港女穿越記: 14

日子就這樣，不好不壞，平平淡淡地過了半年，亞傑與月兒的感情愈來愈深厚，但兩人最親密的接觸都只係輕輕擁抱，因為大家都清楚進一步的發展，後果未必可以承擔。因為古代重視忠貞，未婚戀愛會受人唾罵，甚至浸豬籠，如果他日覺得唔適合而分手，女子可能成世都嫁唔出。所以兩人都將發展的念頭收起，保持著不遠不近的距離。
 
一個風和日麗的早上，亞傑同王林如常去市集擺攤，發覺城內各人紛紛交頭接耳，互通消息，糧店漸漸堆滿人。機警的亞傑估到有大事發生，即刻叫王林去打聽，自己則開始收攤。
 
當王林神色慌張回來，告知敵軍已經打到附近城鎮，假如該城失守，不出十日就會嚟到，所以大家都開始低調咁購糧，準備去其他城投靠親人。亞傑盡力保持鎮定，回憶過去幾個月與月兒商討過的對策，隨即吩咐王林騎驢車返去山寨通知月兒，自己就去萬花樓搵季大娘。
 
季大娘已經得到消息，戰敗的機會極高，所以聽日一早就會隨同商隊去南邊，雖然亞傑同隨後嚟到的月兒極力邀請佢去寨中，但季大娘知道自己的姑娘，唔係咁容易同其他人相處，而且又唔肯 /唔識做家事，逃難去南邊，買幾個僕人照顧佢哋終老就算喇。
 
離開萬花樓之後，亞傑同月兒等人分批去買糧食、布料同藥材，佢哋呢段時間，每半個月就會搜購一批存貨運去寨中，所以今次想買多D，店主都好合作，價錢只係比平時貴兩成，佢哋今次仲喺布店採購所有成衣，男女老少的都買齊，因為唔知戰事會幾耐，期間會遇到咩人，故此做足準備。
 


最後佢哋再去買各式各樣的日用品，基本上係見到任何嘢都買一兩件，直到驢車放滿哂，男人們的背筐都裝滿，佢哋就返去山寨，點齊人數之後，王木同王林兩兄弟就將幾套成衣、被舖、米麵、清水、柴火，放去山腳下，早兩月搭建的小木屋。
 
起呢幾間小木屋係山寨各人合力的，佢哋知道戰亂時，除咗會封寨，更會開啟機關封山，以保障寨中安全，但佢哋又唔忍心見死不救，於是諗出呢個方法，至少有幾處遮風擋雨的地方，難民們有地方援一援，就有更大的存活率，遲來人士或者難民間的爭奪等，就唔係佢哋可以控制了。
 
當王木兄弟完成木屋的佈置返到山寨時，就將一早預備的機關打開，然後將山寨的出入口都封上，只留下後門的一條通道，(當然，另外有月兒呢個寨主先知道的秘道)，月兒將所有人按照之前的演習，分為4組人，每組輪流當值4小時，主要係在各個瞭望台監察寨外各處。
 
敵軍比預期中更快嚟到，第六日的早上，王森就發現有十數個敵軍經過山下的小路，但奇怪的係，佢哋冇騎馬，只係緩慢地前進，雖然佢哋略為偽裝，但王森依然睇得出佢哋身上帶有兵器，佢叫一同當值的人通知咗月兒同亞傑後，就繼續觀察。但之後一直冇其他人喺小路上出現，佢哋分析結果，可能呢十幾人係探子，果然兩日後的黃昏，當值的人就見到五六個人策馬出城，當晚接近子時，就有大批兵馬出現，直衝入城，當時城門已關上，城牆上的士兵一直放箭，但敵方的士兵彷似源源不絕地向前衝，突然一聲槍鳴，眾敵軍分兩邊退開，一個士兵拉開其中一架車的布，露出一台大炮，月兒同亞傑剛才聽到槍聲就知道不妙，見到大炮就更加肯定敵軍一定會成功。
 
月兒轉身向眾人道：「快，大家掩耳!」眾人不知原因，但紛紛跟隨月兒的動作掩耳，幾十秒後，「轟隆」聲響了約四五下，就聽到大軍的歡呼聲，亞傑再次上瞭望台觀看，發現城門已炸開，敵軍已衝入城。大約半個時辰後，所以敵軍都已進城，呢個夜晚，無人知道死傷多少，但只知道又一個城池失守了。
 


翌日一早，敵軍再次出現，佢哋情緒高昂地直衝下一個城鎮，王木提議入城了解情況，眾人都被佢呢個念頭嚇親，而家只怕躲避不及，點會走向危險處呢。但小蓮竟然支持佢，道：「而家城內想必混亂異常，可能各處都被搜括了，但爛船都有三斤釘，我哋可能喺城內執到各種財物呢。」
 
「娘子，你實在太聰明了。」王木驚喜地道。