《我的MK妹同桌》: 12
除咗要準備呀詩份禮物，仲要準備學校聯歡會嘅禮物，我求其買咗一包媽咪麵，百力滋，熊仔餅，包到靚一靚就算數。
聖誕聯歡會多數都係20號左近，今年都唔例外，自從呀詩同子晴fd咗之後，呀詩間唔時會同子晴一齊返學放學，然後仲有識子晴身邊啲朋友。
今日我自己一個人返學，呀詩份禮物我決定平安夜嗰晚先俾佢。
今日返學校只不過為咗玩，啊⋯⋯仲有個好撚戇鳩嘅節目，就係學校搞嘅咩班際大合唱。
喺聖誕聯歡會當日，中三以下嘅班級，需要成班人上台大唱會，又或者表演咁樣啦，主要唱歌為主。我哋都有為此排練咗一陣，是此活動嘅負責人係班會主席呀Ken，我諗佢係想藉住喱個機會溝女姐。
但偏偏條友好認真咁搞喱個活動，又成日捉住我哋練，放學啦，lunch time食完飯返嚟練。
只係我同呀詩無乜點理姐，有啲女好似好崇拜佢咁。
快快脆胞唱完，就開大食會。
我偷偷地問呀詩送咗啲咩，佢答我：「似condom嘅香口膠。」
前排出咗隻咁嘅香口膠，用嚟fake人，啊⋯⋯又幾有諗頭。
而我交換完，就收到個好撚似condom盒嘅嘢，入面裝住啲香口膠。
呀詩過嚟笑鳩我：「咦，你收到我份聖誕禮物喎，咁我係咪唔洗再送啦？哈哈哈哈⋯⋯」
揚聲而去。
「⋯」
呀詩收到份幾好嘅禮物，係優惠卷。
屌，我拆開仔細一睇，真係condom嚟㗎喎，然後入面放香口膠，我頭先睇錯咗，原來係真重．Condom盒。
好彩係我收姐，呀詩好熟咁搭住我膊頭，問：「驚唔驚喜？開唔開心？」
「定你想收真condom啊？」佢係我耳邊輕說。
「想屌你啊，得唔得啊？」雖然我覺得自己收得唔算差，因為唔知邊條仆街聖誕禮物送報紙，笑到我哋仆街。
「屌囉，用喱盒嘢⋯⋯」然後就係呀詩嘅一陣哈哈大笑。
「喂！」健三煞有介事地走過嚟。
「嗯？做咩事啊？」我仲同緊呀詩係度傾得好開心。
「你過一過嚟先。」然後健三轉個頭同呀詩講，「Sorry呀嫂，借一借強仔嚟用一用，晏啲還俾你。」
呀詩亦都好大方，好豪氣咁講：「唔洗還都得！」
「做咩事啊？拉我出嚟。」係班房入面大家都自由活動，不知不覺成班男仔出曬嚟聚腳。
「哇，咁大陣仗？」我嚇親。
「蕃薯仔諗住一陣同女神表白啊，出嚟幫手集氣啊！」呀Ken號召曬成班男仔。
我心諗，乜班友咁落心落力幫蕃薯仔嘅？屌有女唔自己溝咗先？仲要幫人哋溝？！
最撚搞笑係成班都無女嘅⋯⋯
我知咁樣講真係好不該，所以我都無講出口，後來先知佢哋全部都係義氣仔女，個個都真心想蕃薯仔追女神，喱個故事都真係熱血啦。
唔係那些年我們一起追過的女孩，而係那些年我們一起幫手追的女孩⋯⋯
就連狗公Ken都落心落力幫蕃薯仔，應該係話佢係最上心嗰一個，以佢性格有咩可能會唔想食子晴先得㗎？
我哋成班男仔圍住蕃薯仔一個，搞到好似怡佢咁樣。
傾下傾下，佢準備好份禮物，諗住放學搵個藉口同子晴放學，再約埋佢聖誕節出嚟。
成班人圍係度幫蕃薯仔，係幾戇鳩幾好笑嘅，喱隻好笑並唔係恥笑嗰種，而喺成班人一齊去做一件事嘅熱血。
每個人嘅中學總會發生某啲趣事，如果無乜趣事可言，咁你會揹住青春帶有遺憾咁行埋喱一世。
