幸好，路上有你: 6

王傲軒走進一間酒吧，環顧四周，她依然不在......

失望地走到吧檯前坐下，點酒。

「Leo，又嚟啊？你呢排嚟得好密下喎！」一個身穿黑色襯衫的男調酒師說。

王傲軒回應：「我喺到等人。」

Leo是他的英文名。他已連續四晚來到這酒吧。





「等人？獵食咋掛？」調酒師笑謔道。

又露出齷齪的笑容說：「點啊？老老實實，睇中邊條女？我幫你調杯between the sheets，今晚去執番劑！」

王傲軒無奈說：「我真係等人，只不過等咗4日都等唔到。」

調酒師一邊將酒遞給王傲軒，一邊說：「我實信你㗎！」

王傲軒聳聳肩，說道：「唔信就算。」





接着拿起酒杯小酌一口，威士忌的嗆辣感一湧而上。

他的確在等人，在等Heidi。這間是Heidi 常來的酒吧。

他想跟Heidi 商討邱逸帆的事，其實他可以電話私訊找她。

但這個有點荒謬的請求，直接面對面說會更好。

面對面交談能夠觀察到對方的反應，進而調整自己的説辭，相比電話傳訊有較大機會說服對方。





可惜，他等了四天都未見到她......

突然，一個女人走近王傲軒，在他旁邊坐下。

他看過去，是個濃妝的妖嬈女性，身着白色低胸雪紡裙，長白的美腳一覽無遺。

她自我介紹說：「Hello，我叫Jenna ，小朋友有冇興趣同我飲返杯啊？」

她的目光從王傲軒的臉龐往下掃，胸部、腹部、直至於下身停留。

意思不言而喻。

王傲軒不禁失笑，看樣子Jenna起碼都三十歲了吧，他才十七歲啊！

這絕對是老牛吃嫩草，他也沒有那麼隨便。





「Sorry，我今晚有嘢做。」他拒絕說。

Jenna遺憾說：「咁真係可惜。」

依依不捨地看着王傲軒，似是看見美味佳餚，想把他拆拆骨入腹。

她不甘地離開。

調酒師說：「Leo，你竟然咁堅決拒絕Jenna。莫非你真係唔係嚟食女？」

王傲軒不解道：「我都話咗係等人。就算係食女，都唔會應承啦，我睇Jenna起碼都30歲。」

「車！三十歲又點，佢靚未得囉！佢最鐘意搵啲後生𡃁仔，大把仔一聽到「小朋友」三隻字，就即刻急住證明自己唔係。」





王傲軒了然。

他也是個玩得開的人，但性行為應該要謹慎一點吧？

對方有可能有性病啊......

***

他無所事事地喝了一陣酒，時間快到兩點。

又再一次觀察四周，Heidi 始終沒有來。

心中暗嘆一口氣。

回家吧，雖然明天是星期六放假，但他還是早些睡，明天早起溫習。





王傲軒一口將剩餘的酒喝光，起身準備走。

正當此時，一個穿黑衣的女生走到吧檯。

「一杯Cosmopolitan，唔該。」

她輕柔聲音讓王傲軒迅速注意到，正是Heidi。

他勾起微笑，太好了，今天沒有白行一趟。

王傲軒坐到Heidi 旁邊，說道：「Hello Heidi，我係邱逸帆嘅朋友，Leo。」

Heidi 詫異，沒想到邱逸帆的朋友會找她，問道：「你好啊Leo，你搵我咩事？係邱逸帆嘅事？」





王傲軒開門見山說：「係啊，我就唔兜圈講。我有個不情之請，你會唔會考慮幫邱逸帆補習？」

「下？」Heidi 不明所以，一時之間腦袋運轉不過來。

雖則這個請求聽上去荒謬，叫一個網友出來補習，但王傲軒相信Heidi 有可能答應。

是因爲他看啊帆和她的對話，不是曖昧，而是一種關心照顧的感覺，似是在看侍一個弟弟。

所以他才有信心Heidi 會答應。

王傲軒接着說：「係咁嘅，啊帆佢冇咩目標，但係又唔點讀書，就快考dse，我唔想佢遲啲後悔。」

「我唔係覺得一定要讀大學，但佢而家未諗到將來嘅路向，咁讀大學就係最應該做嘅嘢。」

「我唔知點勸佢，怕佢更加反感。佢對你特別上心，所以就嚟問下你。有時人對唔係一直喺身邊嘅人，反而更加放鬆。」

Heidi 耐心聽他說完，慎重地考慮。

因為邱逸帆是Chloe 的學生，她看侍他也是像師弟、表弟般的態度。

多天的對話下，她發現這個青澀少年真的很討人喜歡，與他聊天總會忘記時間的流逝。

加上從對話中，她亦知道了邱逸帆的家庭背景，他家人很少陪伴他......

若能幫助到邱逸帆，她也是願意的。

Heidi 良久才開口說：「我好樂意幫邱逸帆。但我讀音樂系，雖然當年公開試成續都唔差，不過去補習社嘅成效一定好過搵我。搵我反而會耽誤咗佢嘅時間。」

王傲軒見對方樂意幫邱逸帆，心中大喜，說：「你放心，重點係你嘅說話，可能會令佢有讀書嘅心。反正佢去補習都唔會認真聽。」

Heidi 喝一口酒，說道：「咁嘅話我冇問題，希望可以幫到佢。」