嗰個男仔將試卷傳上嚟比我，我將我嗰份放喺面頭然後傳出去，終於都考完今日要考嘅嘢啦，朝早考咗Writing，考中史，即係最後嗰日會考埋Oral，所以英文科可以話已經考完

我喺櫈底抽番個書包出嚟，將啲筆放番入去筆袋，然後就孭起書包行出去排隊

「陣間買咩番去食好呢？」我一邊諗，一邊行出去課室門外列隊嘅位置

考試係最開心嘅時候，原因一定唔係我中意考試先，我之所以話考試開開心係因為考試可以放早，對之前嘅我嚟講一放咗考試就可以番屋企大覺瞓，不過對宜家嘅我嚟講，我番到屋企之後要溫書

我今日有啲想食米線，我行到去學校附近一間食店，叫咗一個米線外賣，之所以叫外賣係因為想要爭取時間，一邊食一邊溫書

聽日考嘅係數學，番去再做下題目就好，我希望聽日考數學嘅我可以有好嘅表現，希望我嘅努力冇白費

「42號！」等咗一陣之後，一個著住圍裙號阿姨拎住一個外賣行到店鋪嘅門口嗌道





我望一望我手上嘅外賣單，然後行去阿姨嘅面前，將張單遞比阿姨然後接過外賣，拎住個外賣就番屋企

「番屋企食完嘢，就溫書啦～」我心諗，雖然考完一科之後稍微輕鬆咗少少，但仲有幾科未考，仍然未可以鬆懈落嚟

我番到屋企，換番屋企衫之後坐低喺餐枱前食Lunch，順便睇一陣手機先，食完Lunch之後就要開始溫書，雖然上次已經一次過溫晒咁多課，不過都係再做下練習會比較好，都開咗個頭啦，就努力埋佢啦

「呼～」我食完Lunch，發泡膠碗入面只係剩番湯，我蓋番膠蓋，將膠袋綁番好之後就將佢地掉去垃圾桶

我行入房，喺書枱下面放嘅嗰一疊書中搵咗本數學書出嚟，因為最近溫過嘅書都放晒喺最上，所以只要拎開頭兩本書就可以見到數學書

我今日選擇喺廳溫書，感覺上喺房溫好似好易腰瞓咁，所以我決定都係喺廳溫








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link