唔知點解就係會想幫蕃薯仔囉，見到佢舉足不前就會好自然咁想去推佢一把，又唔係求啲咩回報嘅。
喺蕃薯仔喱件事之下，完結喱個聖誕聯歡會，而喱件事係少數男人之間感動嘅事。
我諗啲女人係唔會明㗎。
開始放假，四周圍都係聖誕嘅氣氛，鋪天蓋地嘅宣傳，你唔出街都會逼住話俾你知聖誕節啊，啲高登post，online都有唔少，討論區都有。
呀詩其實無乜點提過聖誕節點過，我哋難得地有默契，咩都無講。
呀詩似乎係等緊我開口，或者係等緊我安排；而我就仲諗緊咩節目好，生怕會搞砸喱個節日。
我loop緊啲高登post，咩「如何約女神出街而不失霸氣」、「同女朋友過聖誕，有咩搞？」
「開房啦」
「聖誕節唔扑嘢有咩搞啊？」
「識食一定要著校服食」
嚟嚟去去嘅意見都係扑嘢⋯⋯
雖然我都好想，但好似無乜機會⋯⋯
本來我期待著老豆老母會話去旅行，因為通常喱啲時候，個情節就係咁啱屋企人出咗去旅行，家姐又或者呀哥又同另一半去旅行，得返自己一個，咁就可以帶條女上嚟啦！
可惜啊⋯⋯我老豆老母話今年唔想出。
「⋯」
我有嘗試過問下呀爸呀媽，今年會唔會去邊度旅行啊？！
「亞洲都差唔多去過曬啦，今年無話特別想去喎。」呀爸一邊睇報紙一邊講，我就知我條賓洲仔凍過水了。
我份人又唔識咩浪漫，唔知點安排先為之浪漫⋯⋯
之前無女又話煩無女陪，依家有啦，反而仲大壓力咗。
到咗前兩日，我問呀詩，平安夜夜晚去旺角定銅鑼灣好啊？
「我無所謂啊，睇你想去邊囉。」佢係電話同我講，語氣平穩得嚟具殺傷力。
「咁食放題好無啊？」我戰戰兢兢地問，每個環節都要小心翼翼㗎。
「好啊。」
「咁我book銅鑼灣？近近地？」
「做咩啊？好驚啊？」隔住個電話，我都好似feel到呀詩係我隔離咁，個心打咗個冷震。
「哎，小小啦。」我心虛地回答。
「老實講啊。」呀詩命令地道。
「咁今次係我哋第一次過聖誕，我驚我做唔好，而且我唔知點安排先好⋯⋯」
我感動嘅係，呀詩願意一步步陪住我行，慢慢教我點樣拍拖，話你知其實佢點諗。
故事聽許多，時不時會聽到人哋嘅故仔，世界有幾大，故事就有幾多。無幾個故事入面嘅主角好似呀詩咁，亦無幾個女仔做到。
「我話無所謂就真係無所謂，知唔知點解我會由你安排？」
「嗯⋯⋯因為你無所謂？」我沒頭沒腦地說。
「你真係戇鳩鳩！」呀詩講嘢真係好直，一言不合屌咗先。
姐係佢係會打完你，然後問你痛唔痛啊？有無事咁樣囉。
「女仔話無所謂，其實唔會真係無所謂，女仔比你想像中更有主見，會想你跟住佢心入面嗰套去做，我哋為咗咁，會出盡法寶。」
我一頭霧水，完全聽唔明佢講咩，唯有支支吾吾，「哦、係啊、咁啊？」
「但我知你有心想好好地過喱個聖誕，之前嘅聖誕，我感覺唔到有幾心⋯⋯」
「聖誕都仲要同成班fd一齊出去。」呀詩抱怨一句後，就無再提了。
「所以點過真係無乜問題，你有喱一份心，已經好夠㗎啦。」感受到喺電話嘅另一端，傳緊過嚟嘅溫柔。
聽到呀詩咁講，我提心吊膽嘅心情即時緩下來。同呀詩一齊真係可以好舒服，可以做返自己，其實咁樣先係最重要。
「咁之後有咩做啊？食完飯。」我原本係想兜話不如去⋯⋯唉，但諗諗下又無地方。
