【真人真事改篇】《有一種距離，是HKU和IVE仔的距離。》/《初戀2000天》: 第七章 「像我的天職　早注定 只可將　別人伴侶　護送往返」〈司機〉

https://www.youtube.com/watch?v=SPn115Ybp6E
第七章上
        直至他走到自己跟前——是Raymond。
        「Sunbathing呀？」Raymond調侃曬得張不開眼的Jessie。
        「你點知我在係到？」Jessie一臉驚訝地說。
        「我問Angel咪知囉，佢話你好唔開心咁衝咗上黎洗衫，早餐都未食。」Raymond背靠著欄，閉起眼享受著陽光的洗禮。
        乜Angel啱啱係房咩？睇黎我真係嬲到火遮睇，連佢都睇唔到⋯⋯Jessie心想。
        「眼紅紅咁，同男朋友嗌交呀？」Raymond看著Jessie的眼睛說。




        「太曬咋嘛⋯⋯你穩我做咩？」Jessie開始覺得熱，想回房間了。
        「琴晚我最後贏咗，所以我黎拎獎品囉。」Raymond伸出手掌。
        「呃⋯⋯我銀包係樓下，我依家去拎⋯…」Jessie有點驚訝地看著Raymond，沒想到他竟會追債追上門，真動身準備去拿錢包。
        「喂喂喂，我講笑咋，張飛免費架，我黎比飛你咋，你今日有無堂呀？無嘅話一陣宿舍等？」Raymond連忙叫停認真的Jessie。
        「咁好！有免費飛，」Jessie心裏不禁慶幸昨晚沒去看，「不過我一陣有補習呀，文化中心等？」
        「好呀，一陣見。」

        星期四的晚上，沒有幻彩咏香江，也不是週末，人流並不多。
        「Sorry呀，啱啱補習遲咗落堂。」Jessie跑得上氣不接下氣，瀏海也被迎來的風吹亂了。
        今天的Jessie穿了一條白色A字和酒紅色的短袖貼身衫，掩蓋了她沒自信的大腿，突出了她傲人的身材。




        「唔急，你頭髮都亂晒啦，」Raymond伸手替Jessie整理凌亂的瀏海，「我仲以為你係為咗買禮物比我添。」
        「啊⋯⋯」Jessie頓時這才記起今天是Raymond生日，抱歉地說：「對唔住呀，我請你食飯呀？」
        「本來我都諗住我就係諗住約早少少，可以去附近食D野，但依家仲有十五分鐘就開始。」Raymond看著手錶說。
        「唯有睇完再食？」
        「好呀，咁我地入去先。」Raymond紳士地替Jessie推門。
        也許是這套劇太有名，即使是星期四也坐滿人。由於是隨機的學生票，Raymond和Jessie坐了在右側的中後方。
        入場後不久，燈光漸暗，大家都聚精匯神地盯著舞台，Raymond則看著Jessie期待的臉。
 
        「我開頭以為套戲真係講〈羅生門〉，原來係〈竹林中〉。裏面無乜實體佈景，而係用好多形體動作黎表達，我好鍾意佢咁湛新嘅演繹。」Raymond和Jessie在文化中心外的海濱討論著。
        「係呀，個導演拎過最佳導演架，好犀利！仲有盧智燊D戲真係好好睇，遲D仲有套叫福爾摩斯咩⋯⋯華生⋯⋯」Jessie努力回想前兩天在Facebook看到的那張帖子。




        「〈福爾摩斯四圍騰之華生暴走大狗查〉？我都想睇！」Raymond一臉激動地看著Jessie。
        「係呀！你點知嘅？我超鍾意睇同福爾摩斯有關嘅所有戲！」Jessie想不到會找到和他一樣愛看舞台劇的人，興奮得抓住Raymond的手臂。
        那種心有靈犀的感覺，頓時拉近了Jessie和Raymond的距離。
        「你終於開心返啦。」Raymond說。
        「我不嬲都好開心架喎，開心唔一定要笑架嘛。」Jessie鬆開手，倔強地說。
        Raymond知道Jessie不想說，馬上轉移話題。
        「我都有Like佢地Facebook page留意住佢地D戲。下次我有飛再穩你，約定你啦！」Jessie興奮又期待地點點頭，「甩底請食飯！」
        「驚你呀！」Jessie滿滿自信地說。
 
