[靈異] [愛情] [我同條女敦倫外傳]我屋企養左隻女鬼...: 最終章: 下一世我們再相見吧!
我聽到後亦慢慢忍唔住流下眼淚。
「樂兒，我都好愛你…但你唔好再講啦，再講我真係會唔捨得走…」
「走咩？你想走去邊？咁你咪唔好走，邊個批准你走…」
「唔得架…我繼續留係度只會影響得你更深，我今晚就會去投胎、我唔再係一隻鬼。」
「投胎？投左胎你會去邊度…」
「投左胎我就會去到下一世嘅我，重新以一個新嘅靈魂開始我嘅人生，呢啲就係輪迴轉世。」
「唔得呀，我唔可以俾你走，我唔想再得返自己一個…」
「點會得你自己一個，你仲有朋友、仲有個b，佢大過一定會好似我咁對你咁好咁錫你。」
「總之呢，我走左之後你一定要好好保重生存落去，你唔好再諗住做傻事，你要笑多啲快啲淡忘我開始你嘅新生活。」
「仲有啊，你唔好再諗住開陰陽眼，你陽氣會散失得好快好影響個胎，加上我走左你就算開眼都唔會再見到我。」
「嗚嗚…」
樂兒聽到我呢番道別都唔知仲可以講啲咩，只有不停地滴下眼淚。
「好啦我夠鐘要走啦，乖乖下，我個樂兒豬係個開心果黎嘛唔好做喊包，你依家喊到眼腫面腫咁冇人要架啦。」
我邊講邊望住佢搣住佢塊臉兩邊啲肉，佢喊到眼都腫晒，
而隔離就已經多左道門出黎，只要我一入去我就正式投胎。
「你唔好走，我要攬實唔俾你走！我邊個都唔要，我淨係要你一個。」
說罷樂兒就向住我錫左埋黎，就當呢個係goodbye kiss吧！
樂兒嘴唇貼住我時好是柔軟、我地彼此喘息著溫暖嘅氣息，我已經好耐冇咁樣同樂兒錫過、係一種久違嘅感覺，
而佢隨之不停流下眼淚，我臉頰亦不知不覺地被佢沾濕，仿佛想用kiss留低我…
打左陣茄輪後，佢的確仍然抓住唔俾我走，然後我就將自己身體變成虛擬化，樂兒即刻變成攬空氣，
而我亦都企左起身正慢慢走向道門，我靠近道門後佢自動打開左門正等待我入行入去，裡面同樣係白色一片。
「阿洋你唔好走呀，我要走我要跟埋你一齊走！」
說罷樂兒亦都起身想跟埋我入去。
「你係人你入唔到黎架，裡面只係接受鬼魂。」
佢追左上黎想抓住我，但佢根本乜野都掂唔到、掂到嘅只有一堆空氣。
慢慢地我就進入左門裡面嘅空間，當樂兒都想跟埋入黎時，佢即時被彈走、就好似門口都多左一層保護罩。
「唔好走呀嗚嗚…方伯洋，我呢一世都唔會忘記你，我愛你…」
跌倒在地上嘅樂兒好無助地繼續邊喊邊叫我唔好走，然而隨著佢嘅哭泣聲門亦開始關上。
「唔好喊啦樂兒，你要快啲振作過新生活、我都唔會忘記你，我愛你…！」
說罷門就正式關上，我再都聽唔到樂兒把聲、見唔到樂兒嘅身影，我呢一生所經歷嘅一切就隨著呢道門關上而結束了…
當門關上後，呢度嘅環境開始由白茫茫一片變得陰暗、直至變到漆黑一片我咩都見唔到，然後我不自覺地合埋眼意識就慢慢地失去了…
.
.
.
.
