［愛情甜故前傳--無糖純愛］曾經嘅我地，都係兩條平行線⋯: 46. 共處一室的尷尬

我跟住清單上寫嘅分類項目執，將啲嘢分開放；葉子朗將整來嗰個又舊又髒嘅紙皮箱放埋一邊，然後再拎另一個落嚟

「Okay～呢度齊啦…」我將啲喺放好喺紙箱入面，然後準備再企起身嘅時候，「呀！嘶…」

我一企起身一秒地冇就即刻蹲低，個後腦勺仲好痛，啱啱一企起身嘅時候，我個頭一下就撞咗上去個門柄度

「你有冇事？」葉子朗忽然開口問道

「冇事，冇事…」我搖搖頭，但我痛到眼淚水都快要流出嚟，我用手輕輕摸咗自己嘅後腦勺兩下





可能因為啱啱一下子無情力撞上去，所以搞到個頭有啲暈暈地，我蹲多咗兩秒之後就慢慢企起身轉過去繼續幫葉子朗手點嘢

我轉個去嘅時候見到葉子朗拎緊另一個箱落嚟，但今次佢係一個一個拎晒落嚟次後先慢慢打開啲箱，佢已經將對住門口嗰邊嘅儲物架都清空

我喺佢隔離望住佢逐樣逐樣嘢拎出嚟，我喺心中數住個份量然後喺清單上打一個剔，我地之間都隔住咗一啲空位，果然係有啲尷尬

我見放喺地下嘅箱好似愈嚟愈多咁，我便後退咗兩步，點知撞到後面嗰個未清嘅儲物架，葉子朗剛好抬起頭望我，佢突然一下子企起身大步地跨過放喺地上嘅紙箱行到我面前，我疑惑咁望住佢，不禁後退咗一步

葉子朗大步地行到我面前，右手一下子舉起，佢抬起頭，好似鬆咗一口氣一樣





我循住佢嘅左手望上去，我見到佢扶住一個已經半傾斜嘅紙箱，原來佢係見到我頭頂上面嗰個紙箱要跌，所以大步行過嚟扶住…

我有啲愕然咁望向佢，葉子朗鬆咗一口氣咁望向我，我同佢嘅視線又再次對上，但我嘅內心冇再次收得波濤洶湧，反而只係有一兩個小浪捲起

我同佢對望咗兩秒之後回神過嚟，瞬間向左邊行咗兩步離開佢嘅面前

「唔該…」我攬住塊clip board微微低頭講道

「唔洗。」葉子朗依舊冷冷的講道





佢葉子朗又行番去同一個位執嘢，喺佢執好之後我又開始默默咁轉身將啲嘢分類好，我地亦冇再望向對方

儲物室嘅地下真係好污糟，啲角落頭都堆積咗好多塵喺度，好似十年都冇人入嚟一次咁

我地一直咁樣重複做同樣嘅步驟直到成個儲物室嘅嘢都執好晒

「Okay啦，啲嘢都分類好放番喺新嘅箱入面啦～」我頓時覺得輕鬆晒，我回頭望向葉子朗，豈料發現葉子朗都剛好望向我，「可以搬出去啦…」

我假裝自然咁望番過去啲箱度，我打開儲物室嘅門，然後邁步行咗出去，我將塊clip board放喺枱面上，然後就轉身行去啲紙箱面前，彎眼將啲紙箱拎起，放到去許sir叫我地放嘅嗰一個角落

過咗十分鐘左右，我同葉子朗終於將所有嘢搬晒出嚟

「係咪搬晒啦？」我問道

「應該係。」葉子朗講完之後行番去儲物室檢查一次，好快佢又行番出嚟，「嗯，搬晒啦。」





「我落去交番塊clip board先，你鎖門啦…」我將鎖匙遞比葉子朗，然後迅速孭埋書包拎住clip board同埋校褸踏出地理室嘅門口

我連忙落樓梯去到一樓，將塊clip board放喺許sir嘅簿櫃中，然後離開學校冇多留

「呼…」我才剛踏出學校嘅大門就鬆咗一口氣

啱啱喺地理室嘅時候真係嚇死…葉子朗突然大步咁行過嚟，我同佢之間嘅距離一下子就拉近咗好多，近到我可以隱弱聽到佢嘅呼吸聲

我當下好怕，怕我又會唔爭氣又動心，所以我才要喺回神嘅時候瞬間走開，我真係好怕我會前功盡廢…我真係怕又會對佢心動…對一個唔會愛上我嘅人動了心

我要將我對佢嘅好感回歸到0, 唔想再對佢有任何心動嘅感覺

既然佢都講咗，我嘅中意對佢嚟講係困擾，佢一世都唔會中意我之類嘅說話，咁我諗我對佢完全死心應該係最好嘅結果





方芷諾呀方芷諾！你要加油呀！你可以放低佢㗎啦！上一次咁難，你都做到…今次兩個月嘅感情可以放得低㗎…

「你得㗎！」我輕輕拍咗自己嘅臉頰兩下

我做到㗎…！




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link