        本來Jessie答應了請Raymond吃生日飯，可惜當二人出來的時候，食肆都已陸續關門。
走著走著，二人不知不覺來到一檔賣街邊小食的店，Jessie的肚竟打起鼓來。
        「一係我請你食街邊小食放題！」Jessie得戚地蹙起眉頭。
        「呃⋯⋯生日食小食放題，你有無誠意架？」Raymond嫌棄地說。
        「你估小食平架，一串都十幾蚊架，你嗌多幾串就過百架啦。」Jessie認真地指著價錢牌說。
「我講笑咋，咁新穎嘅提議，好！一於食到你窮。」Raymond笑著說。




        「一兜大牛雜，一串燒賣，一串魚蛋，一條司華力腸，煎釀三寶，加多個印尼撈面，啊，仲要罐可樂呀唔該。」Raymond一口氣點了一大堆食物。
        Jessie一臉驚訝地看Raymond。
        「你話生日放題架嘛，係咪開始識驚呢，太遲啦。」Raymond對Jessie搖著頭說。
        「我講得出就做得到，任食！我要一串炸豬大腸，一串燒賣、一底雞蛋仔同一罐可樂呀，唔該。」Jessie看著油鍋裏香噴噴的豬大腸說道。
        「估唔到，你竟然都鍾意食炸大腸，我都好鍾意食架！但好少女仔鍾意食，好多都驚污糟！」Raymond對著小食店大喊。
        「其實我都驚污糟，細個時我媽成日嚇我，話裏面有好多屎，我食腸就等於食屎，」Jessie愈想愈噁心，又接著說：「但自從一次我練完波，我男朋友買過比我食之後，我就返唔到轉頭啦，我覺得炸大腸好好食！」Jessie的眼神充滿閃爍的光芒——專屬吃貨的光芒。
        「咦，乜你都打籃球架？睇唔出喎！」Raymond難以置信地看著一臉文青的Jessie，「都話今日係你男朋友整喊你架啦！」
        「都話唔係！」倔強的Jessie還是不想讓Raymond看到自己的傷口。
        Raymond看破世事似的看著Jessie。
        「係啦，係啦，你叻啦，咩都比你估中晒啦。」Jessie知道再反駁也已無用。
        「做咩事嗌交呀，等我依個戀愛專家比D意見你。」
        「專家？你拍過好多次拖咩？」
        「傳說中嘅HKU A380，」Raymond一臉得戚地說，「講笑咋，一、兩次囉。」
        「下，一次就一次，兩次就兩次，你點一兩次？你拍過半次拖？」Jessie認真地問。
        「今日我生日，我話一兩次就一兩次，OK？」




        「收錢先，一共一百七十八蚊。」小食店老闆娘突然打斷了二人的對話。
        當Jessie正準備拿錢包出來付錢時，James卻掏出兩張百元紅鈔遞到老闆娘手上。
        「唔係講好我請架咩？」Jessie疑惑地問道。
        「哇，咁平嘅生日飯，我咪好蝕，我先無咁蠢。」Raymond邊說邊接著老闆娘找的錢，「你仲爭我一餐生日飯。」
        「咁我咪爭你好多野⋯⋯」Jessie若有所思地喃喃細語道，「你聽日幾點落堂？我請你食晏補數啦。」
        「哇，原來你係想借D倚想見多我一日，所以今日先唔送禮物。」Raymond一臉「你古惑啦」的表情看著Jessie。
        「我只係唔想爭你野姐，你唔好ff太多！」Jessie不自在地不斷眨眼睛。
        「好，有人請緊係好架。」Raymond回答道。
        「哎呀，唔好意思呀，得返一罐可樂⋯⋯可樂肥呀，你地兩個飲一罐啦，我比兩枝吸管你地。」老闆娘把冒著水氣的凍可樂放到透明玻璃櫃上。
        兩人一臉黑人問號地看著老闆娘，可老闆娘忙著應付客人，沒空理會他們的反應，馬上拿出兩枝飲管，「野食仲炸緊，等等呀。」
        Raymond無奈地聳聳肩，馬上打開可樂，手把兩枝吸管插進，遞給Jessie。
        Jessie喝了一口，便放了下來，臉上無甚表情，大概又想起了James。
        算，氹唔到你講，氹你笑都一樣姐，Raymond心想。
        「從前有個杯蓋愛上咗枝吸管，然後杯蓋問吸管點解我地唔可以係埋一齊？咁究竟點解呀？」Raymond問。
 




