［愛情甜故前傳--無糖純愛］曾經嘅我地，都係兩條平行線⋯: 69. 無聲吶喊

我將疊書放喺我坐嗰一格坐位嘅櫃桶入面，書包就放咗喺地下，淨係拎咗一支筆同本Science書出嚟放喺枱面

溫到5點半先再番屋企就差唔多啦，應該唔會再聽到隔離單位喺度鑽嘢嘅聲，啲牆好傳聲，佢咁樣鑽一鑽，我就咩都記唔到入腦，我唔想去到考試嘅時候諗到嘅唔係「滋～滋！滋！！！！！」嘅聲就係明明記得個答案但係去到答案去到中間就因為啲聲而打斷

「今日可以靜靜地溫書啦…」我喺心中默默講道同時掀開Lunchtim未溫完嘅嗰一頁，努力咁將書入面嘅嘢記喺腦入面

我托住頭背着書，有時會拎起筆轉兩下，有時會抬起頭望外窗外嘅街，有時會側住頭伏低喺枱面，有時會㩒開手機嘅螢幕睇一睇時間

講真嘅話手機都係一個好大嘅誘惑，但我好努力咁控制住自己唔好去睇手機，不過另一樣嘢就係我真係溫到攰攰地，企起身喺圖書館行下休息下先





我喺高櫈上落咗地，慢慢地行咗去一個最近我嘅書櫃，我企喺書櫃前面抬頭向上望，然後又向下望，最後喺我嘅視平線嘅嗰一層上隨手拎咗一本書落嚟，隨便掀開睇下

「邊有人真係會借呢啲書㗎…？」我將本書合上，望一望書脊，寫住「世界通史（一）」，本書仲要好似字典咁厚

我無言地一笑，準備將書放番上書櫃，就喺我將本書放上書櫃嘅一刻，放喺褲袋嘅手機震咗一下

我將本書放番上去層架上面，企喺原地拎出手機解鎖睇，原來係我媽WhatsApp我同我講佢今晚嗰煮飯，叫我自己買飯…等我仲以為會係邊個搵我添…

我望向手機顯示嘅時間，5點3, 我行番埋自己個位，將啲嘢執好諗住番屋企先再溫，今日見唔到方芷諾…





「佢應該喺小食部溫書啦…」我一邊將放喺櫃桶嘅書拎出嚟一邊細聲咁喃喃自語

方芷諾平時都會喺小食部溫書，以我平日留意到嘅，佢中意喺小食部溫書做功課多啲，而且聽佢之前同Friend講過話佢唔中意喺啲太靜嘅地方溫書，咁樣嘅話小食部對佢嚟講的確係一個好嘅選擇，我諗圖書館呢啲咁靜嘅地方佢唔會嚟

我孭起書包，拎埋啲嘢然後行出圖書館，喺學校嘅最頂層落番去地下嗰層，番到屋企之後先再繼續溫書

「唔知會唔會突然間見到方芷諾…」我一直行嘅時候喺度諗，如果可以咁啱撞到佢就好

心中無數次希望可以撞到佢，點都好撞到佢一次就好，但係我由7樓落到地下，呢個「願望」都冇發生，我心入面其實有啲失望





「都估到唔會見到佢㗎啦…」我喺踏出學校門口同時喺心中安慰自己

我都預咗唔會有可能真係見到佢㗎啦…邊有可能真係可以話見到就見到呀～如果係咁簡單就可以想見就見到佢嘅話，咁中六合彩應該都唔係一件好難嘅事

我拖咗沉重嘅步伐行咗出校門，行咗一段小路之後我停咗落嚟，默默地回頭望向學校嘅大門

「佢應該未出嚟，都未到5點半，佢又點會早走…？」我望住仍然緊緊閂上嘅學校大閘，冇人喺小食部行出嚟走向大閘，我嘅心裏又默默地加多咗一份失落感

「算啦…聽日都會見到佢…」我再一次喺心中講道，我又繼續行，偶爾不禁回頭望一眼，睇下佢會唔會就喺我嘅身後

不過，都係見唔到佢…算啦…都唔算係啲咩啫…算啦…

我番到屋企漸完涼次後，唔係第一時間去溫書，而係坐喺梳化望住天花板發呆

日日咁樣chur住自己去溫書真係好攰，好似冇咩明顯嘅成果咁，我已經覺得咁樣chur法有啲辛苦…但仲有兩日就考試





「要去溫書啦…」我壓低聲線對自己講道，但我好似要用盡全身嘅力氣先坐到起身一樣，「唉…但我咁努力有咩用？」

我坐咗起身兩秒都冇，然後就向左邊瞓又再一次灘番喺梳化上面…其實又係嘅，佢唔中意我就唔再中意我㗎啦，我咁努力讀書又有咩用？我同佢本來又唔係朋友，我又冇可能喺佢身邊令佢睇到我自己同對佢嘅變化，我咁努力又有咩用？

就算到時我成績真係好咗，我對方芷諾嚟講又會係咩？一個同班同學？一個佢中意過嘅人？一個拒絕咗佢嘅人？定係一個突然間喺成績上有進步嘅人…？我對佢嚟講都唔會變成啲咩好特別嘅人…

愈諗我就愈灰心，到底我可以改變到啲咩？佢會因為我成績好唔好而中意我？方芷諾都唔似係啲用成績去判斷一個人好壞嘅人，而且如果佢係呢啲人，咁佢之前又點會中意我…？

「呀…後悔…」我無力地吶喊道，「如果我早啲中意佢咪好…」

如果我早啲中意佢，一切就唔會變成咁，我宜家連行上前同佢講嘢都唔係好夠膽，每次都想鼓起勇氣行上前同佢講嘢，就算只係講上一句，我都會覺得開心，但係宜家問題就在於我連叫佢都唔太敢

但呢一刻，喺我腦海中閃出一個想法





「如果我表白，佢會唔會接受我…？」




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link