好靜…
好靜…
嘟…嘟…嘟…
唔知過左幾耐後，我由寧靜中聽到類似醫院心跳機嘅聲有頻率地不停響著、而周圍亦開始有光線映入我眼簾，我慢慢打開雙眼，
發現前面有一張病床、上面瞓著一個老婆婆，佢白髮蒼蒼、臉上好多皺紋同唔少嘅老人斑，老婆婆被好多不同嘅喉管插入皮膚，隔離亦擺著好多儀器仿佛正幫佢吊命，
而我只係一個小朋友，身邊有幾個大人陪伴住我，但佢地神情顯然係顯得憂傷、有啲甚至係喊緊…
「賢仔，過黎俾太嫲望下你…」
我聽到太嫲叫我後行到佢身邊、佢把聲我聽得出係好虛弱，而其他大人仍然係一旁憂傷緊。
「太嫲。」
「賢仔乖，太嫲黎緊就要去一個好遠嘅地方去陪太爺，你一定要聽爸爸媽媽話、唔好咁百厭。」
「大過之後一定要勇敢啲保護你身邊嘅人、好好珍惜好好愛佢地，唔好好似太嫲後生咁利用人感情，會有報應。」
「嗯，知道啦太嫲。」
「但你話去搵太爺，我一直都未見過佢，佢係點嘅樣架？可唔可以帶埋我去搵佢？」
「嗰度唔俾小朋友去架，淨係俾太嫲我去。」
「咁你幾時會返返黎？我要太嫲你繼續陪我去公園玩～」
「太嫲唔會返黎架啦，我會以後都係嗰度陪住太爺，所以先叫你一定要聽爸爸媽媽話。」
「唔制呀太嫲，你一定要返黎，你帶埋太爺返黎啦…」
說罷我開始忍唔住喊左出黎。
「賢仔乖乖，你唔係話想睇下太爺咩樣嘅？見你咁好奇我就俾你睇下。」
說罷太嫲就從衫袋中掏出了一張殘舊嘅相，係一張係遊樂場影嘅相、後面有一坐城堡，有一男一女，女嘅正撓著男嘅嗰隻手。
「嗱，呢幅就係太嫲同太爺以前係迪士尼影嘅相，左邊嘅係我、右邊嗰個就係太爺，太嫲我以前真係好鐘意你太爺架，可惜我好耐先正式同佢一齊。」
哇原來太嫲以前後生咁靚，而太爺個樣亦都唔差、係一個大哥哥嘅樣，只係佢個樣好似好怕醜咁。
「咁太爺佢叫咩名？」
我好奇之下想知埋太爺個名，由細到大太嫲都好少向我提及太爺嘅野。
「佢個名叫做方伯洋。」
當太嫲提及呢個名後，我身體突然震抖左一下以及fing 左下個頭，我記返起晒以前嘅回憶…
「賢仔？做咩事？」
「樂兒…」
「賢仔，你做咩冇啦啦叫太嫲個名…？」
對於我突然叫樂兒，佢頓時感到唐突，我估佢應該好耐冇聽過人咁叫佢。
「樂兒…我記起晒以前嘅野。」
「你係…阿洋？」
太嫲呢刻激動到流下了淚水，身體蠢蠢欲動想起身攬住我，但生理情況並不允許佢咁做。
「嗯。」
「點解…點解你會係賢仔身上出現？我好掛住你…」
「我都唔知，啱先一睇完幅相我就記返起晒我地以前嘅野。」
「我估我應該係投胎左落呢個身軀度，然後你俾我睇完我地合照仲要叫埋我名後就幫我喚醒左上一世嘅記憶，我都好掛住你…」
「原來係咁，你真係阿洋，估唔到過左咁耐我仲可以見返你。」
「嗯，我都估唔到我仲可以見到你，但點解你已經咁老？你仲要啲手腳插晒喉嘅…？同埋邊個係賢仔？」
「傻仔，你真係唔知時間過得幾快，你死左65年啦，我依家都83歲。」
「人老左身體就自然多毛病，幾年前醫生話我患左cancer，仲要已經末期。」
「前幾日我暈低昏迷左送左黎住院，到左今日醫生話我唔得架啦，叫家人係今日做好心理準備，所以佢地黎晒醫院陪我見最後一面。」
65年！？我明明入左道門後好似只係瞓左一陣，然後我就醒左，點解會咁快過左65年…？一切就好似我坐左一轉時光機。
「而賢仔就即係你個曾孫，亦即係你依家呢個身軀。」
「曾孫？呢個係我個曾孫？即係你成功湊大左我地個仔、仲成功繁衍到第4代，咁呢65年你過成點？」
「嗰日你投胎後，我醒左先知發緊夢、我喊到床濕左，但原來一切都係真，你真係唔再係度，我之後一直都冇再見過你身影…」