        「因為吸管插唔到入杯蓋？」Jessie猜。
        「No！」Raymond繼續說：「吸管答杯蓋：『因為你係Bad guy。』哈哈哈哈，係咪好好笑！」
        好凍嘅爛gag⋯⋯Jessie本來並沒有覺得很好笑，可是看到Raymond那笑得像白癡一樣的樣子，還是忍不住笑了，「有無話講過你笑起黎好似白癡？」
        「拿，笑下咪好囉，靚晒！」Raymond用手指撐起Jessie的嘴角，「要Keep住呀！」
        「你地要嘅野食，依到豉油、辣椒醬、芥辣醬都係晒到啦，慢慢。」老闆娘還拿了幾袋小食、一兜牛雜和印尼撈面出來。
        飢腸轆轆的Jessie沒有理會，馬上在熱乎乎的炸大腸上擠上滿滿的甜醬和芥辣醬，急不及待地放進口裏。
        「啊，好熱呀！」Jessie在放進口的瞬間便後悔了。
        「你係咪傻架？」Raymond看著Jessie傻瓜似的用手對著嘴巴扇，嘴角還沾滿芥末，活像個小孩子，忍不住笑了出來。
        Raymond掏出紙巾，替Jessie輕擦髒了的嘴角。
        受寵若驚的Jessie瞬間被突如其來的體貼定格了，瞪大眼睛看著Raymond，心跳竟加速起來。
        不知所措的Jessie馬上拿起可樂來喝。
        「呃⋯⋯你飲咗我戈枝，雖然我唔介意你同我間接kiss。」Raymond不懷好意地看著Jessie，然後靠近Jessie的耳邊說了句：「你放心，我唔會話比你男朋友知，依個係我地兩個嘅專屬秘密。」
        曖昧的粉紅泡泡頓時在二人身邊火速冒起。
        「咳⋯⋯咳咳咳！」聽完Raymond那句話，Jessie差點沒把隔夜飯都吐出來。
        「哈哈哈，你好可愛。我講笑咋，唔好咁激動。」Raymond輕拍Jessie的背，笑得不能自拔。




 
        吃飽後，兩人堅持坐巴士回去，結果坐了幾乎雙倍時間才回到去，還要走一段路才到學校。
        「呀，我聽朝要上半八，要買定聽朝早餐，你等我陣。」剛巧經過7-11，Raymond走了進去，很快便拿著兩盒牛奶和一袋咖啡面句出來，「我今日無帶袋，你介唔介意擺住係你到先？」
        Jessie大方地打開背包，把東西放了進去。
當兩人正漫步回宿舍時，剛巧碰見一位打扮火辣的女生。
「Raymond！見到你就啱啦，我上次漏咗對Bra係你Hall，你會唔會得閒拎返比我？」女生對Raymond說。
Raymond臉上的笑容頓時僵住了，眼神盡是問號。
OMG⋯⋯聽到這樣爆炸性的問句，Jessie咽了咽口水。
        「呃⋯⋯我Roommate急Call我添，我走先！」Jessie看著二人，一臉我不妨礙你們的表情，馬上急步離開了。
        Raymond想追過去，卻被眼前的女生攔住了。

        唔通佢真係A380？
        回到房間，洗完澡後，Jessie一邊執捨背包，深思這個問題時，發現Raymond剛才買的東西還在自己袋裏。
        呀！Jessie的內心吶喊著，究竟要不要現在送回Raymond房間？萬一他和漏Bra女正在⋯⋯
        想到這裏Jessie就非常崩潰，但只要想到要餓著肚子上八半，感覺就很不好受。
        Jessie還是決定把早餐拿回給Raymond。
 
        走到宿舍的男生層，Jessie馬上聞到一股男生的酸臭味，她用手掩著鼻子，走到走廊盡頭的315。
        Jessie深呼吸了一口，正打算敲門之際，房裏傳來了一把女生的聲音。
        「你試下再入D。」
        「好入啦喎，我Feel到我已經頂到最盡⋯⋯」男生用力地說。
        「再入多少少，就有架啦。」女生激動地說。
        OMG⋯⋯Jessie腦裏浮現各式各樣的畫面，愈想愈讓人面紅心跳，讓她實在聽不下去了，馬上放下早餐就回到房間，和Angel分享這勁爆的消息。
        Jessie走了不久，Raymond對面的房門被打開，一位黑眼圈重得像熊貓的高高瘦瘦的男生走了出來，看見地面放了兩盒新鮮的牛奶和面包。
        他看看走廊，一個人都沒有。
        唔通係個天想支持我繼續打機，賜比我嘅？那男生心想。
        男生露出一個心滿意足的表情，把那份本屬於Raymond的「早餐」拿回房間，繼續他沒日沒夜的打機之旅。
 
