［愛情甜故前傳--無糖純愛］曾經嘅我地，都係兩條平行線⋯: 26. 我有喜歡的人了⋯

學校閂門嘅鐘聲響起，呢個鐘聲一響，代表喺學校中嘅學生都要離開學校

我收拾好書包，將本來放喺枱面上嘅功課都收番好，放番入功課file入面，我一邊執嘢 ，一邊有意無意地望向籃球場嗰邊，想睇下葉子朗幾時走，因為我真係好想過去同佢搭話

好啦…其實係我冇勇氣去主動搵佢講嘢…

「如果我可以鼓起勇氣就好…」我喺心中有啲失落，如果我可以大膽啲就好啦…

我獨自失落地執嘢，然後孭起書包準備走，我徑自走出校門，校褸搭住喺手臂上，我默默地望住地下行





「睇嚟我冇機會可以主動膽佢講到嘢㗎啦…」我喺心中默默講道，「唉…我真係好想可以主動搵佢一次講句嘢都好…」

方芷諾你真係冇膽呀！搵人講句嘢都唔敢，仲話自己中意人…

「喂。」突然有人喺我身後用低沉嘅聲線嗌咗一聲

因為聲音離我好近，所以我自然就擰轉頭望

我嘅雙眼不禁睜得更大，葉子朗正企喺我身後，佢望住我，手上拎住一本簿遞向我





「你漏咗冇拎。」葉子朗依舊用佢冷漠嘅聲線講道

「唔、唔該…」我窒咗一窒，然後微笑着將本簿由佢手上接過，我可以借機試下主動同佢講嘢，「你點知係我㗎…？」

「本簿上面唔係寫住你個名咩？」葉子朗冷漠地回覆我嘅提問同時，佢瞄咗我手上嘅簿一眼

「係喎…」我微微一笑，然後將書包孭去前面，將本簿放番入書包入面

葉子朗喺我身邊行過咗，我拉番書包拉鏈之後就鼓起勇氣，連忙急步行上前





「係、係呢，你平時都會留低打波㗎？」我假裝自然地問道，想打開話題同葉子朗講嘢

但當我咁問完之後我就覺得有好似問咗啲奇怪嘢咁，不過算啦，我都問咗出口就算啦

「間中，唔係日日都會。」葉子朗冇望我，只係默默回答道

我地靜咗落嚟，果然我都係冇咁嘅勇氣同佢講嘢，我地兩個又唔熟，好難要搵到話題

「你平時都留喺度做功課？」再次開口嘅人竟然係葉子朗

「係呀，好多時都留低做功課…」我微笑回答道，「喺學校好過喺屋，有啲聲嘛～」

葉子朗嘅表情中夾雜咗一絲愕然，然後輕輕一笑

「嗯，我都覺得係。」葉子朗回答時，臉上掛上了淡淡嘅笑容





我見到佢嘅笑容時有啲愕然，心跳又再次加快咗跳動嘅速度，演奏起激烈嘅進行曲

呢次係我第一次…見到佢嘅笑容，最明顯嘅笑容…我不自覺就定睛望住佢

葉子朗好似察覺到我專注咁望住佢一樣，轉頭轉過嚟望我，我第一個反應，係微笑咗一下

「佢應該冇察覺到啲咩嘅～」我喺心中講道，默默地微微耷低頭，望住手上抱住嘅校褸

佢冇再開口講嘢，我同佢之間隔咗四分之一個身位，我同佢仍然唔太熟，一齊行雖然我會覺得好開心，但我總有啲不自在

當我喺葉子朗面前時樣樣都想表現得最好，我希望佢可以見到我最好嘅一面，我希望有一日可以同佢拉近距離，我希望有一日我同佢可以並肩而行…

「我行呢邊…」我望住喺前面嘅分岔路口，一邊係直行去前面我住嘅地方，另一邊係去另一埋屋苑





以我之前所觀察到嘅，葉子朗通常行到呢度就會行右邊，咁我估佢應該係住嗰邊嘅屋苑

「我另一邊。」葉子朗輕描淡寫地講咗一句

「拜拜，聽日啦～」我微笑同佢揮一揮手講再見，心中有啲失落呀，點解我地住嘅地方同學校咁近㗎…我仲想同葉子朗一齊行耐啲嘛…

「嗯，拜。」葉子朗嘅回覆令我有啲開心，我冇諗過佢會同番我講拜拜㗎，呢樣嘢真係出乎我意料之外

嘻…好啦～其實都唔係「有啲」開心啦～係好開心啦！我嘅嘴角不自覺地揚起，我都要忍唔住笑啦！

我邁步再行嘅時候，我感覺到我嘅腳步都格外輕盈，或者係因為佢好簡單咁同我講咗一聲拜拜啦～所以有啲飄飄然嘅感覺

我嘅步伐變得好輕，我走着嘅每一步都好似有微微跳一下咁，一蹦一跳嘅感覺

我直行踏上番屋企嘅路，雖然要聽日先可以再見到佢，不過今日我終於主動咁同佢講到嘢，縱使我地兩個仍然係有啲尷尬，不過我覺得自己已經好叻，因為我已經邁出咗一大步





希望有一日我都可以同佢慢慢熟絡起嚟，我唔會話要刻意表白，但我都希望有一日可以同佢熟起嚟，以朋友嘅身份又好，單戀者嘅身份都好

「今日真係好Lucky呢～」我沾沾自喜地掩着嘴笑着，真係呀～完全冇忍住笑意啦～

我俏俏地回頭望，仍然可以望到葉子朗嘅身影

我不禁地莞薾，心中突然覺得，其實葉子朗的確冇其他人講得嘅咁差，其他女仔見到葉子朗都唔太中意佢咁，不過有時咁樣仲好～至少競爭者都少啲




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link