甲賀奇俠: 32.解碼師
翌日，周五
「咔..」
紗理依打開破舊的鋁門，走到天台上
此時，克哉和美波已經早在天台等待紗理依
「五十嵐老師你搵我呀？咦...山內同學都響度既？」
對住仿佛知曉一切的紗理依，克哉開門見山
「尋日我同山內遇到左兩單兇殺案，死者全部都被一種...好似蠶絲的物質綁住」
「而牆上...仲留住左『まきもの』」
「...所以你就覺得，對方係百鬼眾成員，目標係你手上既卷軸，係咪呢？」紗理依已經搶先回答
「...」
即使克哉不回答，也代表點頭同意
紗理依圍住兩人慢步
「咁...請問搵我做咩呢？ 我明明只係個女高中生黎咋喎~」
「喂！唔好咁好喎」
美波忍受不了紗理依的裝傻
克哉接住再道
「你上次講既合作...我接受」
「我同你一齊對付百鬼眾，但你...要講出解開卷軸既方法」
「呵呵...睇黎你真係好在意大家既安全喎，真不愧為甲賀奇俠！」
紗理依停在克哉的面前，握出右手：「合作愉快啦，五十嵐老師~」
克哉無可奈何下，只好同樣遞出右腕，與紗理依握下合作之手
「根據你頭先所比既情報，落手既...就係百鬼眾中既高手，小次郎」
紗理依道：「佢係一個擅長用蟲既忍者，唔單止可以用腦電波控制昆蟲攻擊，仲有一種類似蠶絲的物質，名為『蚿』既合成物，既可束綁獵物，亦可斷石分金」
「比起上次襲擊學校既三太夫等人仲要犀利」
「所以，今次你唔同我合作既話，你既勝算非常低」
「咁你....有咩計劃？」克哉問
紗理依淺笑一下
「我地應該先諗下，我地一方到底有咩優勢...」
「我地..有對方想要既卷軸」美波輕聲叫道
「噠！」
「無錯啦，山內同學」
紗理依捻彈手指後，再度兜圈：「只要我地早一步解開卷軸，我地就可以反客為主，要脅返百鬼眾轉頭」
一邊聽著的克哉，也點一點頭
「你話過...你有解開地圖既方法，係咪？」
「係呀，不過個方法唔響我度」
紗理依收起笑臉：「係響一個叫森川八郎的手上」
「森川...八郎」
「佢係德川幕府既建築師森川一雄既後代，森川一雄同時亦係製作呢一份卷軸地圖既人」
紗理依道：「佢既後人，自然都識得解碼方法啦」
「咁...我地可以響邊度搵到佢？」克哉問
「嘿，我緊係有辦法揾到佢，先會同你講有方法解開啦」
紗理依向兩人展示出一本殘舊的記事本
「呢本係我地服部眾首領，用黎記錄當年響幕府內做事既人響倒台之後既居所，依家定期會由紅龍更新」
「森川八郎，就係住響呢度」
インシティ品川301室
「丫仲有，以防百鬼眾襲擊，我建議你地去之前著定戰衣啦，嘻」
說罷，紗理依就張揚而去
「老師...呢個紗理依...到底信唔信得過架？」
紗理依一離開天台，美波就問：「如果佢都係百鬼眾既人馬，我地咪...」
「呢個可能性比較低，如果佢真係百鬼眾既話，佢一開始就已經可以殺左我，然後利用我既地址搵出卷軸」
克哉拎起紗理依之前給予的紙條，查看地址：「而且，佢有心暗殺我既話，唔會提我拎戰衣...」
「總之，以免百鬼眾再對無辜既人落手，我地放左學之後拎定裝備就去呢個地點啦」
「嗯」
放課後，美波跟住克哉，來至紙條上的地址
地址上的，是一間最普通不過的八層住宅，根本平平無奇
「老師，呢度...真係有可能係果個森川八郎既住所咩？」
一到埗，美波就問：「身為幕府建築師既後裔，唔係應該非富則貴架咩？」
克哉回答美波的多個提問
「倒幕後，基本上所有響江户幕府內工作既人都變返普通人，所以會住呢啲地方根本唔係問題」
「踏、踏」
兩人跟住樓梯，上到三樓
「咪住...」
克哉發覺甚有不妥，伸手示意美波停下
「同頭先二樓唔同，呢一層...靜得恐怖」
「嘭！」
話一說完，現場馬上傳出破窗聲
「聲...係301！」
知道聲音來源，克哉和美波馬上拔足
「砰！！！」
一腳將大門踢開後，只見屋內一片凌亂，似有發生爭執
但最吸引克哉和美波的，卻是面前的一扇被打破的窗口
克哉馬上探個究竟，終於發現
「！！！！」
一個光頭的身影，正抱住一男子，在民居的屋頂上穿梭，瞬間就不見蹤影
「老師！會唔會就係...?」美波問道
「似乎無錯，百鬼眾捉左森川八郎」
克哉按下左手上的黑色按鈕，將手掌拍到地板上
美波一下子就明白克哉的舉動
「哦！你用聲納感應器！」
透過自身研發的聲納感應器，克哉已經鎖定對方的位置！
「山內，戴面具，追！！」「...呃...哦！」
兩人跳出窗外，開始追趕拐去森川八郎的身影
「老師，到底佢想去邊呀？」
克哉焦急得省去隱密的功夫，甚至直接將各屋頂的瓦片踩破
「唔知...但即使係陷阱，我都要追，否則就會失去森川八郎既下落」
二人一路跟住聲納，到達品川車站
「嗡嗡嗡...」
聲納追蹤到，一個高速的身影已經進入一架不在服務的列車的車廂
「佢入架無人揸既電車度做咩呢...?」
「踏！」
克哉和美波同時進入車內
「老師...點解無人既...」
內心的恐懼壓過疲勞感，美波已經無暇喘氣了
克哉拔出配刀
「聲納反應黎到呢度就停左...好可能對方...就係為左引我地黎」
「呃...呃呃...！！」
列車突如其來開動，使美波差點倒下
「嘩！」
「果然冇錯，佢既目的就係特登引我上車！」
「咔！隆隆隆...」
此部沒有乘客的列車竟駛入月台的路軌上，向住橫濱的方法前進