［愛情甜故前傳--無糖純愛］曾經嘅我地，都係兩條平行線⋯: 07. 想太多了吧？

沖完涼之後真係舒服晒，啱啱沖完涼出嚟嗰陣順手開咗廳燈

我盤着腿坐喺梳化上，好讓自己感覺好一啲，冇咁孤獨

我開咗電視，手拎住遙控，睇下有咩好睇嘅節目，平日嘅娛樂除咗做功課之外就係睇電視

「睇下綜藝啦～」我自言自語道，然後拎住遙控轉咗台

我突然靈機一動，覺得好似漏咗啲咩咁一下子企起身行咗入房





嘻嘻…我拎漏咗手機啦！啱啱去沖涼嗰陣放低咗手機，我喺書枱上拎起手機，正當我轉身打算出番廳嗰陣，突然「哐噹」一聲 ，好似有啲咩跌咗落地下咁

我頓時聞聲回頭望向地下，默默放低咗手機，蹲低執起從黑色嘅盒中跌出嚟嘅銀色手鐲，若有所思咁拎住手鐲喺手上

「呢隻手鐲好靚呀！係情侶款嚟㗎！」

「好貴啦！唔好買啦～」

「你真係買咗呀？」





「你中意嘛～」

呢隻手鐲，係周樂恆買比我嘅禮物，係我同周樂恆嘅第一樣情侶物…

我蹲喺地上，望住手鐲，呢隻手鐲有我地兩人嘅快樂回憶，但…回憶終究係回憶，過咗去嘅事唔會再番嚟，亦唔可以再重頭嚟一次

「我地都分咗手啦…仲放你喺枱頭做咩…？」我細聲咁講住手鐲講道，「我地都己經過咗去啦…已經冇必要再放喺度…」

我執起黑色嘅小盒，然後將手鐲放咗入去，企起身，拉開櫃桶





喺將滿載兩人點滴嘅手鐲收起前，我緊緊地握緊盒子，合上眼

「希望你，搵到你嘅幸福…」我喺心中許下祝福，緩緩再次睜開眼，將盒子收到櫃桶中

祝福你，係我唯一可以做嘅事

我拎番起手機行番出房，閂上房門，坐番喺梳化繼續睇電視，隨手就拎起手機，然後打開IG睇睇

見到葉子朗Po咗story，唔知點解只係見到佢嘅動態心跳都突然加速了…平日見到葉子朗嘅動態，我明明都唔會太過在意，但唔知點解今日會對葉子朗有啲好奇

我猶疑咗兩秒，但最終都係㩒咗一下有彩色圈圈圍住嘅頭像，一㩒入去見到黑底白字寫住：「Boring」

見到動態入面只有一個咁樣嘅字，我不禁有啲好奇到底葉子朗做緊啲咩

「我做咩要在意佢做緊啲咩呀…」一諗到呢到我頓時喺心中反問自己，「佢又唔係我邊個…」





喺我嘅腦海中又浮現咗今日葉子朗喺球場上嘅英姿

到底佢關我咩事啦！

「又真係幾型嘅…」但我卻不自覺地露出了笑容

葉子朗其實條件唔差，只不過係成績差啲而且對學業冇咩上進心啫

今日坐喺一邊望葉子朗嘅時候，喺葉子朗嘅身上彷佛出現咗淡淡嘅光芒，有着佢嘅自信同個人魅力

去到放學嘅時候再次見到葉子朗喺球場上，今次葉子朗身上嘅光似乎又強咗啲，佢散發住嗰種獨有嘅魅力令人冇辦法將視線移開

「我會唔會真係中意咗葉子朗…？」我心諗，一諗到呢度，我嘅心又開始加快咗跳動嘅速度，彷彿話比我知我對葉子朗真係有啲感覺





我用力搖着頭，然後用手拍咗自己嘅臉頰兩下

「醒下啦方芷諾！係你諗太多咋！」我喺屋企大聲咁對自己講道，「一定係因為靜愉成日叫我搵過一個所以先會咁！冇事㗎！」

唔好再諗啦！唔好再諗啦！

「方芷諾，專心讀書先係最重要㗎嘛係咪？」我挺直腰板，然後對住空氣講道，「你宜家要努力讀書，今年揀科啦嘛係咪？你要揀到自己中意嘅科嘛！」

冇錯！今年要揀科，我當然！當然！當然！要好努力，比平日更努力咁讀書啦！如果唔係會揀唔到自己中意嘅科

下年我就上高中啦，所以我更加要努力，上到高中就更加唔洗講啦！我要考到間好嘅大學嘛！

方芷諾！上呀！衝呀！感情放埋一邊啦！讀書最重要！

我拍咗自己兩下好讓自己清醒啲，話比自己聽全都是誤會係錯覺，然後又再次乖乖坐好繼續睇我中意睇嘅綜藝節目







IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link