「一年後我地個仔出世，我改左佢個名叫方展洋，我展望佢日後性格可以好似阿洋你咁，跟住落黎嘅日子我都同我地個仔過。」
「我好唔容易先將佢養大，佢果然遺傳左你，佢好孝順、又好識照顧人同保護人，見我唔開心又會氹下我笑，雖然我地兩母子相處得都算開心，但冇左你係度就硬係缺少左啲野。」
「而我可能實在太愛你，咁多年我都放唔低你，我冇再同其他人一齊過、有男仔追我都冇受。」
「亦因為咁我每日都會放定幅我地嘅合照係我衫袋，去到邊我都會拎出黎睇下，就好似你依然係我身邊阿住我。」
「你真係好傻，明明你嗰陣仲有大好青春做咩唔搵過一個男朋友、做咩要幫我守寡…」
「只因為我太愛你，我咪講過淨係愛你一個、呢一世都忘記唔到你。」
說罷我亦流下眼淚。
「嗯…我都講過唔會唔記得你，我做到左…」
「但你個衰人，要我掛左你65年係我臨走之前先出黎見一見我，你冇心肝呀。」
「對唔住要你掛左我咁耐，冇諗過我同你只係一齊左短短5個月就令你掛左我65年，我以為咁短時間你會用時間沖淡到…」
「講笑咋，依家可以俾我臨死前見到你一面已經好滿足，我自己都估唔到有生之年仲可以見到你。」
「我話過唔會忘記你就唔會忘記你，證明時間沖淡一切呢個理論係唔成立，就算俾多10年我都仲會咁掛住你。」
「人生真係好奇妙，以前我睇住你係我面前離去、仲出席你葬禮，到65年後就輪到你睇住我離去同出席葬禮，呢啲算唔算風水輪流轉？」
「樂兒對唔住，呢65年要你辛苦了…」
我邊喊邊輕撫著佢嘅臉孔。
「唔辛苦，我要經歷嘅都經歷晒，我已經行到人生嘅終點，我捱唔到好耐、我好快都會好似你以前咁…死去、投胎，然後我就可以解脫…」
說罷樂兒突然露出痛苦嘅表情，右手黯住自己個心口不斷喘氣，隔離部心跳機心率亦不斷下降。
「樂兒...?」
「阿洋，我…我唔得啦，我係時候都要走，曾孫仔...曾孫仔就靠你守護住...」
見到佢依家咁痛苦我都頗為難受，睇黎我即將就要同樂兒告別、呢刻將會成為我同佢嘅最後一面。
「果然歲月真係不留人，點解個天要咁遲先俾我出黎見你...見住你咁痛苦我心都唔好受，可能解脫真係會令你舒服啲...」
「既然係咁，樂兒，你....你就好好上路啦…我應承你，既然我投胎左落賢仔度，我之後一定會令賢仔好好過日子，繼續唔會忘記樂兒你…」
然後我抓實樂兒隻手向佢承諾。
「嗯，有你呢句...就放心...」
你...你唔好再怪...個天，我地呢個...時候...仲可以見到已經...好好，希望下一世...我地可以...再做情人，永…別啦…」
「嗯，希望我地下一世依然可以成為情侶嗚嗚…」
嘟…
說罷樂兒就此失去了呼吸，心率機心跳亦都降到0，只聽到一下長嘅嘟聲，
雖然大家都為今日做好了心理準備，但我同房內所有嘅人見到呢一刻仍然瞬間哭成了淚人，佢唔單止係一個好媽媽、仲係一個好嫲嫲、好太嫲，吸引了所有人對佢的喜愛。
就係咁我上一世所熟悉嘅人都唔係度了，包括阿盈、樂兒、老母、唐生、阿誠等，上一世所經歷嘅一切以及同老母嘅戰鬥亦相繼結束，
而我竟然好好彩地投胎左係我個曾孫身上，以前我叫樂兒展開新生活、佢做到了，由今日起就輪到我呢個新生命展開新生活，但願我同樂兒下一世會再度相遇、重新認識。
《我屋企養左隻女鬼…》全故終
後記：
終於完到故啦！呢篇故我花左好多時間黎寫，有賴各位支持我先可以順利完結，其實呢篇故嘅構思早係5年前已經諗左出黎，只係嗰陣我先啱啱準備落筆寫敦倫故，未有閒暇理呢篇住，到之後因為冇時間而閣置左，直到上年年尾我終於有時間專注落筆去寫，去到依家我終於可以完到當年嘅夢、完到我當年仍然只係初步嘅靈感、將成個故仔寫晒出黎，希望日後我仲有機會再次重出江湖寫更好嘅故俾大家睇！