［愛情甜故前傳--無糖純愛］曾經嘅我地，都係兩條平行線⋯: 71. 好奇

我打開IG，偷偷地將方芷諾嘅IG account開咗Notice，咁下次佢再po嘢嘅話，我就可以第一時間睇到

呀～好想快啲到聽日，好想可以快啲見到方芷諾

我隨便煮咗個麵食，然後就入房執一執枱同埋執一執個書包，今晚就早啲瞓聽日要用一個好心情番學

第二日一大清早，鬧鐘都未響我就已經醒咗，我悠閒地換上校服，行入廁所拎把梳將頭髮梳咗兩下，然後習慣成自然咁用手撥一撥頭髮，今日嘅心情好似幾好，我仲特登執好啲個樣先出門口，而且仲有時間食埋件三文治先悠悠閒咁出門口番學

番到學校同平日一樣上堂，我本來以為我今日嘅好心情可以維持一整日，但係點知去到Lunchtime嘅時候好心情就隨住一個人而變差，嗰個人就係隔離班嘅周樂恆





本來我仲耷低頭食緊飯，不過偶爾抬起頭嘅時候，見到方芷諾行入課室，同平日唔同嘅係有個人跟喺佢身後入嚟，我一見到佢，本來因為見到方芷諾而變得更好嘅心情一下子就塌咗落嚟

佢行喺方芷諾嘅隔離，嗰一個距離係我最想同方芷諾之間有嘅距離，兩個人可以一齊行，並肩而行，有講有笑咁…我都想我可以同方芷諾保持一個咁近嘅距離

我除咗感覺到美好嘅心情因為周樂恆呢個人而塌咗落嚟之外，我仲感覺到我又開始臭臉起嚟，佢點解成日都會出現喺方芷諾嘅身邊㗎？佢唔覺得自己成日都纏住方芷諾好煩㗎咩？

周樂恆明明就係隔離班嘅，點解次次派嘢都會派到過嚟我地班？佢嗰班得佢一個人咋咩？點解次次都要搵佢過嚟？見到佢一次就憎佢一次…我感肯定佢過嚟一定唔係純粹想派通告咁簡單囉！

分咗手就唔好再纏住人啦，係後悔嘅當初咪唔好講分手，分咗手先嚟覺得後悔有咩用？





「周樂恆做咩成日都過嚟我地班房嘅？」Wilson問咗我想問嘅嘢

「一定唔係派嘢拎嘢咁簡單囉～」徐思迪講咗我嘅心聲，佢兩個都特登壓低咗聲線咁講

「好似話佢仲中意…呀嘛。」余嘉偉都加入呢個對話，但佢冇講明人名，只係稍稍望向方芷諾嗰邊然後用眼神表達同時微微抬一抬下巴

「佢地唔係分咗手啦咩？」我望向佢地淡淡地講咗一句，因為我對呢個話題都有啲…唔係有啲，係好有興趣，不過我當然要假裝唔太在意只不過都搭下嘴嘅語氣講啦

「係，不過人地對我地班嘅仲有意思嘛！」余嘉偉真係學校嘅「八掛新聞台」嚟，講咩話題佢都知，我有啲懷疑佢上一世係女人嚟





「但問題係當初講分手嘅係周樂恆。」徐思迪嘅左腳搭咗出嚟走廊，身子傾前，壓低聲線細聲地講道

哦～即係分咗手又留戀人，想阻住人地發展新戀情啦！明顯地就係覺得人地唔夠好，然後同人地講分手，但分咗手之後又發現方芷諾嘅好

「嗰陣方芷諾有講過話係周樂恆要講分手，嗰陣有傳話係唔係方芷諾做啲咩所以周樂恆再中意都要講分手。」Wilson同徐思迪一樣向前湊近咗

「做咗啲咩呀？」我有啲好奇咁問道

「出軌、變心之類…」徐思迪一臉無奈嘅樣望住我，「葉子朗你真係從來都唔聽八掛嘢㗎喎…」

宜家咪聽緊你地喺度講囉，不過我覺得方芷諾唔係啲咁嘅人，方芷諾似係比人恰嗰類多啲，就算係變心都唔會係佢變，我覺得…

「但係佢兩個冇同人地提過佢地分手嘅原因，佢兩個分手嘅原因完全係一個謎。」余嘉偉忽然又開口講嘢，「佢地兩個都唔會提起分手嘅原因，就係咁樣先奇怪。」

「有幾奇怪？」我不禁開口問，有少少想為方芷諾護航，「唔中意咪分手，冇感情就分㗎啦，有咩奇怪。 」





「可能係個女嘅問題呢～」「我就話似係個男嘅有問題多啲。」

喺Wilson一咁樣講完，我就即刻反駁佢，方芷諾咁好嘅女仔又點會有大問題？係都係周樂恆有問題

「我話可能啫，你唔洗咁大反應喎～」Wilson見副我嘅反應有啲愕然，只好笑一笑

「做咩呀？你中意人咩？」徐思迪隨便咁笑言講道，但佢冇諗過呢句嘢會係事實

「唔係囉。」我坐番好唔望佢地，純粹想躲避佢地嘅目光，怕如果我有咩異常，佢地會睇得出，「只不過我覺得問題唔會喺佢身上。」

「仲以為你係咪中意人添～」余嘉偉都開我玩笑，伸手拍咗我兩下，「下下都話係周樂恆嘅問題。」

「痴線，我先唔係。」我當然要否認，我唔想比人知道我中意方芷諾呢件事，因為只要有一個人知，最後就會變成好多人知，然後最後嘅最後方芷諾都會知我中意佢





不過講真，我真係唔太中意周樂恆，佢憑咩同方芷諾行得咁埋？憑佢係佢前男友？定係只係借「再見亦是朋友」呢樣嘢繼續喺方芷諾身邊出現，繼續以朋友嘅名義中意人？




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link