［校園/歡喜冤家］火星撞地球,撞撞下就有火花㗎啦: 第七章「海洋公園？？」（上）
「今日真係唔該晒你吖，仲有多謝你...」
吓，余心玥同我講多謝，早知就拎部電話出嚟錄低佢啦
見到天色都開始暗，雖然佢成個男人咁但係始終都係個女仔嚟，咁所以我咪問下...
「喂，你住邊㗎送你番去，我係唔忍心你自己一個女仔番去咋！」
「吓~你擔心我吖？譚梓允，媽咪好安慰你大個仔啦....不過呢，唔使啦我之後約咗麥芷悠吖~」
提到麥芷悠，我突然醒起黃浩輝。呀係呀，呢位麥同學就係上次食飯同余心玥一齊嗰個女仔
「喂余心玥！」
「點呀長氣~」
「你幾時先肯接受黃浩輝，佢真係鐘意你㗎」
突然間，佢塊面黑曬啲語氣仲要勁衰
「我唔會接受黃浩輝㗎」
唔知係咪佢啲態度，我竟然都有少少扯火
「咁你咪離開佢囉，點解你要對佢態度咁曖昧？」
「唔得呀...」
「點解唔得啫？咪好似你以前西我面咁！點會唔....」
「仲之就唔得啦！夠鐘啦！我走啦」
「喂！余心玥！余心...」
我知道自己問咗啲唔應該問嘅嘢，搞到成件事都好薑..但係我真係好嬲，我都係為黃浩輝好咋嘛。
其實諗諗下 ，呢個真係余心玥嘅選擇與其佢揀咗個唔鐘意嘅人玩佢感情，我寧願佢維持依家咁
本身諗住星期一就同佢道歉，結果佢西我面又唔理我因為面子嘅關係我哋成兩個禮拜都冇講過嘢...唉
「點樣呀，小情侶嗌交呀？」
抬頭一望，原來係梁學男。咁我咪將件事一五一十咁話晒比佢知，點知佢聽完勁驚訝
「吓，呀玥嬲？點可能吖，識咗佢五年冇見過佢嬲...」
「我唔知呀... 你話我依家點算...」
「你活動日去氹番佢咪得囉，係啦！呀玥最鐘意飲陽光檸檬茶㗎，你嗰日就喺十二點前跟住佢，個太陽最猛嗰陣塞包檸檬茶比佢就得㗎啦！」
「係喎，後日係活動日！梁學男你真係我嘅救星！！！」
得到梁學男佢指點迷津之後，我就好開心咁孭埋個書包，衝咗去百佳買 ...咦？陽光檸檬茶？
~~~~~~~~~~~~~~~~~~~~~~~~~~~~~
眼前呢條友，叫梁學男係我嘅朋友或者應該話係細佬？因為可能太熟所以我哋嘅關係似屋企人多過朋友。
但係我呢個細佬近排有啲反常，不嬲都好邊緣嘅佢近排竟然同嗰個轉校生friend咗，依家仲無啦啦係到傻笑。唔通男仔係中五先開始反叛期？
「喂！梁學男！你笑咩？」
「呀玥！冇...冇呀，我發現咗啲得意嘢咋」
「乜嘢得意嘢，得意到你好似個癲佬咁係到傻笑，分享下」
「冇呀，你未知得住，做咩，你揾我有事？」
「呀！係啦，你後日係咪同譚梓允，黃浩輝佢哋一齊行？」
「呀？都唔知人哋肯唔肯...不過...嘻~余心玥小姐你對譚梓允有興趣？」
我...我都話佢反叛期㗎啦！呢條友以前咁細粒咁得意，依家高咗大隻咗就係到撩女仔，不過sorry我心入面已經有個人
「冇呀~係呀袖對人哋個friend有興趣咋」
「哦~」
~~~~~~~~~~~~~~~~~~~~~~~~~~~~~
估唔到話咁快就係30號，即係活動日。因為去海洋公園，所以嗰日我着咗一件藍白間嘅T-Shirt搭條牛仔褲就出發。結果一番到班房...
