［愛情甜故前傳--無糖純愛］曾經嘅我地，都係兩條平行線⋯: 62. 不確定

「呢度…」我望到題目，眉頭輕輕一皺，腦袋一轉，提起筆寫下步驟，然後又計一計，再對一下答案

唔啱，再計過，搵前面嘅類似嘅例題睇一睇然後再計多一次

逐課逐課咁溫，一題一題咁樣計，做完一題又一題…都唔知自己坐咗喺書枱前面幾耐，感覺上好似已經坐咗好耐，坐到屁股都有啲痛

我伸咗一個懶腰鬆一鬆筋骨，順便抬眼望一望放喺枱頭嘅電子時鐘，原來已經成11點幾，淨係做數都已經做咗差唔多成5個幾鐘，聽日仲要番學，我個腦都開始實實地計唔到數

我慢慢地將枱面上嘅嘢執好打算瞓，因為聽日仲要番學，我望住放喺我左手邊嘅一疊厚厚嘅數學書，呢度都已經有3課，我都「自學」同溫咗好幾課，我諗住聽日先溫埋淨低嗰兩課



我將疊書放番入去書夾入面扣住，因為疊書係分裝冊嚟，可以一課一課咁拎出嚟，所以我淨係放番宜家教緊嗰一課嗰本書入書包就得，我將鉛芯筆同擦膠放入袋袋，然後將筆袋同計數機一同放入書包

枱上面有一大埋擦膠碎，我拎起放喺枱底嘅小型嘅垃圾桶，將啲擦膠碎都掃晒落去

我行出房然後走向廁所洗一洗手，順便洗一洗面

我將水龍頭微微擰開，將手濕一濕喺臉上抹一抹，做數做咗好幾個鐘真係有啲攰，覺得有啲身心俱疲嘅感覺，我行到一旁望向鏡櫃上嘅鏡子，拎起梳張頭髮隨便梳咗兩下

番嚟嗰陣已經沖咗涼，所以我可以直接灘床瞓，行出廁所嘅時候我順手地閂上門同燈，客廳頓時漆黑一片，格外寧靜…我都已經習慣咗呢種寧靜，我諗或者以後一直都會係咁寧靜…



「呼～」我一下子灘落床，開住枱燈，拎起手機，打算再睇多一陣手機先去瞓覺

我蓋住被，開咗放喺床尾嘅風扇，我唔開冷氣係因為我覺得又未真係熱到要開冷氣嘅地步，所以開風扇涼涼地就夠

我側身背住書枱睇手機，因為枱燈其實有啲刺眼，特別係喺睡房一啲光都冇嘅時候，即使用嘅係暖光…我側身灘咗一陣又轉身望番向書枱嗰邊睇手機

我抬眼望向枱燈，忽然有一種感覺湧上心頭…一盞明亮嘅燈就好似一個令你帶嚟好改變嘅人一樣，喺黑暗中為你照亮面前嘅道路，喺你要走歪路立歪心嘅時候指引你去行啱嘅路，喺冰冷嘅黑暗裹用溫柔嘅燈光令你感覺到一絲暖意…

要遇到一個咁樣嘅人應該好難，你會遇上一個人，但佢未必真係適合你；你會遇上一個人，但佢或者會半途放棄，好難真係可以遇到一個同自己剛好適合同時又可以包容你嘅一切，同你行到最後嘅人…至少喺我呢個年紀未必會遇到一個咁樣嘅人



我閂上枱燈，將手機放喺枱上差電，我側着望住書枱嗰邊瞓喺度，風扇左右左右咁緩緩轉動着，有少許期待聽日番學…第一次覺得有啲期待…

當我再醒嘅時候已經係第二朝早，我懶洋洋咁坐起身，梳洗完換完衫就番學，我對番學好似有啲期待，有少少想學新嘢嘅感覺

今日唔買早餐啦，想直接番學校，而且方芷諾行喺我前面，所以我又唔太想去買早餐，雖然真係有少少肚餓

方芷諾今日自己一個人番學，睇嚟李靜愉又唔番學，得番方芷諾一個人

呢一刻嘅我有啲想行上去同方芷諾搭話，但係我諗佢應該都唔會太想同我講嘢，畢竟我之前拒絕咗佢…

「真係好瘀…」我喺心中對自己嘲諷道，「拒絕完之後又中意番人…」

內心的確有少許蠢蠢欲動想行上前拍佢博頭一下，但係我冇咁嘅勇氣，只係有咁嘅想法，不過如果話真係要行上前拍佢主動同佢講嘢，我又冇咁樣嘅膽量去叫佢

有人喺我隔離行過，我見到佢直接行到方芷諾身旁，好似普通朋友一樣主動同方芷諾搭話，點解周樂恆又喺度？我都想好似佢咁可以咁自然行上前…



但點解次次我一見到方芷諾，十有八九都會見到周樂恆？唔通佢仲中意方芷諾？但既然中意點解當初要分手？

唔係，我唔可以咁樣諗，佢地都分咗手啦，又點可以做番普通朋友㗎？可能係方芷諾太好人，所以先會同佢做番朋友？

不過就算係咁都好，我都有啲羨慕周樂恆，佢可以咁自然就行上前同方芷諾講嘢，我都想可以咁自然…我都想可以好似佢咁，不過算啦，我都未必會中意方芷諾好耐，可能有一日就唔再中意佢

方芷諾啱啱望到係周樂恆嘅時候，微微一笑，其實方芷諾對所有人都係一樣好，唔會特別對邊個存有敵意一樣，但咁樣真係好咩？對所有人都咁善良，會更加容易比人傷害

不過冇咩所謂啦，其實都係一樣，我宜家咁樣講啫，未必真係會將呢種感覺維持好耐

但呢一刻嘅我，冇諗過我嘅未來係一個會為咗方芷諾放棄一切，變成眼中只有佢、一直追逐佢嘅存在…






IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link