［愛情甜故前傳--無糖純愛］曾經嘅我地，都係兩條平行線⋯: 51. 客觀

梳起一條利落嘅馬尾，後頸上有少許嘅頭髮碎，若隱若現…

「你又喺度諗咩呀！」我即刻制止咗自己有多餘嘅想法，「做咩成日亂諗嘢？」

唔通係因為行喺班女仔後面所以先會咁？我即刻加快咗腳步，班女仔似乎感覺到有人逼近，然後分開咗兩邊嚟行，我喺佢地中間行過咗，行咗去佢地嘅前面

葉子朗你唔好再亂諗啦！

我急步行番屋企，差唔多番到屋企樓下我先放慢咗腳步





我番到屋企門口，我拎鎖匙開門，推開咗鐵閘，打開木門，小跨一步踏入屋內

我閂上鐵閘，出面走廊嘅燈喺鐵閘嘅縫隙中穿照入嚟，光線打喺屋企門口嘅木地板上，喺昏暗嘅環境下格外明亮

就喺我將木門緩緩閂上嘅瞬間，光再次慢慢地減少，一縷一縷地沿住門縫流走，直至我將木門閂上，光全部流走…

我冇將燈開上，屋內仍然好暗，兩邊嘅房門閂上，冇陽光可以透到入屋內，屋內都冷冰冰的…就好似冇人喺呢間屋入面住一樣…

我除咗書包掉喺梳化上，我灘咗喺梳化上，真係頹廢…我嘅手臂蓋喺雙眼上面，屋企嘅昏暗好似要將我吞噬一樣…我嘅右腳曲着踩喺梳化上，左腳伸直搭喺梳化嘅扶手上





放喺褲袋嘅手機響起嚟，我瞬間覺得煩厭，但我都係拎咗手機聽電話

「喂？」我先開口

「番到屋企未呀？」電話裏頭傳嚟我媽嘅聲音

「嗯。」我連答多兩句都有啲懶

「沖個涼上嚟食飯啦～」我媽講道，我嗯咗一聲次後就收咗線





我一下子坐起身行入房，拎衫褲去沖涼，陣間上去著居家服就得啦

本來我的確係同我爸媽住埋一齊，而我爺爺嫲嫲住喺樓上三十樓嘅大單位，不過因為近年我爺爺嫲嫲身體唔係幾好，開始好多病痛，出入冇人幫佢地睇住佢地都有啲危險，所以我爸媽就搬咗上去同佢地一齊住，算係有個照應同時又可以睇住爺爺嫲嫲

佢地搬咗上去之後，我就自己一個人住呢度，呢度算係細單位嚟，一廳兩房啦，都唔係太差，每日放學番嚟之後都係自己一個喺屋企，屋企嘅水電煤就我爸我媽交，放咗學之後就番嚟沖個涼然後上去食飯，食完飯之後就落番嚟

基本上好多嘢都係靠我自己一手一腳整，我爸媽定期出零用錢比我，我見佢地嘅時間真係好少

某程度嚟講，我同我爸媽見面嘅時間可能只有三個鐘左右，佢地對我其實唔係真係咁關心，比較似係盡咗責任就算嗰一種

我沖完涼，換咗對波鞋，著住居家服然後著波鞋好奇怪…不過總好過著人字拖嘅…我拎埋鎖匙同手機就出去，上去30樓食飯

我上到去其實都冇咩特別嘢要做，坐喺度等食飯，幫手開飯咁樣…平日我食完飯之後坐多一陣就會番落嚟，因為喺上面唔知要做咩…

我坐喺梳化睇手機，睇睇下IG見到方芷諾po咗Story，我幾時Follow咗方芷諾IG㗎？我之前有Follow佢㗎咩？可能之前見到佢request我，我confirm咗佢所以我又request番佢，喺呢個年頭都好正常啦，你Follow我，我自然就會Follow番你





佢同李靜愉仲有另多三個女仔一齊去咗食飯，大概係咁上下，佢連續po咗兩個Story，下一個Story係佢地嘅自拍照

女仔都係中意自拍嘅生物，明明影嚟影去都係咁嘅樣…可能要為自己嘅青春留倩影掛，我㩒去下一個Story，又係佢地幾個嚟嘅？

呢個係游悠影嘅，游悠影咗方芷諾好開心咁食緊個雪糕，方芷諾笑得甜甜的，一臉幸福咁，係唔係女仔都中意食甜嘢？而且食甜嘢嗰陣都會露出一臉幸福嘅表情？

方芷諾笑起嚟甜甜的，好似好幸福咁…甜嘢真係咁好食咩？唔會覺得好膩咩…

點解我又會諗起佢？佢嘅事關我咩事？

「食得啦，子朗，幫手開飯啦！」我媽喺廚房嗌度，我將手機放番入褲袋入面然後就行去幫手開飯

不過講真嘅話，佢笑起嚟嘅樣真係比平日好睇好多，我咁講唔係因為我對佢有咩感覺，只不過係客觀咁講咁覺得佢笑起嚟好睇啫








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link