        第二天中午，剛上完三節課的Jessie正獨自走回宿舍，腦海還在重播昨夜的畫面。當她正思考著Raymond與「漏Bra女」的關係，竟迎面撞上一雙柔軟的胸膛。
        「Sorry呀，我⋯⋯」Jessie摸著額頭，抬頭一看，是 James。
        「你點解會係到架？」Jessie驚訝地看著James。
        「對唔住呀寶貝，我知錯啦，唔好嬲我啦。」James把Jessie抱在懷裏，繼續說：「我知我唔應該亂發脾氣，仲無主動氹返你，搞到你咁唔開心。」
        Jessie嘗試掙脫James的懷抱。
        「放開我，依到人來人往，我唔想係到同你嘈。」Jessie醒覺自己不及James大力，只好放棄掙扎。
        「你唔原諒我，我唔會放開手。」James緊抱著Jessie。
        「你唔放開我，我唔會原諒你。」
        「唔得，放開咗你就會走，我唔放，除非你比我上去。」
        「你唔鬆手我點比你上去？」James才終於鬆開了手。
        Jessie嘆了口氣，往宿舍方向走去，James緊跟著她。
       
        「你返黎啦？」坐在書桌前的Angel對說。
        看到黑面神似的Jessie，Angel馬上猜到二人還未和好，識相地說：「我落一落Library借書先。」
        這次Jessie沒有阻止Angel，她確實需要一個只有他和James二人的空間。
        Angel走了之後，James馬上從後緊抱Jessie。
        「對唔住啦，寶貝，我只係太愛你，怕你比其他人搶走先會咁緊張，先控制唔到自己，我知錯架啦，你原諒我啦。」James挨在Jessie的肩膀說。
        果然，Angel講得無錯，Jessie心想。
        「你知錯，咁點解你過咗兩日先黎氹返我？你明知我會唔開心，明知我唔鐘意嗌隔夜交，但你依兩日連個say sorry嘅message都無呀！」
        「咁我都會唔開心架嘛，我只係唔想再同你嘈落去，我都需要D時間同空間消化依樣野。」James解釋。
        「只係借本書你已經咁樣，咁之後點算？人，唔係男就女，我同你都會識到愈黎愈多異性，你唔可以次次都咁樣。我只係想有我嘅U Life，我就係在乎你嘅感受先會問你意見，但你有無理過我嘅感受？」Jessie想起又開始生氣。
        「我知道係我太誇張，所以我反省咗啦，我唔會架啦，對唔住呀。」James凝視Jessie的眼睛，擺出一副像小孩般無害的表情。
        「你夠話過你反省過，以後唔會再走八半堂，結果呢？」James沉默了
        Jessie繼續說：「中學，你話過會努力同我考DSE，一齊入U，結果你日日都打機。我同自己講，唔係人人都鍾意讀書，只要你有目標，你會努力。結果呢？明明你畫畫咁叻，點解你唔努力？點解你依然日日打機打到半夜，訓到黃朝百晏？⋯⋯James，我同你都唔係中學生啦，我地成年人黎架啦，你可唔可以諗清楚，你其實究竟想點？」Jessie看著James那張孩子氣依然的臉，不禁嘆氣。
        James這次沒有說話，只默默從背包拿出一幅A3 畫紙對摺而成的卡，遞到Jessie手上。
        封面是一幅水彩畫，畫中人是正穿著體育課的James和Jessie，背景是郊野公園，二人肩並肩，手指擺出一個「V」的手勢，眼睛笑成彎成月牙狀，一臉稚氣。
        那是中六中學旅行日，他們到大欖郊野公園時，一位熱愛攝影的同學替二人拍下的照片。
        那簡單清澈的笑容，實在叫人懷念。
        Jessie常說想擅長畫畫的James把這幀照片畫出來，可James每次口裏說好，身體卻很誠實，像張沒有署名的支票，他的承諾總是無法兌現。
打開卡片，裏面還有寫滿一張A3紙的情話和承諾。
        「中學填Jupas嘅時候，你問過我一樣嘅問題，到依家我嘅答案都係一樣，我想娶你，同你結婚。」也許是太年輕，在James口中說出來，一切好像無足輕重，「我知道，我係小朋友，成日掛住玩，成日諗野唔成熟，但我愛你依點從來都無變過。係我衰，成日咩都比藉口自己拖，今次唔會架啦。你信多我一次呀。」James把Jessie擁入懷裏。
        Jessie的怒氣瞬間蒸發成霧氣，在眼眶凝結，匯聚成一顆顆感動的淚珠。
        Jessie緊抱James，忍不住在他懷裏哭了起來。
        「對唔住呀，唔好喊啦。」James摸著Jessie的頭髮，心疼起來。
 
