［愛情甜故前傳--無糖純愛］曾經嘅我地，都係兩條平行線⋯: 35. 羨慕

「嘩～完晒啦！」靜愉興奮地講道，我都頓時伸咗一個懶腰，手放喺頸上按咗兩下

一直耷低頭搞到條頸都有啲酸痛，靜愉將數學書合上

陣陣嘅飯菜香味喺廚房飄出嚟，阿姨一番到嚟休息咗一陣就入咗廚房煮飯

「好香呀～」我動動鼻子，肚子都開始有啲餓嘅感覺，我嘅手輕輕放喺小腹上，我感覺到入面正「咕嚕咕嚕」叫着

「媽！」靜愉一邊叫一邊朝廚房行去，我當然就跟喺靜愉後面一齊入去廚房啦，「今晚食咩呀？」





「今晚食瑞士雞翼，芷諾中意食嘛～」阿姨微微一笑講道

阿姨對我好好，每次我嚟到，阿姨都會煮我中意食嘅飯菜

「人地幫你補底呀，李靜愉你就努力啲讀書啦！唔好浪費芷諾一番心思呀！」阿姨又開始對靜愉開啟咗說教模式，靜愉一臉誠懇咁望住我，好似叫我幫佢一下咁，「李靜愉你聽唔聽到呀？努力讀書呀，今年就揀科啦！」

我企喺靜愉隔離，聽到之後不禁就笑起嚟，當然我冇笑出聲

「笑咩啫方芷諾！」靜愉見到我笑之後即刻就問道，我被當場抓包之後便忍住笑意，輕輕地咬着唇





「今年揀科啦，加油！」我挽住靜愉嘅手臂講道

「你真係呀…」靜愉輕輕拍咗我個頭一下

「我地唔好阻住阿姨煮飯啦～」我拉住靜愉行出廚房，靜愉行咗去我前面，拉住我入咗房

「我媽又開始囉唆啦，真係救命呀…」靜愉坐喺床邊向後灘，然後一個翻身，側着身子灘，之後又翻身變番平灘

「有人囉嗦總好過冇呀…」我聽到靜愉咁講之後嘅第一個瞬間之後咁講，我心中有種莫名其妙嘅羨慕





平日我喺屋企，我爸媽好少會咁板對我囉嗦，佢地對我嘅學業從來都好放心，一啲都唔會擔心…因為我媽知道我可以自己搞掂晒學業成績上嘅嘢，佢知我可以有好嘅表現，佢對我從來都係咁放心

我一直以嚟，有時都想我媽會對我囉嗦一下，好似阿姨一樣會擔心靜愉嘅學業一樣，明明我媽對我嘅學業成績放心，我唔洗佢為我擔心太多係好事先啱，但點解我總覺得…我媽對我過份放心咁嘅？只要我成績好，做咩都得，咩都可以要

但我想嘅係有時佢都會鬧下我，有冇好好努力讀書、考試有冇盡力之類，好多父母都會希望自己嘅仔女自律啲，我媽成日都話我已經做到呢一點，所以佢對我好放心…但我卻覺得我咁自律好似唔係一件好事…

「咁你讀書好自律嘛，成績又好，阿姨先會對你咁放心啫～」靜愉明白我嘅想法，佢好似安慰我一樣講道，「你嘅自律都係好事嚟㗎～」

「但點解我會覺得，我咁樣令佢咁放心唔係一件好事嚟嘅…」我心中的確有啲唔開心，我微微耷低頭，雙手嘅指尖輕扣着然後又分開

「其實你諗下，阿姨同叔叔平日喺公司已經好多嘢忙，你自己有分串唔洗佢地擔心其實係幫輕緊佢地。」我感覺到靜愉想我睇開啲，佢盡力咁樣解釋比我知我咁樣其實係好事，「我諗阿姨對你嘅信任其實好多，佢好似唔管你咁但其實佢都好關心你㗎～」

「日日番到屋企都係自己一個，佢兩個好似永遠都工作至上咁樣…」我側着頭伏喺靜愉嘅床邊，「見你嘅時間真係仲多過見佢地…」

「咁樣計嘅話，我算唔算得上係你半個家人呀？」靜愉笑嘻嘻地望住我，用姆指同食指做咗一個「少少」嘅動作





「一早就係啦～」我見到靜愉笑嘻嘻咁，我都跟住佢一齊笑起嚟

夜晚我喺靜愉屋企食完飯之後，坐多咗一陣就走，本來靜愉話送我落樓下，不過我拒絕咗，我諗靜愉做咗全日數都已經覺得好攰㗎啦，畢竟要追番晒呢一課所有進度，又做咗好多練習題，我諗靜愉都要好好休息一下㗎啦～

我一個人徒步行番屋企，畢竟又唔係真係相隔好遠，就冇搭車嘅必要啦，一邊被微風吹着一邊慢慢行番去，就當幫助消化一下

突間然有啲想食雪糕，我記得喺學校附近有一間便利店，我打算去一轉便利店先再番屋企，去睇下有咩雪糕，想買番個甜筒食下，當係獎勵比幫靜愉補底補足半日嘅自己

雖然間便利店係有少少遠，不過唔緊要啦～行下當做下運動消化下就好

我一邊睇手機一邊行入去便利店，第一時間當然係行去凍櫃前面睇下有咩雪糕好食啦

「食咩好呢？」我望住喺雪櫃入面嘅雪糕，不禁有啲三心兩意





唔知點解突然間我嘅直覺話我知我後面有啲咩咁，我便按住我嘅直覺回頭

「葉、葉子朗！」我不禁瞪大了眼




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link