[靈異] [愛情] [我同條女敦倫外傳]我屋企養左隻女鬼...: 大變化

「因為佢本身陽氣唔多唔少，100分入面佢大約有70分，因為嗰次殺氣唔強，加上佢陽氣有返咁上下所以見佢唔到，但上次後巷同鬼行近左之後佢陽氣已經降左少少。」

「去到今次因為佢陽氣少左，加上軍營殺氣十分強，咁樣佢係一定會見到啲鬼。」

「但佢啲fd都見到又點解釋？」

「其實嗰度殺氣咁勁，陽氣稍為低少少都會見到佢地，我估佢啲fd陽氣睇怕都唔高得去邊。」

「原來係因為佢陽氣降低左仲去左一個殺氣咁重嘅地方先見到然後遇難。」





「都怪我，如果當初我唔帶佢周圍去後巷見識，佢仲點會對靈異野增加左興趣、跟住又點會同人地去軍營探靈，一切都係因為我佢先遇難。」

「你唔好咁怪自己啦，係佢一開頭死都要拉你行去啲後巷咋嘛，佢仲要對先人不敬先會咁。」

「總之都係我唔好啦。」

「你好好架啦，起碼佢一出事你即刻去搵佢救佢出黎，你已經盡左你嘅努力，先前係佢任性冇人管到。」

「同埋好彩陽氣少左俾佢見到班皇軍咋，咁樣佢都仲可以搵地方避開佢地，見唔到嘅話唔定已經有咩三長兩短。」





阿盈見我又開始內疚mode後即刻講啲野安慰返我。

「都係，最緊要佢依家冇咩事返到屋企。」

「後日我會應樂兒約陪佢去迪士尼散心，我要同唐生請個假先，話唔定嗰日佢諗清楚會確實咁俾答覆我。」

「啊…啊…啊。」

說罷我打左個喊露。





「你今日攰啦，時間亦都唔早，快啲去沖涼瞓教啦。」

唔講我都唔記得咁夜我仲未沖涼，呢刻我先聞到從件衫散發出黎嘅汗臭味，然後我就入左浴室沖涼。
.
.
.
好快過左兩日，呢日樂兒一早就約我出門一齊去，今日佢嘅造型令我眼前一亮，係完全換走左佢以往mk嘅形象，

佢著一件純白色T-shirt、一條黑色短皮裙配一對黑色短boot；腰間唔再孭𠝹波袋，而係換左做一個膊頭孭嘅手袋；髮型亦唔再係齊陰，而係整左做91分界，

呢一刻嘅佢靚左好多，可謂更上一層樓，性感得黎又成熟，仲十分有氣質；可能係佢件T-shirt太緊關係，顯得佢對波好浮凸、條腿亦十分白滑，想吸爆我對睛咩，但點解佢今日會有呢個大改造…？

去到迪士尼後，呢度一如概往咁多人，佢同樣係同我城堡下影完幅相就好雀躍地去Antman館度玩，而咁樣亦證明佢對腳真係冇晒事已經行得走得，

但唔知點解我覺得影相嗰陣佢好似想故意疏遠咁，雖然佢依然表現得好開心，但佢冇再好似上次咁撓住我手，感覺有一種距離感…





「頂我又低分過你添。」

係Antman館玩完一次後，我又發覺唔夠樂兒勁。

「哈哈唔緊要啦，你已經進步左開始追到我，等陣我地再玩過，你俾啲心機一定可以超越我。」

我係咪發緊夢？佢竟然冇對我爛口串鳩我？變相佢依家連言行舉止都好似好成熟、冇再少少事就嘈嘈閉，仲會鼓勵我，

聽落咁樣好似幾好，但就彷彿象徵住我地嘅關係疏遠，好唔慣、好唔慣佢突然對我好左咁多，佢啲mk妹特質呢、去晒邊？我想佢好似以前咁串我屌我打我…

然後我地再好似上次咁去玩左過山車、係一個上次同我有親密接觸嘅機動遊戲，可能期望越大，失望越大，一切並冇如我所料，

好奇怪，佢今次冇再覺得好驚地撓住我隻手、簡單啲講係冇任何接觸，只有一個緊緊地抓住扶手尖叫，可能佢已經克服左過山車嗰種驚，但我覺得佢對我已經變左，變得冇再之前咁Close…





之後玩嘅每一日樣機動遊戲就算佢驚都好都冇再撓住我手，迷離莊園、森林坐船等佢亦睇完笑下就算，對我並冇特別親密行為；

而談吐方面亦都冇左昔日嘅巴渣、霸道、爛口，佢一直都keep住禮貌斯文嘅形象、好是成熟，直到天色入夜我地準備離開，

雖然成熟嘅女仔係吸引，但我寧願佢變返以前嘅佢，我唔想依家同佢變得咁陌生，我好想佢繼續打我鬧我同我鬥嘴，我真係好鐘意佢，但依家睇黎一切都已經成為過去式…點解佢可以一下子180度改變左咁多…

呢一刻我真係好想佢再撓住我隻手、好想佢同我Close啲，但我並冇資格，我係佢眼中可能只係一個普通朋友；

自從我向佢表白後，我甚至可能連一個普通朋友都已經做唔到，所以我並冇呢個特權叫佢撓住我，見到呢個轉變但我又咩都做唔到呢個情景我真係好心痛…

「咦樂兒你睇下，呢隻豬仔嘅款新出架喎，你想唔想要？我買俾你。」

我地好似上次咁離開前係大街啲公仔舖度睇下公仔，我想繼續買下公仔俾佢令佢開心。

「唔洗啦，我屋企已經大把公仔唔洗再買，你嘅好意我心領，同埋我唔想再洗你嘅錢。」





「明明我去你屋企都唔算好多公仔咋嘛，邊度多公仔… 唔緊要架嗰少少錢算啲乜，你想要嘅我咪買俾你，最緊要你開心嘛～」

我呢刻知佢係想推開我，已經疏遠到連金錢上嘅付出都變得唔想，真係好陌生…

「同埋經過公仔店你之前唔係都會買啲野架咩，你話當手信嘛，仲要有新款好靚好得意喎，你俾我買俾你當禮物送俾你啦。」