［愛情甜故前傳--無糖純愛］曾經嘅我地，都係兩條平行線⋯: 28. 他的冷淡

「你去邊呀？」我一邊將啲嘢收入書包一邊問靜愉

「番屋企打機囉！」靜愉一臉輕鬆咁講道，「你又留低做功課呀？」

又到咗放學嘅時候啦～我同平時一樣，今日打算留低喺學校做功課就係啦～

嗱嗱嗱…唔關其他人事㗎！係我有呢個習慣咋！唔好諗太多呀～

「嗯！我平日都會留低㗎啦～」我笑笑口講道





「喂…」靜愉突然行嚟我身旁，然後捉住我，湊近我耳邊同時用手擋住口，「以我所知今日葉子朗會留低打波。」

「你點知㗎？」我一臉疑惑咁望住靜愉，靜愉一臉得意咁笑着

「今日咁啱聽到佢同Friend講囉～」靜愉笑笑口咁望住我講道，然後對我朝葉子朗嗰個方向打咗個眼色，「今日加油啦～有咩同我講啦！」

「得啦得啦！」我無奈咁反咗一下白眼，「佢又唔係我留低嘅主要原因～」

「我唔知啦呢個就～」靜愉望住我陰陰嘴笑，我都冇佢咁好氣啦





我同靜愉一齊行出課室，落到地下嗰層我地就分別啦，佢番屋企我去做功課

今日其實都冇咩特別，葉子朗今日都有留低喺籃球場打波算唔算特別？

我眼見到差唔多到5點半，我就執定嘢，等到打鐘嘅時候就走

就喺我幾乎幾所有嘢都放晒入書包嘅時候，突然有個人走近我，我自然就抬頭望

抬頭一望，差啲要心臟病發，心跳都漏咗幾拍





「你今日又喺度嘅？」葉子朗孭住書包，手上拎住件長袖冷衫，裇衫嘅衫袖都捲起到上臂

「係你呀？」我頓時就露出笑容，感覺上冇咁尷尬，「我今日都喺度做功課。」

葉子朗居然主動過嚟同我講嘢！我要開心死啦…今晚我要開心一整晚啦！

我見葉子朗冇行，唔通等緊我？於是我瞬間孭起書包，同佢一齊行

我同佢之間嘅距離仍然係相隔咗四分之一個人嘅身位，不過佢今日主動同我講嘢我已經好開心

喺我嘅腦海中，正好努力咁搵緊話題可以同佢講

「係呢，你諗住揀咩科呀？」我終於諗到可以講咩，我地係同學，講呢啲一定冇錯啦

「都係理科。」葉子朗輕描淡寫咁回答道，佢冇反問我，只係默默咁望向我





「我都諗住讀理科，因為感覺上理科好似多啲出路。」我微笑着回答

我望到我地兩人離分岔口愈嚟愈近，心中有啲失落，但當然我冇將我嘅情緒放到臉上，只係默默地將呢份感覺收喺心中

行到分岔口嘅時後，我正想抬頭同佢講拜拜，點知見到佢同我一齊繼續直行

「你又會行呢邊嘅？」我一臉好奇咁問道，我估佢應該係有咩要做，至少一定唔會係想送我番屋企先

「想去買個麵包先番屋企，聽日嘅早餐。」葉子朗面無表情咁講道

佢對所有人都係咁冷淡？定係對我先係咁冷淡咋？

但我諗佢應該係對所有人都係同一個態度，唔…對屋企人可能會有少少唔一樣？





「你都要去買麵包？」唔知點解我下意識就咁樣答，我仲諗緊有咩理由可以令我見到葉子朗一陣嘅時候，我就好自然咁講咗呢句

「你都要？」葉子朗望向我

「嗯，嗰間麵包店啲麵包好好食㗎！我好中意食嗰度啲麵包，買嚟做第二日嘅早餐。」一講起嗰間麵包店嘅麵包，喺我腦海中就浮出咗麵包香味

「我麵覺得佢呢間嘅麵包最好食。」葉子朗淡淡地講道

我心中很是高興，因為我有嘢同葉子朗一樣，我地都中意食嗰間麵包店嘅麵包，只不過係一個小小嘅共通點，我已經覺得好開心

我同葉子朗一齊行到去麵包店，然後行咗入去，順手地拎起一個圓盤同一個麵包夾

「你好似都中意食吞拿魚包？」我望一望佢，然後周圍搵吞拿魚包嘅蹤影

呢間麵包店有一處唔好，就係每次想搵個包麵好似要同佢包挽捉迷藏咁，要周圍搵佢喺邊先得…





我希望有一日可以唔洗再咁樣同個包挽遊戲

「嗯。」葉子朗同我一樣，喺度搵緊吞拿魚包嘅存在，我聽到佢嘅答覆，心中又高興咗一下，「喂，呢度。」

葉子朗講咗一聲，我朝佢嘅方向行去，佢夾咗一個喺自己個盤上面，但佢冇將麵包櫃嘅膠門閂上，反而等我夾埋先閂

「其實葉子朗都冇其他人講得咁差啫…」我喺心中默默地講道




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link