《六樓B室》: 第十六章 和好如初

第十六章 和好如初

當時黃生拿著菜刀，情緒接近崩潰，並想作勢向黃太方向斬去。

我：「黃生，唔好呀，快啲放低把刀，有事慢慢講。」

黃生：「仲有咩好講，仲有咩好講呀！啊……啊！」

我：「有咩事係解決唔到吖，你放低把刀先啦，你咁樣一刀斬咗落去，黃太會受傷，你又會坐監，你叫軒仔點算呀！」



黃生聽到我講這句，心情好像平復了少許。我立刻望回頭，示意Hazel報警。

黃生坐在梳化上，但仍未放下菜刀。

黃生：「依家呢度咁多街坊喺度，我都唔怕家醜會外傳。個衰婆佢出去勾佬呀，佢俾綠帽我戴呀！」

其實軒仔之前已經講了給我知，但在場其他人也是現在才知道。

黃太：「冇呀，我同Dickson真係冇嘢㗎，你信我啦！」



黃生：「你哋如果冇嘢，又點會成日互send whatsapp，又點會趁我出去返工嘅時候，偷偷哋出嚟約會吖！」

黃太：「冇呀，我同佢只係朋友，我哋只係正常出嚟食餐飯㗎喳，我哋真係冇嘢㗎！」

陳生：「係啦，係唔係有咩誤會呀？」

黃生：「我冇誤會！我五年前就應該要相信你呢個死婆係死性不改，我當時太心軟喇。」

正當大家一臉疑惑，黃生怎麼會提及五年前的事，我大約都知道他想表達甚麼。黃生應該一早知道黃太和徐英有路。



黃生：「你唔只係第一次出去勾佬㗎喇，你唔好以為我完全唔知你同徐英有路先得㗎。」

在場眾人，包括已知情的軒仔，和當事人黃太，也感到十分驚訝。軒仔一直都不知道原來黃生一早知道黃太出軌，而黃太自己更加一臉茫然。

黃生：「我唔爭在講埋落去。其實我五年前已經知道你同徐英有路，初時我喺度忍，我驚冇咗呢頭家，我唔想影響到軒仔，以為你玩一兩次就會收心養性。我太天真喇！本來我想同你攤牌，點知冇幾耐，就發生咗五屍命案，佢哋全家都死晒。」

黃生繼續講：「我見你個相好都死咗，我唔忍都忍咗咁耐，我就當冇事發生過，我只係期望你以後唔會再做啲對唔住我嘅事。我真係太天真喇，原來偷食真係有條路㗎，啊……啊！我真係抵死，我真係抵死，我呢兩頂綠帽真係抵戴呀，哈哈哈！」

黃生似是想用菜刀自殺，黃太立即撲過去。菜刀插中了黃太的右側肩胛骨位置，當場血流如注。

軒仔大嗌：「媽咪！」軒仔想撲過去，但被Hazel拉著。

我見黃太被插傷之後，雖然有流血，但傷勢不似嚴重，短時間內應沒有性命危險。希望警察和救護車盡快到。

黃生摟著黃太，說：「老婆，你做乜撲埋嚟呀，你有冇事呀？你做乜唔俾我死呀？」



黃太：「要死嗰個應該係我。對唔住呀老公，我以前做咗啲對唔住你嘅嘢，原來你一早就知道，你仲要啞忍咗咁耐都冇出過聲。對唔住呀！」

黃生和黃太都哭成淚人。情況好似有緩和跡象，但黃生仍然拿著菜刀。

黃太：「我唔想再隱暪落去。當年你經常早出晚歸，我知道你係為頭家，但我喺屋企真係好寂寞。徐英佢走來同我講，佢知道徐太同佢細佬攪埋一齊，好嬲，但又未搵到証據証明佢哋兩個通姦。我知道佢係對徐太出於報復，但我仍然抵受唔到佢嘅甜言蜜語，最終同佢發生咗關係。」

當時沒有人再敢加把咀，繼續聽著黃太的話。

黃太：「之後，我同佢慢慢開始覺得內疚，所以承諾以後都唔會再來往。我亦都叫佢唔好再怪佢老婆同細佬，佢都應承咗我。但我唔知點解，最終佢都係選擇要放火燒死佢哋。」

黃太繼續講：「我可以發誓，我今次真係冇再做對唔住你嘅事，我好肯定，我冇任何出軌嘅意慾，Dickson只係我一個好傾得埋嘅朋友，我同佢真係冇嘢。對唔住呀老公，我知你未必會原諒到我，但我真係要講句，好多謝你，多謝你呢幾年嘅忍讓！」

