《六樓B室》: 特別篇 - Hazel視角 (二)
特別篇 - Hazel視角 (二)
我：「你哋對得我住喇！」
Fred和Cindy一見到我，立刻甩開對方的手。
我：「係我信錯咗你哋！你哋竟然瞞住我攪埋一齊！」
他們無言以對。
我：「做乜唔講嘢呀？吓！你呢頭攬住佢，嗰頭又話同我去旅行。你好嘔心呀！你哋兩個都好嘔心呀！」
Cindy︰「對唔住呀Hazel！」
我立即大力一把打落Cindy塊面。
Fred︰「Cindy！」
Fred一副非常緊張、擔心、關懷的模樣，安撫著Cindy。
我好肯定，他從來沒有試過用這副模樣對待過我。
我很想哭。但我死忍，我不可以在這對狗男女面前哭。
我：「你依家係咪好心痛吖，你嘅Cindy俾我打到塊面腫晒。」
Fred︰「我好心痛，但我哋已經預咗。我哋預咗會俾你打，係冇諗過你真係會咁大力。Hazel，我同你一齊真係好辛苦，我從來冇識過一個女仔係咁強勢，同你一齊我好大壓力，你嘅說話成日都充滿住強迫、單打，我好想避你，寧願留喺公司開OT都唔想同你出街。我……」
我：「夠喇，你唔好再講。」
我終於忍不住，眼淚不停地流。
Fred︰「對唔住，係我賤，同Cindy喺埋一齊，但我同Cindy一齊真係好開心，佢……」
我：「夠喇！你既然咁憎我，又咁鍾意佢，你做乜仲要拖住我，唔同我講分手吖！」
Fred︰「講唔出呀！你冇機會俾我講到真說話。」
我：「你真係好賤呀，你想享齊人之福就認咗佢啦，咁嘅嘢你都講得出！」
我一腳伸向Fred的下體，他立即痛到跪低。我轉身便走。
※※※※※※※※※※
同時被男友和好友出賣，感覺極度痛苦。這事情怎會發生在我身上？
我返回了土瓜灣，但我不想回家，只想在街上遊蕩。我漫無目的地走，根本不知自己想去哪裡。走呀走，最終看見了七仔。
個幾星期前，我和Fred就在這間七仔入面激吻。一想到他有可能一邊和我激吻，一邊想著第二個女人，我便有作嘔的感覺。我立刻想逃離現場，但我細心一想，我要盡快忘記這種傷痛，不可以逃避，「喺邊度跌倒就要喺邊度企番起身」。於是，我決定在七仔借酒消愁，忘記一切。
開了一支又一支，已經飲了五支啤酒，開始有暈眩的感覺。我發覺，我根本無法停止自己去想他們，我一直飲，一直想著Fred剛才對我說的說話。甚麼「同我一齊好大壓力」、「我嘅說話充滿住強迫、單打」，由Day 1那天認識我就是這樣，我根本沒變，這根本就是Fred和我分手的藉口。
我再灌多兩支啤酒之後，已開始站不穩。我坐在便利店的角落，繼續飲酒。我再次想起Fred和Cindy這對狗男女。Cindy是我介紹給Fred認識的，她正正就在Fred公司的樓下工作。我應該要早些估到，Cindy一定會發姣放電，去勾引Fred。真的很諷刺！
我忍不住，終於哭了起來。
沒多久，有人走近我身旁。
男人：「Hazel，我係阿傑呀，新搬嚟你樓上個幾月嗰個阿傑呀！」
我︰「阿傑，邊個阿傑呀？」
男人：「新搬嚟嗰個阿傑呀！」
哦，我記起了，那個說自己前度也叫Hazel的怪鄰居。
我︰「哦，哦，我記得，你上次喺呢度見到我同條仔打車輪嗰個人嘛，我記得。」
阿傑：「做咩事飲到咁醉呀？」
我︰「我講我冇醉你都唔信我㗎啦！」
阿傑：「你男朋友呢，做乜唔見佢？」
你做乜好問唔問，要問我男朋友呢？
我︰「唔好提佢，散咗喇！佢……佢同我個friend攪埋一齊！」
說到這裡，我再一次按捺不住，放聲大哭。
經此一哭，我神志開始迷糊。矇矓間，我聽到有便利店職員問阿傑是否認識我，叫他送我回家之類的說話。我亦無謂阻住人做生意，是時候回家。
阿傑嘗試扶我起身，但我雙腳開始無力，就算勉強站起，也是想跌想跌，走不到路。
我不知這個阿傑會否對我有不軌企圖，而且他上次又主動撩我。但現在別無他法，他現在的樣子也似是出於對我的關心。就信他一次吧！
我將整個人依靠在他身上，將他的手搭在她我的腰間，這個姿勢下我終於能夠借到力，勉強步行得到。
當我離開便利店之後，我神志更加模糊，沒多久便斷了片。
※※※※※※※※※※
當我醒來的時候，已是第二朝的十點鐘。我立即檢查自己的衣服，除了右邊衣領位被拉低之外，其餘都是整整齊齊，胸圍、內褲也沒有被拉低、或者脫掉後穿回的痕跡，下體也沒有痛。我好肯定，昨晚我一定沒有被人侵犯過。
我還不放心，夜晚時我特意問夜更的旺叔，昨晚是誰人送我回家。旺叔說是新搬來、住在八樓的阿傑。旺叔見到我喝醉，還被男性鄰居送回家，也怕我會有危險，所以特別留意升降機的閉路電視。他說阿傑送了我回家之後，不到三分鐘就搭lift回八樓。
