［愛情甜故前傳--無糖純愛］曾經嘅我地，都係兩條平行線⋯: 30. 他的笑容

放咗學之後，我同往常一樣留低喺學校做功課同溫書

最近嘅功課量唔多，所以我好快就將功課做晒，可以騰多啲時間出嚟溫下書咁

「唔…！」我望住抬上嘅書已經望咗成一個鐘，我覺得雙眼有啲攰，合埋眼嘅同時伸咗一個懶腰

我摸一摸裙袋，知道仲有硬幣喺入面，便企起身走向飲品機買嘢飲，除咗係因為口渴之外，仲係想要伸展一下筋骨

我喺飲品機買咗一包檸檬茶，我行咗出去籃球場，一邊將飲管插入用嚟封口錫紙箔，一邊走向葉子朗



果然我一走近葉子朗，我嘅心跳就完全冇辦法慢落嚟，根本冇可能帶住平常心走近佢，但我一定要鼓起勇氣先得

「你成日一個人打波唔悶咩？」我鼓起勇氣問道

本來準備要投球嘅葉子朗，聽到我把聲嘅時候，動作停咗落嚟，本來微微蹲低嘅雙腿又緩緩企番直，輕輕扶住籃球嘅雙手慢慢放番落嚟，捉住籃球，葉子朗緩緩回頭望向我，我微笑着望佢

「唔悶。」葉子朗淺淺一笑，吐出兩個字之後又繼續佢嘅投球

今次，大概係我第二次見到佢嘅笑容，雖然唔明顯，亦唔係哈哈大笑嗰一種…但呢個笑容、呢個性格正正就係葉子朗嘅魅力之處



每一次見到佢笑，我嘅心跳只會更強烈更快，我對佢嘅感覺，彷彿已經去到著迷嘅地步…

「總好過，你淨係讀書。」葉子朗突然講咗一句，佢冇回頭望我，只係純粹咁樣講咗句

佢咁樣一講，本來喺我心中尷尬嘅感覺好似淡咗，冇再好強烈好突出，我開始有啲好似平日一樣耷低頭笑起嚟

「我都識其他嘢㗎，唔係淨係識讀書。」我笑住咁講道，我坐咗喺一邊嘅長櫈上睇佢一個人打波

葉子朗望向我，勾唇輕輕一笑，然後注意力又放番喺籃球同籃框上



嗰一個笑容，瞬間就將我嘅心都勾走咗…佢果然無論做啲咩都好，都可以吸引住我嘅目光，我嘅目光根本就冇辦法從佢嘅身上移開，特別係喺一個咁近嘅距離之下

佢嘅身影，似乎已經成為我眼中唯一一樣可以睇得清楚嘅嘢…佢嘅影子就喺我面前，我連佢嘅影子都想要捉住，佢嘅每一個瞬間都可以如此吸引

我睇咗一陣之後，望一望手錶，原來都已經5點25分，我行番去小食部執嘢，準備陣間番屋企

葉子朗執埋嘢之後，我見到佢朝我嘅個方向行過嚟

「佢會唔會停低停埋我呢？」我喺心中問道，我冇刻意抬頭望向佢，只係一直執嘢

我發現葉子朗冇刻意等我，我執好嘢孭起書包同時，佢已經行到我呢張枱附近，順利成章地我今日又可以同佢一齊走啦～嘻嘻…

雖然佢冇刻意等我，令我唔不開心咗一下，不過又可以同佢一齊走到，我又覺得開心心啦～又可以同佢一齊放學真開心～我開心～

今日嘅放學時間，又係同平日一樣，我又可以同葉子朗一齊走～唉…一諗到好快就放假就唔開心，又見唔到佢，要等兩日先可以同到葉子朗啦！唉…



其實今日都冇咩特別，走嘅時候我同葉子朗都冇講太多嘢，唔…同平時一樣囉，仲係未熟得晒，有少少尷尬啦，其他嘢就同平時一樣

我番到屋企之後嘅第一件事，係坐喺梳化上睇手機，連校服都冇換就頹廢咁斜灘喺梳化，拎住手機睇IG、Facebook

「真係好頹廢…」我喺心中講道，但係我仍然冇諗住郁，我仍然會係就咁斜灘坐喺梳化上面

我順手咁拎起放喺我隔離嘅電視遙控，開咗個電視，我隨便㩒咗一個台嚟睇

隨便啦～睇咩台都可以，冇所謂，有啲聲就得啦，我唔想覺得屋企好靜咁樣，一啲人聲都冇，所以當我番到屋企嘅時候一定會開電視，特別係睇綜藝節目，有啲人聲、歡笑聲，至少咁樣總好過屋企靜到連蚊飛過都聽到

我攬住個抱枕坐喺梳化上面，屋企得我一個，的確有啲悶…我打側個人坐，然後默默咁瞓低咗喺梳化上面

我望住個天花板發呆，然後默默咁合上眼，閉目養神一下，唔知點解…今日覺得對眼好攰…



瞓喺梳化上面一合上眼，全身好似慢慢咁放鬆緊…本來微微縮起嘅肩膀都慢慢放下來，呼吸慢慢變得平穩，雙腿以一個最舒服嘅姿勢擺着

眼皮變得愈嚟愈重，連睜大眼嘅力氣都冇

今日真係有啲攰…但明明今日咩都冇做過，點解會覺得咁攰…？

腦袋都變得有啲重咁，好似要黏住喺梳化上行唔開啦…

好攰…




IG Link: https://www.instagram.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link