        其實Angel剛才做完Assignment，根本不用去借書，她正躊躇著該往哪去好的時候，聽到Lobby傳來一陣哀號聲。
        Angel走近一看，是一位身材火辣的女生，旁邊的是⋯⋯Raymond？
        「大佬呀，Bra你又攞咗啦，房又Check埋，八半堂又跟埋啦，成12個鐘啦，你放過我啦。」Raymond看著連繫著二人的手拷，一臉快要哭出來的表情。
        「唔得！你一日唔話我知Kelvin係邊，我都要跟住你！」女生堅持說。
        哇，個女仔好索，大波、細腰、長腰齊晒⋯⋯唔通佢就係Jessie琴晚講戈個漏Bra女？Angel看著都忍不住咽了咽口水。
        「你係到做咩呀，鬼鬼鼠鼠偷蕃薯！」一把突如其來的聲音把正在鬼鬼祟祟地站在二人背後的Angel嚇了一跳。
        原來是Jacky。
        「欸，Angel你都係到。點呀，穩唔穩到Kelvin呀？」Raymond看著Jacky說。
        「我緊係！」Jacky頓了頓繼續說：「穩唔到啦。你Roommate去咗邊你都唔知，我點知？」
        「佢係你莊員黎架，你有無愛架，點會連佢去咗邊都唔知架？」Raymond拉住Jacky，質問他。
        Jacky用看神經病的眼神看著Raymond。
        哇，貴圈真亂⋯⋯Angel的腦海開始為眼前的畫面編撰劇情。
        看著Angel一副貴圈真亂的樣子，Raymond連忙解釋：「嗱嗱嗱，我同依個女人唔係你諗嘅咁架下，佢係黎穩我Roommate Kelvin，佢穩唔到Kelvin就拎我做人質⋯⋯但，Kelvin係唔會黎救我架，你放過我啦。」
        「我穩唔到Kelvin就拎你黎填債！」漏Bra女兇狠地看著欲哭無淚的Raymond。
        「唔係喎，Jessie話佢琴晚仲聽到你地話咩，入D，再入D就到。」Angel疑惑得皺起眉頭。
        「Oh My God!佢幾時黎過？點解我唔知架？」Raymond驚訝得張開了口。
        「琴晚你D早餐漏咗佢到，佢特登送到你房門口添，你無收到咩？」Angel問。
        「無喎⋯⋯琴晚依個女人漏咗個Bra係Kelvin到，不知穩咗幾耐，最後係佢床底到穩到，咁我咪伸入去撩，佢幫我睇位咋。」Raymond想到Jessie聽到後，崩潰得抱著頭，雙眼緊閉，一臉頹喪。
        Angel這才發現Jessie誤會了Raymond。
        「唔得啦，我要走啦」Raymond著急地說，「不如我地輪更呀，你依家放過我，鎖住Jacky先，等我食完飯就即刻返黎輪更啦好無？」Raymond拉住Jacky手臂，哀求旁邊的女生。
        Jacky馬上嘗試掙脫，可根本不及充滿肌肉的Raymond來。
        「你約咗邊個呀？係咪Kelvin！」女生瞪大眼睛看著Raymond。
        「佢約咗溝咗成個月嘅組女。」Jacky報復似的揭穿Raymond。
        「你講緊⋯⋯Jessie呀？」Angel問。
        當Jacky準備回答Angel時，Raymond把Jacky撲倒，手掌掩著他的嘴巴。
        真係此地無銀三百兩⋯⋯Angel搖搖頭。
        「唔洗輪啦你，佢男朋友黎咗穩佢，我都比人趕咗落黎，你可以繼續挾持佢。」Angel托了托眼鏡說。
        聽到消息的Raymond頓時停止了手上的動作，Jacky馬上趁Raymond鬆懈之際跑走。
        「Angel，玩唔玩Switch？我咁啱空堂，我地一齊玩呀，有好多隻Game架。」Jacky拿起Lobby的Switch控制器遞到Angel面前。
        「好呀，」百無聊賴的Angel馬上點點頭，「有咩Game玩？」
        Raymond還未反應過來，就看見Jessie挽著一位男生的手走了下來，臉上甜蜜的笑容是Raymond不曾見過的。
        Jessie眼中只看到那男生，完全沒有留意坐在沙發的他們，就往大門走了。
        明明佢琴日先為咗佢喊，唔開心咗咁耐，點解今日就連約咗我食生日飯都唔記得？Raymond心灰意冷地躺了在沙發，像失去靈魂的軀體，放棄了掙扎。