［愛情甜故前傳--無糖純愛］曾經嘅我地，都係兩條平行線⋯: 56. 心動了？

我有啲煩躁咁將把間尺塞番入筆袋，我做咩成日都會諗起嗰啲意義不明嘅嘢？

「唉…諗太多，可能因為佢最近成日都喺我視線範圍內先會咁啫…」我喺心中講道

我提起筆喺紙上寫着，但似乎我嘅心仍然未能平靜落嚟

「唔做啦…！」我有啲煩躁咁放低筆，然後坐喺床邊向後灘

我就好似冇辦法專心做功課一樣，個腦入面喺咁諗到一啲唔應該會諗到嘅嘢，因為呢啲不明所以嘅想法，令我覺得更加煩躁





我拎起手機，打算睇陣手機平靜一下然後先再做功課，先啱啱解鎖咗部手機，就見到IG彈咗個通知出嚟

有時某個人一出咗一個帖文，例如嗰個人兩三個月先出一個帖文嘅時候，IG唔知點解會有通知話你聽佢出咗新嘅帖文，好似叫你快啲去睇咁

「呢個IG名…」我望住通知中顯示嘅嗰個IG名，係邊個嘅IG名呢…？

我好順手咁就㩒咗落去嗰個通知度，然後就手機就自動幫我開咗IG嘅頁面，IG自動就轉到去嗰個帖文嘅頁面，個帖文嘅相好自然就彈咗出嚟，我見到相入面嘅嗰個女仔

該死的，我又發生咩事？心臟莫名其妙地又緊縮咗一下，但我嘅視線卻移唔開張相上嘅女仔





佢正微微低頭，微笑中夾雜了一絲靦腆，手上拎住一個茶杯，背景正係前兩日佢同佢班Friend一齊去嘅Cafe，而相中嘅少女正係方芷諾

見到呢張相，我突然間又感覺到一絲觸電嘅感覺，我好順手咁就喺張相上㩒咗兩下，相片嘅中央頓時就出現咗一個紅色嘅心心

我…做咩like咗張相呀？算啦算啦…like咗就like咗啦…都唔係啲咩好重要嘅事嚟，like咗就算啦

但係張相影得都唔錯嘅，應該係游悠影，因為上次個story，游悠係坐佢對面

其實方芷諾原來都幾好睇…佢原來冇想象中咁差，無可否認嘅係佢嘅笑容的確係幾好睇…





我將手機就咁放埋一邊，我可以冷靜落嚟未？似乎…我都可以感受得到答案…心臟好似仍然未平伏到落嚟，感覺怪怪的，我好似都唔知點解自己會有咁樣嘅反應…明明就只係普通嘅一張相

忽我放咗喺一邊嘅手機突然間響起，我冇留意係邊個打嚟，只係摸到手機嘅位置然後就直接自然地拉咗綠色嘅接聽拎起嚟聽

「子朗你仲唔上嚟嘅？」我聽得出係我媽把聲，「差唔多食飯啦…」

「唔上啦，唔舒服。」我隨便搵咗一個理由

「你有冇事呀？我陣間落嚟拎飯比你啦。」我媽講道

「唔洗，我想瞓陣。」我講道，其實我冇咩特別唔舒服，只係想搵個理由唔上去食飯

「咁你休息下啦，再有唔舒服同我講…」我媽講道

「嗯，拜拜。」我掛斷電話，將手機再一次放埋一邊





我淨係覺得自己最近做咗好多有啲奇怪嘅事，好似同平日嘅自己有啲出入，我右腳用友踢起同時一下子坐起身，我又坐番去書枱前面做功課

或者我呢種「奇怪」嘅行為，過一排就會「痊癒」…

…

鬧鐘一大清早就喺度響，我聽到鬧鐘嘅響聲之後緩緩爬起身，我喺落床之前喺床上呆坐咗一陣

「今日到底星期幾？」喺我嘅腦袋開始清晰嘅時候，我諗到嘅第一樣嘢係呢樣嘢

我拎起手機一望，原來今日已經星期三，唔知點解我覺得星期三並唔係一個好日子，可能係一星期入面最令人覺得煩厭嘅一日

我行入廁所洗面刷牙，隨便梳一梳個頭，著上短袖裇衫，然後著上長褲，扣上皮帶





最近學校先轉咗夏季校服，明明已經5月中，5月尾都已經嚟緊，但前兩日先轉咗做夏季，因為最近天氣有啲反常，一時溫度又跌，一時又升番上去，所以今個星期先換咗夏季校服

但我都係照塞埋長袖冷衫落書包，凍嗰陣都可以著

我同平日一樣一邊行一邊睇手機，去到學校出面嘅時候先收起手機，番到學校嘅時候我唔係番課室，而係去咗小食部

今日有啲想去小食部買嘢食，有啲想買嘢飲，陣間番到去睇下有咩食，今日食咖哩魚蛋都唔錯

我一踏入小食部，就見到一個好熟嘅身影企喺小食部阿姨嘅面前買緊早餐

心臟頓時緊縮咗一下，有種少量電流流過嘅觸電感覺








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link