［愛情甜故前傳--無糖純愛］曾經嘅我地，都係兩條平行線⋯: 40. 一團糟

「嗯…」我好艱難咁先吐出一個字

葉子朗…你有咁狠心嘅必要咩？你唔比希望我唔緊要…點解？點解你要將我心中最後嘅小光點都要摧毀掉？

「唔理係今日嘅嗯一刻，聽日、後日，定係以後嘅日子都冇呢個機會。」葉子朗再講道，「你可以死心。」

我靜咗落嚟，我唔知可以點…腦海中空白一片，我無法反駁同時亦無法講出任何感受…

「咁…」良久，我終於開口講嘢，「我明白啦…」





我喺腦袋空白嘅情況下回答佢嘅拒絕，我下意識後退咗一小步，然後默默地微微彎咗一下身子，好似微微鞠躬一樣

「我先行…」我細聲地講完之後即刻就轉身走

我唔想再企喺原地，唔想再望向葉子朗…

原來我對葉子朗嚟講…只係一個「困擾」，除此之外咩都唔係…哈…一直以嚟都係我一廂情願覺得好似同佢拉近咗距離，但原來冇，佢只係覺得我會帶到麻煩比佢…

我點解會咁蠢？我真係好蠢…人地咩都冇表示，我做咩要一廂情願咁認為佢會想同我做朋友？





方芷諾…你真係好蠢…明明你冇打算表白，但點解偏偏要比佢聽到你對佢嘅感覺？你親口講出嚟令成件事運彎都冇得轉！

我都唔知自己行到去邊啦…比人拒絕，心裏一定唔會好受吧…心中好難受…

佢咁樣大放狠話想我死心…其實都係一個好事嚟…總好過一直比假希望我但又唔中意我…

嗯…我只好咁樣安慰自己…我都唔知道宜家我吧感受係點樣，到底我係鬆咗一口氣定係難受？或者偏向難受…因為我嘅心好似比大石壓住一樣，難受到快要窒息但卻無法推開

剛才葉子朗嘅眼神同語氣比起平日更冷淡，什至係冷漠…佢嘅眼神冷漠得令我嘅心跳都不禁停咗一下，佢嘅一字一句好似冷冰冰嘅利箭一樣，鋒利無比同時冷漠無情，直接插進心臟





但更無情嘅係，當箭頭插進並將心臟刺穿時，血已經沿住箭頭嘅箭鋒滴下，佢眼見之後並冇一絲憐憫，反而更快地將利箭一下子抽出，血流成河…

我之後應該點樣面對佢先啱…？我拖着腳步番到屋企，喺閂上房門嘅一刻，我將書包除落嚟之後直接坐咗喺地上，我分唔清到底我係因為攰而坐低定係因為我覺得難受到無力而坐低

我拎起手機，想睇下IG放鬆一下心情，但一打開IG，卻見到一個我之前follow咗嘅語錄account

「你以為你會是他的誰，但事實證明你誰也不是」

「哈…」我冷笑一聲，然後鎖上屏幕，「連你都覺得我蠢…」

到底，愛情算係啲咩？愛情係話你知你有幾蠢…花心比人鬧，專心比人挽，真心比人厄，好心被踐踏…愛情就係咁樣嘅一回事吧

我拎起電話，想打比靜愉訴苦，但當我搵到靜愉嘅手機號碼時，我冇㩒落去

靜愉係我最信得過嘅人，但我唔想每一次有咩事嘅時候都依賴佢…我又再一次鎖上咗手機屏幕，心裏的確難受，但宜家就算我同邊個講都好，都冇可能即刻復原





我宜家要點？要放低…？定係要點…？我抱住自己嘅雙膝，獨自一人喺苦惱嘅漩渦中徘徊着…

本來我都預自己唔會中意佢一段好長嘅時間㗎…但點解宜家又會咁難受？我真係好唔開心…

本來嘅空白喺我腦海裏慢慢褪去，但迅速地將我腦海填滿嘅，卻係啱啱嘅場景，一句又一句嘅說話…

我感覺更難受，葉除朗同我講嘅嘢仍然喺我嘅腦海中迴盪着，就好似佢直接喺我耳邊講一樣

「唔好再講啦…」我嘅雙手掩着雙耳，眼前嘅一切再次變得模糊起嚟，當眼前嘅一切又再變得清晰起嚟嘅時候，我嘅臉頰有少許濕濕的

我抽了抽鼻子，用手背抹一下臉頰，抽咗張紙巾又再抹一下臉

我拉開書枱前嘅櫈，坐喺書枱前，將枱燈閂上了，伏喺桌上，將臉埋進雙臂之中





我想將中意葉子朗嘅事同今日嘅事一同洗清，希望我對葉子朗嘅好感可以喺我腦海中消失…我唔想再記起我中意佢，唔想再記起今日嘅事，唔想再記得嗯啲糟糕嘅回憶

就當我冇中意過葉子朗嗯個人啦…當我對佢嘅感情從來都唔存在…好嗎…？答應我好嗎？

希望會有一個「失戀仙子」為我洗走呢啲糟糕嘅回憶，我嘅青春真係一團糟…愛情果然係騙人嘅把戲，世上根本就冇童話…

果然…一切都係厄人…

我都唔記得咗我到底係點樣瞓着㗎啦…

當我再次睜開眼嘅時候，已經係第二日嘅朝聽到鬧鐘嘅響鬧聲








IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link