呀詩並唔係咁諗，佢又屌話：「我叫你拎份心意出嚟姐，唔撚係問返我啊嘛？」
係電話入面不停傳嚟仆街仔⋯仆街仔⋯仆街仔⋯⋯
「好好好。」我諗就係啦，真係唔知好嬲定好笑。
好快就平安夜，前幾日係有啲期待，但未去到好強烈，唔知係咪有啲習慣，依家同呀詩出街都唔緊張，唔似第一次出去拍拖咁。
老實講，有時諗返去係幾懷念，幾甜蜜。
今日我都盛裝打扮，將份禮物包得靚一靚，然後出門口。
對於呀詩送啲咩，係佢講話重要嘅係份心意，我就已經諗通了，亦都改變了。
係咪真係收頸巾，都唔係太重要，做人真係唔好忘記背後嘅含意，明明嗰個心意先係最緊要嘅嘢，偏偏我哋會成日忽略。
街上面嘅人熙來攘往，男男女女都好似唔執輸咁，著到鬼火咁靚，真係毒少少都唔會想出門口，無比較就無傷害。
今日我專登提早出門口，去呀詩樓下等佢，俾個驚喜佢。
佢屋企去銅鑼灣都係半個鐘到，所以一個鐘前就係佢屋企樓下等，又唔係未上過去，咁我諗住都係等20分鐘左右，咁其實都唔算好多，真係佩服自己咁聰明。
好死唔死，係我等緊呀詩嘅同時，見到呀彥係公屋嘅門口行出嚟，兜口兜面撞到正。
屌你老母，佢都仲係咁撚MK，著住MK棒球嬲，又係嗰對例牌converse，不過就高筒版囉，個頭會gel起佢是必然的吧。
而嗰陣時係仲未興棒球嬲，我後來先發覺越來越多人著，所以話當其時係MK界行係潮流嘅尖端。
因為我之後都有買咗件，哈哈哈！
重點係個呀彥睥住我行出嚟，我都唔輸蝕，睥返佢轉頭。我以為佢會做啲咩又或者講啲咩啦，點知無喎，睥撚完就走咗。
我諗條友都係同第條女去過聖誕㗎啦，要打要屌嘅都做齊啦，最緊要呀詩都脫離佢嘅魔掌，我都無謂搞事。
不過一路以嚟都係佢搞鳩我同呀詩囉⋯⋯
係我食住風嘅同時，褲袋嘅電話傳來幾下震動，係呀詩打嚟。
「你係邊啊？」佢把聲聽落有啲焦急。
「我啱啱出門口。」
「下？咁快？」唔撚是掛？
「你等我一陣啊，我就嚟搞掂啦。」呀詩急促地說。
「你慢慢啦，唔急。」為咗要俾個驚喜佢，我唯有咁講。
收咗線，又過咗半個鐘，百無聊賴嘅我，只好不停係公園度拍下蚊，捉下蟲咁。
呀詩終於係門口出現，我無即刻行動，我要佢察覺到我。
仆你⋯⋯
佢望都無望到我，只見佢急急腳咁係我面前行過，我見到佢咁，心入面莫名其妙地甜蜜起上嚟，見佢真係好緊張咁，唔想遲到，心入面好自然覺得佢重視喱次約會。
我睇得出呀詩有化妝，本來已經唔差嘅佢，化咗妝成個人嘅氣息出曬嚟，加上佢今日著咗條嬲屌裙，上身著住有毛毛嘅開胸帽T，對鞋我唔知咩嚟，小高筒靴？唔知。
呀詩手上面拎住袋嘢，我諗應該係我今日份禮物啦。
我一路尾隨住佢，突然諗到樣幾好玩嘅嘢。
我打電話俾呀詩，佢好快就聽。
「喂？你到邊啊？」我chock咗把脾氣唔好嘅聲線。
「嚟緊啦，就到！仲有幾個站。」我就嚟忍唔住笑出嚟了，頂你仲有幾個站你都講得出？你至少6-7個站以上啦。
「我等咗你成個鐘啦！食風都食到飽啦？」
講完喱句之後，呀詩就開始跑，一邊跑一邊扮曬鎮定咁話：「Sor啦，一陣錫返啦！」
「我唔要一陣啊！我要依家！」
「依家邊得啊，咪玩啦⋯⋯」