那我就放心了！
之後我還發覺，我的面巾有嘔吐物的味道，想必是阿傑臨走前用我的面巾幫我抹去我身上的嘔吐物。我對他也改觀了！
我曾經試過兩次上八樓找他，跟他說聲多謝，但他也剛巧不在家。算吧，有緣實會見到。
※※※※※時間線 - 第九章※※※※※
某天晚上，完成了當日的訂單，我便如常洗澡。只可惜，我的企缸去水位看似塞了，去不到水，企缸變成水塘。
穿回衣服後，我想打電話給這裡的業主陸叔，叫人來幫手通渠。但想深一層，這些淤塞可能很易解決，只不過我沒有工具，又不知陸叔會何時才找到人幫手，我自己解決可能還快。
我想起阿傑。一個男人，總有方法可以通到渠 (好像沒有甚麼關係)。找他幫手，順便跟他道謝。
我按下8B門鐘。沒多久，我便聽到一把男人聲，道：「邊個呀，我沖緊涼呀，等等啦！」
很快，他打開了門。我見阿傑上身赤裸，估不到他也有些肌肉。錯重點了，我是找他幫忙通渠呀！
阿傑：「咦，係你呀Hazel。Sorry，我衣衫不整。你搵我？」
我︰「係呀，唔通我出錯lift，襟錯鐘咩！」
阿傑：「你啱。入嚟先講啦！」
我︰「你可唔可以落嚟我屋企，幫我一個忙呀？」
我解釋我廁所的企缸去水位塞了，去不到水，又不方便找其他人幫手，所以想請他幫忙通渠。他立即答應了，實在太好。
阿傑用他帶來的廁所泵，一分鐘就成功通了。為了慰勞他的幫助，我立即從雪櫃取出一罐冰凍可樂，還將可樂抛給他，他也成功接住了。
我︰「可樂啱唔啱！」
阿傑：「唔啱，啱啱先喺七仔飲完，唔飲喇。」
我︰「你真係好鍾意去七仔㗎喎！」
阿傑：「你都係吖！」
阿傑這樣說，又令我想起在便利店跟Fred擁吻時的情況，但我已沒有傷痛的感覺。我知道，我已忘記了被前男友和前好友出賣的事，真真正正走出傷痛。我不禁笑了起來。
阿傑：「你同呢座大廈嘅人唔熟㗎咩？點解淨係諗起我？」
我︰「其實我都係搬咗嚟半年左右，同呢度啲人唔係好熟，同埋啲人都係怪怪哋，得你一個比較正常。」
阿傑：「我都係咁覺得，呢度好多人都怪怪哋，雖然初時我都覺得你好怪。」
我︰「係咪因為見到我同條仔當街打車輪，同當街飲醉酒呀？」
阿傑：「係呀，但今日冇咁覺得噜。」
我︰「即係變咗一個會搵男仔幫手做嘢嘅女仔，就唔怪喇，變返正常喇！」
男人就是這樣。在他們心目中，乖乖女、無知、弱者，永遠都是女性的特質。女性變得強悍、粗魯，就是原罪，做甚麼也是錯。
我見阿傑苦笑了一下，想必我剛才又顯露了強勢的一面。算吧，放過你吧，念你剛才幫過我做事。
我︰「喂，你真係唔飲嘢喇？」
阿傑：「有冇啤酒？」
雪櫃好像還有一罐啤酒，正好！
阿傑：「你……你依家冇野吖嘛？」
我︰「吓，我有咩嘢呀？你指我之前條仔偷食？」
阿傑：「咁冇嘢喇。聽你口吻，你心情應該平復咗。」
我︰「仲好，俾我一次過睇到我兩個最親嘅人出賣我，令我死咗條心。當我冇識過佢哋，唔使再諗，醉咗一次就冇嘢。」
阿傑：「咁就好喇！」
對，我忘記了向阿傑講多謝。
我︰「多謝你呀阿傑，嗰晚送我返嚟。」
阿傑：「哦……小意思，唔可以揼低我個怪鄰居嘛。」
聽阿傑講，原來當晚他送我回富耀大廈時，我在大廈門口嘔了出來，還弄髒了那個富豪的襯衣。他送完我回家後，還要急急腳回他家拿衣服給那富豪。其實他當晚真的幫了我很多。
既然他那麼樂於助人，不如再請他幫我換燈泡，他應該也不介意吧！反正在他心目中，女性是需要找男性解決問題吧。
我︰「阿傑，可唔可以幫多我一個忙？」
阿傑：「咩事呀？」
我：「我睡房燈膽壞咗，我已經買咗新燈膽，可唔可以幫我換埋呀？」
阿傑：「可以。」
不久，4A黃生黃太又開始吵架。雖然我已開始習慣，但也難免會心煩。阿傑第一次聽他們吵架，住高層真的很好。
阿傑：「我都話呢棟大廈啲住戶怪㗎啦，又一例證。5A陳生陳太又係怪㗎，扮鬼嚇我。8A蘭姨又係，不過佢真係有精神病嘅。」
我︰「係呀，其實我唔驚呢棟大廈死過人，但我介意呢度啲人好怪。我打算死約一完，我就同陸叔講我唔租喇。」
阿傑：「咦，呢度係陸叔租俾你㗎？」
我︰「係。」
阿傑：「如果你搬，我連唯一住喺呢度嘅意義都冇埋。」
其實阿傑都幾口花花，初相識時會覺得很厭煩，但今晚和他談了很久，發覺這根本就是他的本性，沒有冒犯的意思。
我︰「我唔受呢一套㗎，你咁講唔work㗎。不過……」
阿傑：「不過咩呀？」
我︰「我都鍾意聽嘅。」
我有時也喜歡聽這些「撩女仔」的說話，只是我的前度們以為我不喜歡聽。
阿傑喝完啤酒，便回家去了。