[靈異] [愛情] [我同條女敦倫外傳]我屋企養左隻女鬼...: 後巷的鬼魂
又兩個禮拜過去，我已經放左榜，結果同我諗嘅一樣，啱啱好5科2，亦如我所願咁可以去報讀ive做個ive仔。
而我呢兩個禮拜我都有每日接Chole姐放學，就係事發後嘅第二日放學班女仔同樣有跟埋出黎追數，嗰次佢地仲帶埋條仔出黎對質，但最後都係傾唔掂數要走，我再叫阿盈出黎幫手，Chole姐見到亦對呢件事加深左好奇。
另外我仲時不時會問下佢係咪有野收埋，佢當然一直都話冇，當然都唔少得叫我收皮咪撚理咁多，
但奇怪嘅係佢瘀嗰啲位好完冇耐又會有新嘅位瘀，可以話係有增無減，
問佢點解又瘀左佢都係話係班八婆打佢搞成咁，明明叫佢係學校小心架嘛，做咩仲成日俾佢地打？
出於擔心嘅原因，我委派左阿盈去Chole姐間中學，幫我全日睇住佢唔好俾班八婆恰，
唔好以為好簡單就請得阿盈出山，我要花左好多時間同口水先說服到阿盈幫我，畢竟日日好似返學咁都幾悶。
經過一段時間嘅監察，結果出人意料，班八婆竟然冇恰到佢，最多都就只係背後講下佢壞話篤下佢背脊咁，並冇打佢嘅情況出現，我心諗應該係呢幾日咁好彩冇動靜姐。
直至有一日我如常地去接佢放學，佢隻手又多左幾道瘀痕，而嗰日阿盈根本冇見到佢俾人打，
啲瘀痕係由佢返學開始就已經有，我就知佢原來一直都講緊大話，班八婆根本就冇打到佢，我更加肯定佢一定係有啲野收埋…
除左呢啲咁凝重嘅野，我同Chole姐佢都有開心嘅時候嘅，我繼續以朋友同暗戀嘅身份同佢相處，佢繼續時不時對我有啲小舉動令我心動，因為佢依家放半日有時佢放學會同我去玩。
就好似佢放學我地去睇戲，我其實幾鐘意同佢睇戲，由其係鬼片，因為睇親鬼片佢都會俾套戲嚇到不自覺地撓住我隻手，我就可以借啲意同佢有接觸，
你知佢之前去迪士尼已經係咁啦，一驚就即刻撓住我，每次佢咁樣撓住我我都會心跳加速、感覺好滋味。
除左睇戲我地仲會去唱K，當佢一開唱腔先知，原來佢擁有一把「天籟之音」，佢走晒音都唔單止，仲好多時唱錯歌詞，我笑到碌地，嗰刻先知原來唔係靚女唱歌就一定好聽。
我笑鳩佢嘅後果相信大家都知，就係俾佢打，佢打左我好多下先識收聲，當然到我唱嗰陣都唔好得佢去邊，
一開口唱我首飲歌‘浮誇’嘅時候，好快就走晒音，隨即就到佢笑到碌地，仲俾佢串返我轉頭，其實我地都係一擔擔。
「死柒頭你都唔係唱得好好聽咋嘛，笑鳩我笑得咁撚開心，你唱好啲啦，咪撚唱衰晒我偶像Eason啲歌…」
同埋唔知係咪因為嗰兩日Chole姐見到我召喚阿盈出黎令佢對靈異嘅野大感好奇，
呢排佢都鐘意去啲陰暗嘅地方睇下，佢話想睇下呢個世界係咪真係會有鬼，雖然我冇講個事實出黎，但佢大概應該都估到係關靈異野事。
例如當入夜嗰陣佢都鐘意去下啲後巷睇下，甚至行埋入去，可能佢陽氣唔算少、時運亦相對高，所以佢咩都見唔到，只有漆黑一片。
當然有陰陽眼嘅我就見到有啲遊魂野鬼係度，見慣呢啲野嘅我已經唔覺得佢地可怕，只要我地唔搞佢佢地正常都唔會搞我地。
而沿途仲有全日係學校監察住Chole姐嘅阿盈在旁陪住我地，佢地更加唔敢搞我地，可以話萬無一失，我就當導賞導咁陪佢遊歷下黑暗中嘅後巷囉。
「咦，呢度擺左個神主位嘅？係咪死過人？」
當我地到某一條後巷時，見到前方不遠處地下有個神主牌、插住幾枝香係度、而隔離仲坐住個表情猙獰嘅阿伯係度潑扇，睇黎的確死過人。
「冇錯，通常死左人先會有神主牌係度俾人拜祭，其次就係土地公。」
「你又知？你好似好熟喎。」
「冇，係我鐘意睇意睇靈異野姐，唔多唔少都學到啲返黎。」
「其實係得後巷死啲人都唔撚好得去邊，唔係跳樓死就俾人殺，我覺得佢地呢啲人真係好撚自私，死咪死囉，係屋企死嘛。」
「你跳落黎搞到條街邊度都污糟晒、公眾地方黎喎，咁樣真係好咩，仲會影響到人，一個唔覺意跳落黎澤死多件咪一屍兩命？都on99嘅。」
仆街你個爛口妹偏偏呢個時候係度口出狂言，人地係度架，你講埋呢啲野會得罪死者！
「死𡃁妹，我點樣死關你撚事啊！」
未幾個阿伯真係擰左個頭過黎兇狠咁望住Chole姐，佢仲起身行過黎想郁手。
「呢度死過人架，你可唔可尊重下啲死者唔好亂講野，會得罪亡魂架。」
我語氣重地提醒Chole姐。
「做乜撚野姐，我地依家咪好地地咁企係度冇事，邊忽有得罪，根本咩事都冇，你唔好自己嚇自己啦。」
說罷就有一陣寒風吹過，我倆雙雙打左個冷震，見到阿伯繼續行緊過黎步步迫近，證明佢已經對我地發出左怨氣。
「死仆街，我生前已經爭落周身債搞到妻離子散，點解我死後仲俾你地指責？我要你地不得好死！」
果然佢留露出兇狠嘅眼神誓要致Chole姐於死地，係一隻充滿恨意嘅亡魂。
「點解突然凍左咁撚多，係咪有鬼出現啦？」
「咪你囉仲好講，你亂講野得罪左隻鬼啦。」
「我就係想用激將法睇下係咪真係有鬼，點知真係有動靜，呢招work。」
「你冇撚野下話，用呢啲野黎試？」
「有危險，你地走先，呢度等我拖住佢。」
說罷阿盈見勢色唔對路就上前擋住嘗試說服佢。