「你唔洗跑啦，你望下後面先啦。」我忍唔住笑出聲了。
「你又知⋯⋯後面？」呀詩拎住部電話，轉個撚頭咁搵我，好快就俾佢搵到了。
露出個既無奈又覺得好笑嘅表情，然後攤攤手，行過嚟。
真係傻妹嚟。
「玩我好開心啦！？」呀詩止不住笑意，我更因為玩佢而負上惡果，皮肉之苦少不免啦。
「少少啦，哈哈哈！」
「邊個叫你成日玩我姐，等你玩我邊得㗎。」我將呀詩打我嘅手捉住，然後拖住佢。
「咁你真係要我等好耐啊嘛。」我如實地抱怨道。
「男仔等女仔好正常姐！依家叫你等半個鐘咪算係咁囉。」佢頭先明明唔係咁嘅態度⋯⋯頭先明明係驚我嬲。
「你Book咗幾點啊？」焦急嘅呀詩問道。
「8點囉。」
「屌你咁你同我約7點？」佢瞪大隻眼望住我，似乎睇唔出我咁奸狡。
「梗係啦，預早少少好，預你會遲到啊嘛，就算你準時都可以行陣街。」神算子是我。
我同呀詩係就咁你來我往，一人串一句咁去到銅鑼灣，終於可以唔洗羨慕人哋聖誕節有女陪，有街出，嗰種感覺有說不出的爽。
「嗱！你份禮物。」喺地鐵入面呀詩遞咗佢份禮物俾我。
份禮物用紙袋裝住，個紙袋口用幾個膠紙封住咗，包到實一實，睇唔到入面係咩嚟。
但攞上手又輕飄飄咁，唔通⋯⋯？
「咩嚟㗎？」我抱有一絲驚喜。
「唔知呢。」鬼馬嘅佢又點會話俾我知先得㗎。
「拆唔拆得㗎？」嗯⋯⋯個心情好啲矛盾，努力說服自己係咪頸巾都好，都係呀詩一番心意，但同時又好希望係頸巾嚟。
「喱度咁多人，一陣去到餐廳先拆啦。」呀詩細細聲講道。
「好！」我拎住呀詩份禮物，已經好滿足。
「咁我嗰份呢？」呀詩攤大手掌，其實我哋兩個份禮物都一早見到曬啦，大家都係用手拎，只不過係睇幾時話要送咋嘛。
「明知故問！」我拎自己份禮物出嚟，都一樣包到實一實，然後補上一句：「唔知你會唔會鍾意喎。」
我都未撚講完，呀詩已經拆緊我份禮物，啊你頭先唔係話多人咩？我呆咗咁望住佢，唔知好嬲定好笑。
我真係成日都俾佢激死。
「哇！」佢掀開少少嚟睇，就已經哇出聲，佢表情話我知係發自內心嘅。
「喂！你又話喱度人多叫我唔拆嘅？做乜你自己拆咗先啊？」我明佢點解話人多唔好拆住，因為係有啲羞家。
「咁你又話唔知我會唔會鍾意啊嘛，唔拆開嚟睇點知鍾唔鍾意姐？」呀詩好叻強詞奪理，又夠曬戇鳩。
「你贏！」我俾個like佢。
「咁你鍾唔鍾意啊？」我沒好氣地問佢。
「鍾意啊！」呀詩用力地撓住我隻手，捱埋嚟，成隻貓仔咁，甜絲絲地笑道。
「真係？」其實我唔知呀詩會唔會鍾意㗎，淨係想做自己想做嘅嘢俾佢，自認為有心思嘅嘢。
佢似乎真係幾鍾意，滔滔不絕咁講份禮物。
「摺咁多心心嘅？」
「摺咗幾耐啊？」
「做咩要摺心心嘅？」
我都唔係幾想答，我想佢自己搵到入面嘅固中玄機。
於是我便敷衍佢。
我有諗過佢會唔會一世都發現唔到㗎？
不過算啦，如果將來有咩事分手，可能過咗好多年呀詩先發現到收埋係啲心心嘅祕密，會記得我哋曾經開心過。
那些藏在心底下的祕密，只屬於你一人。
可能會一世都發現唔到，睇命運點樣安排我哋吧？當時嘅我係咁諗，亦唔知將來會唔會後悔當初咁樣決定。
但我唔想由我把口親自講喱份禮物嘅祕密出嚟。