《六樓B室》: 特別篇 - Hazel視角 (九)

特別篇 - Hazel視角 (九)

某日，我發現廉航有賣一蚊去程機票。對，是時候出走一下，忘卻香港的煩惱，說不定可以在旅程中找到新的對象！是忘記阿傑的好機會！

我立即搜尋機票，發覺大部分一蚊機票都要明年某些月份出發，一兩個月內只有很少。還好，我搜尋到三日後出發去大阪的機票也有一蚊優惠，我立刻買了機票，來一個快閃遊。

在飛機上，我睡不著，又不能上網玩手機。在無所事事的情況之下，我又想起阿傑。真的很煩，之前我三次拍拖，都沒有這種夭心夭肺的感覺。我偏偏要喜歡一個已有心上人的男仔！我曾經有個想法，不如我趁阿傑的女朋友有事隱瞞他的時候，來一個乘虛而入！但我做不到。

幸好，來到日本，我可以盡情地行街狂食，心情好了很多。而且，我真的遇到一段異地情緣。我碰見了一個很久沒有聯絡的男性朋友，剛巧他又是甩拖，一個人去旅行。於是我們選了一日，一起去玩。我們互相也有一點點好感，不知將來有沒有機會發展下去呢？



在旅程的第三日，阿傑打電話給我。我沒有接電話，之後才whatsapp他，說我買了特價廉航機票，快閃去日本玩數天。之後他就回覆我，叫我玩得開心啲。不知他有甚麼事要找我呢？

※※※※※※※※※※

六日行程完結，我懷著愉快的心情回港。中午我返回富耀大廈時，發覺地下有警車，而且有不少記者在場。莫非又有命案發生？或是6B骸骨被發現？

當我進入大堂，有警員向我問話。我回答我住在3A單位，他們循例問了我幾句話，就放我去搭lift。我多口問發生何事，警員回答昨晚凌晨6B單位發生開槍事件，有一名住客受傷。我大為緊張，立即問何人受傷，警員回答是住在8B的男住客。

阿傑中槍！為何會這樣？莫非阿傑還繼續調查6B的秘密，所以被人發現，要殺人滅口？我想到這裡，便立即眼泛淚光。



我問清楚男傷者被送去哪一間醫院之後，我上去放下行李，就立即出發前往醫院。

我在醫院，詢問阿傑的情況時，看見了阿傑的父母。他們說阿傑左手臂中槍，曾經失血過多，但已取回彈頭，輸血後情況穩定，但仍然昏迷。

過了一會，阿傑另外兩位朋友也分別來醫院探他，我認得他們，他們的合照有貼在阿傑家中的牆壁。細談之下，原來其中一個就是細賢，即是有份調查6B單位的其中一人。細賢有案件要跟進，很快就離開，另外一個朋友接著也走了。

一直待到晚上，阿傑兩老都選擇回家等消息，而我始終想留多一陣陪伴阿傑。

阿傑究竟幾時才會甦醒過來？他應該沒有性命危險，但他一日未醒，我仍很擔心。



唉，我又不是他甚麼人，只是他的「摱車邊」好朋友，我又何必對他這麼上心！就算要關心，都不是我，而是他的女朋友Hailey。

我心想：「咦，係喎，點解Hailey咁耐都冇嚟睇阿傑嘅？」

正當我有這個想法之時，Hailey就來到醫院。

※※※※※※※※※※

Hailey望著仍然昏迷的阿傑，一副憂心忡忡的樣子。

我：「請問，你係咪Hailey呀？」

Hailey︰「係呀！你……係咪Hazel？」

我：「咦，點解你識我嘅？阿傑有喺你面前提及過我？」



Hailey︰「冇，佢唔會喺我面前提起你，因為我知佢對你有好感，佢唔會同我講。」

我：「吓！」

Hailey︰「我知道阿傑曾經假扮過做你嘅男朋友，佢仲同你約會過。」

我：「吓，Hailey，你唔好誤會呀，我同阿傑冇嘢㗎，我哋只係朋友關係。」

Hailey︰「無嘢，我知係我同阿傑拍拖之前嘅事，我唔會嬲。只不過我想講，我知道佢好多佢以為我唔知嘅嘢，就係因為我有呢個特殊身份，而呢個問題，係好難解得開。」