［愛情甜故前傳--無糖純愛］曾經嘅我地，都係兩條平行線⋯: 03. 我的目光好像⋯
我同靜愉一齊緊張咁望住飛向籃框嘅籃球，到底呢一球可唔可以為自己班嘅勝利開一個好嘅頭？
我嘅雙手合十，心中緊張得很，到底呢一球會唔會入呢？拜託…一定要入呀…！
籃球飛到去籃框時直接穿針，冇撞上籃板亦冇喺籃框邊緣圍着轉，而係直接入網
「好型…」我不禁衝口而出講咗一句，我頓時用手掩住嘴，望一望靜愉
靜愉仍然專心咁睇緊比賽，似乎聽唔到我講嘅嘢
望住跑緊去我地班嗰方嘅籃架下做防守嘅葉子朗，心臟瞬間漏了一拍似的
葉子朗喺籃球差唔多到籃框前已經轉身跑咗去回防，證明佢對於自己嘅射球好有信心
或者剛才冇人留意到嗰一個有自信嘅時刻，但係我卻望到…
喺葉子朗一臉輕鬆咁跑番去回防嘅時候，臉上掛上了唔明顯嘅笑容，雖然係一個淺得不起眼嘅笑容，但喺笑容裹卻可以搵到喺平日嘅葉子朗身上搵唔到嘅自信
唔知點解，呢一刻嘅我望向葉子朗嘅時候，心臟好似漏咗一拍咁…係我嘅錯覺對吧…？
「啱啱真係好、型、呀！」靜愉感嘆道，然後捉住我嘅手搖咗兩搖，「你有冇睇到？」
「嗯…」我呢一下先回神過嚟，但眼裏仍然留意住喺場上跑嚟跑去跑葉子朗，「睇到…真係好型…」
啱啱明明喺籃球場上有好多人跑嚟跑去，但我好似…淨係見到葉子朗一樣…我都冇見到其他嘅動作咁…
直到比賽完結嘅嗰一刻，我好似都冇望到其他人，好似幾乎大部分時間都係不為意咁就留意咗葉子朗，好似冇睇過其他嘢咁
「完場～我地班又贏咗啦～」靜愉企起身，伸咗個懶腰
喺球場上睇比賽嘅人都陸續離去上番課室，我企起身同靜愉一齊執起佢地食完嘅午餐嘅包裝袋
「又番去上堂啦…」靜愉一臉頹廢，同啱啱積極睇比賽嗰個佢完全相反
葉子朗同隊友一齊行緊去更衣室換衫，我不自覺地望咗佢嘅一眼，心臟跳動嘅速度莫名其妙咁快咗少許
我即刻微微耷低頭唔再望向葉子朗，然後同靜愉一齊行番上課室，雖然心中對剛才嘅感覺有啲疑惑…
「個心又會跳得咁快嘅…」我一邊行上樓梯行上樓梯，喺心中一邊喃喃自語着，我感覺到心跳比本來強烈咗少許，「可能係我嘅錯覺啫～冇事嘅～」
午膳之後係班主任課，不過課室裏嘅大家似乎都冇察覺到上堂嘅鐘聲已經響起，仍然繼續吵鬧
我托住腮發呆望住黑板，葉子朗換番校服行入課室，唔知點解我又不為意咁望咗佢一眼
葉子朗徑自走到自己個位坐低，我偷偷咁瞄咗佢一眼，然後自然咁抬頭望一望佢
「佢真係好cool咁…」我假裝不經意地望向葉子朗心諗，今年其實係我同葉子朗第一年同班，「佢平時都唔講嘢嘅…好似好冷漠咁…」
唔…其實我同葉子朗一啲都唔熟，雖然都已經同班咗半年，但係諗番起，我地之間講過嘅嘢真係一隻手都數得晒：
「通告。」
「冇。」
「哦。」
係，就係呢三句…我係班上嘅班長，品學兼優，成績名列前茅，係老師眼中一等一嘅好學生，呢啲係軌實嚟，我冇故意喺大家面前吹捧自己幾有本事㗎！
而葉子朗呢？成績差、唔讀書、上堂瞓教，雖然好少唔番學，但係喺老師眼中係壞學生嘅存在，我亦唔係刻意踩佢，呢啲都係鐵一般嘅事實
呢個時候其中一個班主住Miss Yiu行入嚟，我地學校係雙班主任制，只不過係因為另一個班主任Miss Li放緊產假所以唔喺度
Miss Yiu一入到嚟課室，就直接大聲咁叫葉子朗個名，我都比Miss Yiu突然嘅大叫嚇親，但睇嚟Miss Yiu又要鬧人
「葉子朗，你嗰份英文功課呢？你今日6點之前好交去簿櫃比我啦吓！」Miss Yiu企喺老師枱前面對住葉子朗講道，「你今日放學之後同我留喺課室做埋份嘢先好走！」
「哦。」葉子朗只係一臉不耐煩咁哦咗一聲
「Venus，出一出嚟。」Miss Yiu望向我，叫我出去嘅時候神情都突然變得愉悅，果然老師都係識變面
我見Miss Yiu啱啱發完火都唔敢慢慢出去，我頓時放低手頭上嘅嘢行出去，企喺Miss Yiu旁邊
「你今日放學有冇嘢做？」Miss Yiu溫柔地問道
「冇。」我微微一笑搖搖頭
「咁就好啦，因為今日呢我要同中六班補課，所以麻煩你可唔可以幫我將中一嘅Notes釘好呀？」Miss Yiu微笑問道，「嗰疊教材因為未印好，所以我未擺出簿櫃，但我放學之前會擺喺出面，咁你放學喺嗰度拎啦～」
「哦好呀，冇問題。」我點一點頭，然後正打算轉身行番埋位嘅時候，見到Miss Yiu又望向葉子朗
「葉子朗你唔好走咗去呀！」Miss Yiu一對住葉子朗，態度即係180度轉變，「我叫咗Venus今日幫我手做嘢，你今日冇留喺課室就知死呀！」
我望向葉子朗，只見葉子朗無奈咁反咗個白眼
IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link