［愛情甜故前傳--無糖純愛］曾經嘅我地，都係兩條平行線⋯: 42. 迴避

「你今日到底做咩呀？講起葉子朗你都冇反應嘅？」靜愉問我

我抬眼望一望靜愉，望一望周圍見冇咩人喺課室，就算有一兩個人，佢地都坐得比較遠

「冇咩呀…」我耷低頭望住盒飯，我亦知暪唔過靜愉，所以細聲咁樣同靜愉坦白，「就係葉子朗拒絕咗我咋嘛。」

「點解會咁㗎？」靜愉一臉難以置信，「你唔係冇打算表白咩？」 

「嗯…」我嘅心情瞬間又跌咗落谷底，「上星期五放咗學之後，我地講嘅嘢，佢聽到晒…」





靜愉仍然一臉難以置信，我同靜愉仔細地講出琴日放學之後發生嘅事

「佢洗唔洗咁呀？你中意佢，佢應該感動啦！」靜愉一臉不屑地講道，「你中意佢，佢就可以咁樣踐踏你㗎啦咩？」

「算啦…難受總會有嘅，但總會好起嚟…」我自己都有啲迷惘，雖然我係咁樣講但其實我都唔知自己可以點先真，「慢慢會放得低㗎啦…」

我微微一笑，靜愉卻一臉擔心咁望住我

「你有嘢要同我講，真係要同我講呀…」靜愉因為見琴我唔開心，所以佢都變得有啲唔開心起嚟，「你琴晚做咩唔打比我呀？自己一個人喊咗成晚…」





「想自己靜一下嘛…」我講咗一個大話，我唔希望靜愉會覺得我唔信佢，「放心啦，我真係冇事。我會慢慢放低佢㗎啦，之前阿恆嗰陣我都Okay咗啦，你唔好睇少我啦！」

「嗯，你有咩要同我講。」靜愉微笑道，「食飯啦！」

其實我知道，我唔夠堅強，其實我好多時都要靠靜愉幫我出頭…但今次我真係唔想靜愉幫我出頭，我都係時候要長大啦，要學識堅強起嚟

葉子朗嘅事，我相信我可以慢慢放低落嚟，我知道我可以做到，而且時間會沖淡一切…

「咁你今日會唔會留低？」靜愉忽然問道





「會呀，我又唔係為佢而留低。」我微笑着講，「我冇事喎！」

「我今日都同你一齊留低啦。」靜愉始終有啲擔心我，由佢嘅表情中我可以睇得出靜愉對我嘅唔放心，「費是你一個人唔開心。」

我莞爾一笑，邊個話一定要拍拖先會覺得幸福？有一個知你想法、了解你嘅好朋友喺身邊都可以好幸福，而我身邊就有靜愉喺度

開心嘅日子、唔開心嘅日子都有靜愉陪我一齊過一齊面對，佢從來都唔會掉低我一個面對，特別係我傷心落淚嘅時候，佢必定會喺我身邊陪住我

佢唔會怨我，亦唔會嫌我煩…開心嗰陣陪我笑，唔開心嘅時候安慰我，從來都冇變過，今年係我地友誼嘅第三年，佢仍然一直喺我身邊

放咗學之後，靜愉真係陪我一齊留低喺學校，都好，一齊做功課同時又可以順便同佢溫習一下

今日唔知發生咩事，小食部呢度安靜得很，令喺籃球場傳嚟嘅聲音格外響亮

我一直聽到「噠、噠、噠」嘅拍球聲，我唔想抬頭去望，因為我唔想見到葉子朗，唔想諗起琴日發生嘅事…我唔想記起同葉子朗有關嘅回憶，我想將呢啲記憶鎖起…就當一切都冇發生過一樣…





「做咩呀？」我偶然抬眼，見到靜愉正定睛地望住我，「你怕我唔開心呀？放心啦，我真係冇事。」

靜愉點一點頭，然後又耷低頭繼續做嘢，我托住頭，望住飲品機嘅方向放空着

仲記得我中意葉子朗嘅嗰一日，就係喺放學嘅時候，我企喺呢部飲品機前面望住葉子朗打波嘅身影，就喺嗰一刻，我嘅心跳毫不猶疑地為佢加快

籃球場嘅拍球聲停咗落嚟，喺飲品機前出現咗一個人，我瞬間回神並且下意識望向企喺飲品機前面買嘢飲嘅人

我再一次，同佢對上視線…

企喺飲品機前面嘅人係葉子朗，我同佢再一次對上咗視線，於是我瞬間收回托頭嘅手，然後耷低頭做功課

宜家係咪連個天都挽我？佢都拒絕咗我啦，點解次次我都會同佢對上視線？





我希望我可以快啲放低佢，快啲忘記對佢嘅感情…

「做完啦～」靜愉將原子筆放番入筆袋入面，「芷諾你得未呀？」

「得啦，等我執埋嘢就行得啦～」我微微一笑，將筆放番入筆袋入面，將枱面上屬於我嘅嘢都收好入書包

喺孭起書包次前，我仲特登望多次睇下有冇漏嘢

「行得啦～」我望向靜愉笑了笑，然後就同靜愉一齊離開小食部

我已經決定咗啦！我要向前望，要放低佢！








IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link