黃太講完「忍讓」這兩個字之後，就搶走了黃生把刀再自殺。黃生突然醒覺，打走了黃太手上的刀，並摟著黃太。



黃生：「唔能夠怪晒你㗎，我成日掛住做嘢，唔理你同軒仔。我信你冇再出軌，我信你。我以後都唔會淨係掛住做嘢唔理你哋，我會多啲時間陪你哋㗎喇！」

軒仔聽到後，立即衝去和父母一起抱成一團。好一個大團圓結局，實在太好喇！

此時，警察和救護員來到。黃太由於失血不少，要送往醫院治療。後來知道她沒有傷及神經和內臟，很快便可出院。至於黃生，由於他誤傷了黃太，循例被帶去警署問話，最終只作家庭糾紛處理，無人被捕。

※※※※※※※※※※

我不知道黃生和黃太所講的說話有多少是真，多少是假。但在這種接近生死邊緣、生離死別的關頭之下，不可能還有心思講大話。

如此一來，我幾近確定黃生黃太真的不會是殺徐氏一家的兇手，因他們的對話太真實，完全沒有講大話的理據。我選擇相信，相信他們的說話。

我也很戥軒仔高興，因為黃生黃太終於和好如初。雖然他們兩公婆心裡確實還有條刺，但他們也算坦誠面對，沒有再選擇繼續隱暪對方。

唯一令我感到疑惑的，是黃太曾經提及，徐英表示過會原諒徐力和孫麗霞，但為何最終還是放火燒死他們？難道兇手真的另有其人？



如果黃太說的是真話，徐英也沒有向黃太講大話，但仍然發生命案的話，即可能有另一個人放火，然後嫁禍徐英。究竟會是何人？

無論如何，直到目前為止，所有富耀大廈裡有嫌疑的人，除了旺叔和羅醫師之外，全部都已經洗脫了嫌疑。而利智傑身為富二代，調查他簡直是不可能的任務。再加上另一嫌疑人是我最愛的Hailey，你教我怎樣有心機再查下去！

細賢仍然在「神探三人組」的whatsapp group匯報他調查到的最新狀況。我真的沒有心情再回覆他。

我：「不如真係算啦 我已經冇心機再查 亦都唔想知利智傑點點點」

細賢：「好啦 既然係咁 我都唔再阻你哋」

我：「Sorry細賢 係我對你唔住 話放棄就放棄」

細賢：「我諗我都要放手喇 冇咗你哋兩個好幫手 我自己一個都好難再查落去」



「Hailey 將主題由 "神探三人組" 改為 "吃吃喝喝三人組"」

Hailey︰「唔好咁啦你哋兩個 笑吓先啦😁 我哋可以再約埋一齊食飯 唔一定要傾單案」

細賢：「好 一言為定」

這樣，我們的「神探三人組」正式解散。

※※※※※※※※※※

調查了接近三個月，其實我也有點累。在此之前，我的人生有點頹廢，做人也得過且過。最近真的經歷了很多事，人生首次接觸到生離死別，也試過認真去做一件事，也認識了我的最愛Hailey。

全靠Hailey，我工作上比以前更努力，不再混混噩噩做人。最近老板已放心將整間cafe的樓面交給我打理，也鼓勵我出外深造，吸收多些經驗。

至於我和Hailey，仍然沒有進展。其實我已經不想再將她和五屍命案扯上關係，但潛意識仍覺得她不是單純一個普通的女子。唉，我就是那麼懦弱，不肯再踏出一步。

今晚收工，經過區內一間酒吧。其實我很少飲酒，猶其到酒吧飲酒。以前曾有一段時間喜歡睇波，有時會約朋友落吧睇。今晚突然好想飲酒，便一支公入酒吧。

在酒吧裡，我遇見Sean，原來他就在這裡做Bartender。我很自然就坐在吧枱，和他吹吹水，也是練習英文的好時候。

不知是否我太黑仔，「好日唔落吧，一落就陀衰家」，酒吧突然停電。酒吧經理找人檢查，發覺電箱有很大問題，要明日才找到相關師傅做維修。經理覺得冇冷氣根本做不到生意，索性提早關門。

Sean因為是月薪員工，早收工不會影響他人工，變相做少幾粒鐘，他立刻對我說「Hey you guy brings good luck to me」。

我和Sean一起回家。來到大堂，如常跟旺叔打招呼。可是，旺叔向我們流露出驚嚇的表情。