「哇！係情侶裝呀」
佢同我一樣，着咗件藍白間嘅短T-shirt搭條just do it 嘅legging 載咗頂cap帽。佢咁着真係好型，真心講一句直情係我杯茶。
「乜咁啱吖譚生？」
我冇理到佢，因為我唔知點答佢同埋我驚係呢班人嘅傳言之我會對佢....心動。人係一種好容易比人帶風向嘅生物，我唔可以對呢個女仔有任何非分之想㗎，佢係我兄弟鐘意嘅人嚟㗎...
之後我哋上咗旅遊巴，因為學術班同體藝班係分開兩架車,跟住兩種都唔係嘅C班就分開兩組人，所以為免我麻煩全程都係同梁學男同黃浩輝佢哋坐，跟住前面係余心玥同佢個A班嘅friend麥芷悠，之後劉芷韻話冇曬位坐咗喺黃浩輝前面
（係到簡略講一下AB班係體藝班，DE班係學術班，至於C班係體藝同學術都平平均均又或者兩方面都好叻嘅人先入到，至於點解咁分好似話係希望大家喺班際比賽嘅差異唔好咁大喎）
「不如揾啲嘢玩囉~」←余心玥
「你想玩咩？」
「狼人？」←麥芷悠
「四個人你玩乜嘢」←余心玥
「咁真心話大冒險？」←劉芷韻
「佢哋兩個我冇嘢唔知，你啲野我唔想知」←余心玥
「UNO？」←黃浩輝
「你有牌咩...」←余心玥
「點呀大小姐...呢樣又唔好嗰樣又..」
「不如分組做任務？」
梁學男提出咗呢個意見，本身我諗住余大小姐一定ban呢個idea㗎，做任務喎細路仔咩。點知我唔記得，余小姐真係一個細路嚟」
「好吖好吖！兩個人一組？」
「我哋男女一組？我同呀玥一組」←黃浩輝
「唔得~」←劉芷韻+余心玥
「我哋抽籤決定啦，咁公平啲」
如果我一早知個結果我一定唔會挖個窿比自己跳落去....
「我同劉芷韻一組，袖子蜜同黃浩輝一組之後梓允你同呀玥一組」
如果唔係我親眼望到余心玥手上枝黃色簽，我真係以為梁學男玩緊我，不過喺落車前佢喺我耳邊叫我把握機會道歉，咁可能或者都係一件好事嚟嘅
「咁個遊戲玩法好簡單，我哋三組互相出題比另外兩組做，只要喺樂園範圍內唔傷到自己同人哋就得，做到一個任務得一分，最少分要接受另外兩組嘅懲罰」
本來開始嗰啲任務都係啲問下遊客嘢呀，當眾做啲傻仔嘢咁，點知去到十一點嗰陣佢無啦啦話...
「我已經托咗人幫我喺呢個樂園收埋啲任務紙，你哋要喺日落即係五點之前揾番出嚟，如果唔係就當輸！」
都唔知佢係咪動漫睇上腦玩埋啲咁嘅嘢...
「咁好唔公平啫，你兩個乜都唔使做就贏硬喎」
終於有人發現咗呢個問題喇
「咁...咁我哋玩埋一份囉...」
「唔得~啲人係你揾番嚟幫你㗎嘛！我知喇你哋負責阻礙我哋完成任務啦！」
「係係，你鐘意啦玥大小姐」
結果就係因為咁，所以我同呢位余小姐又踏上咗旅程喇。跟住嗰啲任務都係玩下過山車錄音中途大叫咁樣，自從經歷完上次游水浸親之後我以為佢會驚呢啲添。結果佢癲起上嚟我話唔掂佢都仲好生猛咁紮紮跳，不過好彩佢去到晏晝嘅時候終於停咗...
「我好暈吖....不如揾個位坐下」
「都叫你唔好玩到咁恆㗎啦，唉....嗱檸檬茶吖，你拎去散下熱」
「係陽光檸檬茶吖！呀男教你嘅呢？」
「係...係呀。對唔住呀...你唔好嬲啦？」
「做咩啫~我都冇嬲。」
「吓？真係？」
「係吖」
「真係？」
「係吖係吖，不過你以後唔好再係咁問一啲我唔想答嘅問題啦。你咁嘅性格冇女朋友㗎~」
「不過....如果係你嘅話，都可以話比你知嘅...」