[靈異] [愛情] [我同條女敦倫外傳]我屋企養左隻女鬼...: 營救行動(中)

我環顧一下四週，呢度磚頭散落一地、成個廢墟咁，而牆壁都係用紅磚所砌成，

然後前方隱約出現左一條走廊，走廊入面牆上都好有規律地燃點著一枝枝蠟燭、而蠟燭同蠟燭之間都係一間間嘅牢房，猶如監禁犯人嘅地方；

而走廊裡嘅牆亦都係用紅磚築成，有一種復古嘅感覺，與其話走廊不如話係一個山洞…

點解我會覺得呢度有種熟悉嘅感覺，呢個場景我好似係邊度見過，但明明我未黎過呢個地方。

「阿盈，唔知點解我覺得呢度有似陳相識嘅感覺，但又唔記得幾時見過呢度。」





「其實…其實呢度咪就係我係夢入面差啲殺死你嘅地方嘻嘻…」

阿盈難以啟齒且感到罪疚地講出呢個我咁熟悉嘅地方係邊度，當講出黎後，我立即就記起呢度係邊度，

我覺得好神奇，以為夢入面啲場景係假，原來現實真係有呢個地方…

「我記起啦，嗰陣我好驚咁行左入去後，你就係我後面出現，跟住就用好悽涼嘅叫聲叫我還返條命你添，嚇到我。」

我斜望住阿盈講返啲舊事，夢入面我同阿盈係敵人；當現實同佢黎到呢度時，我地已經係兄妹，有一種化敵為友嘅感覺。





「估唔到你仲記得咁清楚，咁嗰陣嘅我仲未俾你喚醒嘛，sorry囉。」

「但你係點樣係夢入面做到有呢個場景？」

「我好似冇同你講過，其實夢入面個場景係我塑造出黎架，就好似你係電腦P圖咁，為嘅就係營造一個恐怖嘅氣氛。」

「而呢個場景我係生前上網見人去呢度探險睇返黎，我將佢copy放左係夢，然後牢房入面嘅女仔都係我加插落去，其實啲女仔全部都係我黎。」

我依家先知原來當初夢入面幕後嘅製作過程係咁，一切都盡在佢嘅掌控之中。





「怪唔得我嗰陣就算點跑都走唔甩，原來全部都係你嘅局。」

「但就奇怪，夢入面場景你就話可以佈置，咁依家呢度著住嘅蠟燭係邊個佈置？唔通有人？」

我突破盲腸地問出左一個就算睇電影都唔會在意到嘅細節。

「我以前上網搵返黎幅圖嘅場景就有點燃住蠟燭，我估呢啲蠟燭應該係鬼魂點著，而唔係人為。」

「即嗰啲皇軍？」

「冇錯，依家我都係第一次親身黎到呢個地方。」

「唔講咁多住，襯依家冇皇軍係度，我地快啲搵下Chole係邊度。」

說罷阿盈就帶住我係前方搜索，我地每經過每一間牢房都會望一望入去，





然而每一間牢房裡都牢禁住一個衣衫襤褸嘅犯人，有啲甚至係死狀恐怖嘅屍體呈現眼前，今次所見到嘅野唔再係一個‘P圖’嘅場景，佢地應該都係鬼魂，我地靜悄悄地行過盡量唔好騷到佢。

「呢間牢房我感應到有少少陽氣！」

我地繼續小心咁深入地牢，去到一間牢房面前阿盈竟然feel到呢度有人嘅氣息，我向裡面一望，場面當場嚇我一跳，

係一具被人劈左個頭落黎嘅屍體，地面、以至牆身全染上了一片片血漬，但除左得具屍體其餘嘅就只有一張床、一張被同一個裝住屎嘅屎塔，並冇其他人係度。

「你確定佢係呢度？我見唔到有其他人係度。」

然後阿盈行前幾步再返返黎答我。

「嗯，前面同後面我都再感應唔到陽氣，只有呢度有少少。」





說罷我就再留意一下入面，好快我就將目光放左係張床，唔通Chole姐匿左係床下底？

「我可唔可以叫下佢？我覺得佢可能係床下底匿埋。」

「你細細聲叫下啦，佢呢具鬼魂屍體冇咁快復原、對你冇影響。」

「Chole姐、Chole姐你係唔係度？」

然後我就細細聲咁叫左Chole姐幾聲。

叫完幾聲後床下底慢慢地探出一個頭，係Chole姐！

「方...方伯…真係你…？你終於黎啦？我好驚…嗚嗚…」

Chole姐一見到我第一時間激動到喊左出黎，而我都好滾動，我終於搵到佢！睇黎個傻妹頭先一定係經歷左啲野所以先咁驚。





「Chole姐你真係係度，你唔洗驚，我依家即刻入黎救你！」

然後我推左推道鐵門就開左，原來佢並冇上鎖，但點解佢唔出黎？

「方伯，我拗柴行唔郁，我真係好驚…呢度真係好恐怖嗚嗚…」

「依家唔係驚嘅時候，快啲俾隻手我，我拉你出黎。」

道罷我將Chole姐拉出黎，我同佢搭住大家膊頭經過具屍體慢慢咁行出去。

「巴架呀路…」

當我地出到去後，後方突然傳黎一下呼喝聲然後就係一堆日文，原來係有幾個皇軍發現左我救人，佢地即刻衝上黎試圖抓住我地，但我搭住Chole姐膊頭根本行唔快。





「快、快啲跳上黎，唔好望後面，我孭住你！」

見勢色不對，我唯有轉陣孭住佢加速走，我叫佢唔好望後面，以免俾佢發現阿盈，因為阿盈正正就係後方護住我，

當皇軍接近時，阿盈展現出佢對爪，好快咁將佢地一個又一個擊倒，周圍都散發出好多皇軍嘅煙，但數量並冇因此減少，反而從裡面湧出黎嘅數量越黎越多，

不論阿盈用爪、用氣場嘅衝擊波將一個個皇軍擊倒，但皇軍仍然源源不絕咁湧出黎…