《六樓B室》: 第十二章 身世之謎
第十二章 身世之謎
我在後樓梯見到的，是Hailey。
怎會是Hailey？她在那裡幹甚麼？
莫非她故意引我出來，引我離開六樓走廊？好讓6B單位入面的人逃走？
雖然我仍然很頭暈，但我想立刻返回六樓。我拉著Hailey的手，示意叫Hailey和我一同入六樓。
Hailey︰「做咩呀？」
我：「Hailey，跟我入去，我聽到有人喺6B。」
Hailey︰「吓！」
我拉著Hailey，立刻返回六樓。她好像很迷惘，但她沒有抗拒，也跟我一同進入。
返回六樓大堂後，頭暈眼花的感覺又再次出現，但我不見有人從6B單位逃出來的痕跡。我回望Hailey，她也是一樣，感到暈眩。矇矓間我聽到Hailey叫我離開，但我不忿氣，想衝去6B單位。就算做不到甚麼，拍拍門，嚇一嚇入面那人也好。
此時，我仍未接近6B單位，便聽到升降機門打開。我回頭一望，是旺叔。
旺叔：「你哋做咩嚟六樓呀，跟我走啦！」
我：「旺叔，我懷疑6B入面有人，你快啲幫我撬開6B嘅門啦！」
旺叔：「你係咪癲㗎，痴線㗎你。6B好猛㗎，快啲入嚟啦，我唔敢出嚟。」
我：「我唔走呀！」
旺叔見我不打算離開，雖然口講不敢出來，但仍跑出來救我們，拉我們回升降機。
升降機關門。旺叔好像鬆了一口氣，之後狂鬧我為何去六樓，他都已經一早跟我說六樓好猛，還要去六樓探險云云。我仍然很頭暈，沒有精神去回應他。
返回地面後，頭暈和幻覺也逐漸減少。
旺叔：「你哋去六樓做乜？你話6B入面有人？」
大獲！剛才一時情急，將我懷疑有人在6B單位內的事對旺叔提起。事實上，旺叔是監察著6B單位的那位，我這樣做，簡直就是打草驚蛇。
我：「你俾我諗諗，我依家個頭仲係好暈。係呀，頭先我一番到屋企就瞓著覺，之後發惡夢，夢見6B單位入面有人，定係鬼，真係分唔到。醒咗之後都分唔到係夢定真實，跟住我就落咗去六樓，中途撞到Hailey，跟住就頭暈眼花喇。」
我不可以將我在Sean家裡聽見6B單位有聲音的事讓旺叔知道，這只會令旺叔更提高警覺。我說我發惡夢，見到6B有人，旺叔可能沒有那麼懷疑我在查6B單位的事。
旺叔：「又會咁嘅。記住呀，唔好再去六樓喇，你撞咗邪就幫你唔到喇！」
我：「旺叔，點解你咁醒，咁快就知道我喺六樓？」
旺叔：「你新搬嚟唔知，我哋之前喺六樓走廊裝咗CCTV，以防有人再上嚟探險，騷擾到其他住客。好彩我頭先咁啱望一望六樓個CCTV，我先上到嚟救你哋。」
這些我一早已經知道，我只是假裝無知，以免被旺叔知道我在查6B和他本人。
我：「旺叔，既然6B咁猛，你平時巡六樓嗰陣係咪一樣有頭暈？你點巡六樓呀？」
旺叔：「我梗係唔巡六樓啦，我同日更標叔一樣，巡樓嗰陣都唔會去六樓，我哋會睇六樓嘅CCTV去取代巡六樓。」
我見旺叔開始減低了對我們的懷疑，我便和旺叔道別，帶Hailey回我家。
我：「Hailey，點解你會喺六樓後樓梯出現？」
Hailey︰「今晚我嚟探蘭姨，走嗰陣我聽到樓梯有腳步聲，於是八卦走落去睇下，去到六樓，就聽唔到聲。冇幾耐就見你由六樓走廊走出嚟。」
我：「哦，原來係咁。做乜你嚟搵蘭姨都唔通知聲我嘅？」
Hailey︰「我純綷想嚟探蘭姨，又唔係查案，所以冇次次同你講。」
我：「Sorry呀，頭先拉咗你入去六樓。你依家仲有冇頭暈呀？」
Hailey︰「冇喇。我都係第一次感受到六樓嘅威力。」
我：「我送你落去搭車啦！」
雖然Hailey這麼說，沒有任何疑點，但她的出現，少不免令我對她有一點懷疑。她早唔出現，遲唔出現，就在我聽到6B單位有聲音傳出的時候出現。難得她是幫兇？她想幫助藏在6B的人，令此人可及時逃脫？
究竟Hailey是同伴，還是敵人？
※※※※※※※※※※
第二日，我打電話給細賢。細賢接到我電話，很驚訝，因為之前我找他都是經whatsapp group。我直接打電話給他，他覺得我一定有要事。
我將昨晚發生的事詳細講了給細賢知。
細賢：「照咁睇，你懷疑Hailey嘅身份喎？」
我：「係呀！」
細賢：「你竟然懷疑你嘅女神！」
我：「唔係呀……我仲係好鍾意佢㗎，但我琴晚諗咗好耐，諗返由我地初相識到依家。Hailey係我哋無意之間識嘅，佢係咩來歷、佢屋企人、佢嘅朋友，我哋一概都唔知。」
細賢：「你都唔知我有咩朋友啦！」
我：「屌，聽埋我講先啦！佢係幫利安晞做嘢㗎，利安晞係利仲謀個女，利智傑個妹，呢兩個人又好有嫌疑，唔知當中有咩關係。莫非Hailey係利家派嚟監視我哋嘅奸細？」
細賢：「唔好諗得我哋太重要，我哋係拉雜成軍嘅業餘調查隊，對方未必需要咁認真去派臥底睇住我哋掛。反而我一直有另一個懷疑。」
我：「懷疑啲咩？」
細賢：「我懷疑過Hailey就係徐欣欣！」
細賢一講，我突然茅塞頓開。我又真的沒這麼想像過。細賢果然是查慣案的人。
細賢：「你嗰陣入過去蘭姨屋企，睇過徐欣欣以前啲相，你覺得同Hailey有幾成相似？」
我：「都有八成相似㗎。」
細賢：「命案事隔已經五年，當時徐欣欣係15歲。如果冇死，依家係20歲。Hailey依家讀緊大學Year 3，相貌外觀年齡都好匹配。」
我：「係，冇錯。」我不知道要說甚麼。我在冒冷汗。
細賢：「你覺得Hailey對蘭姨點樣？」
我：「好好，好過頭。佢嚟探蘭姨探得好密，有時連佢嚟咗富耀大廈我都唔知，就好似琴晚咁。」
細賢：「如果Hailey係徐欣欣，咁就解釋到Hailey點解會對蘭姨咁好。佢借故扮成徐欣欣，就可以明正言順對蘭姨好，成日同蘭姨見面，但又可以繼續隱暪身份。」
我：「如果徐欣欣當時冇死，咁佢依家用第二個身份番嚟富耀大廈，究竟想做咩？莫非想搵出命案真兇，然後報仇？」
細賢：「我都有諗過。徐欣欣當時大難不死，但知道真兇逃之夭夭，於是佢一直匿埋，等到件事丟淡晒，先番嚟調查。
我：「如果Hailey真係徐欣欣，咁當時第五條屍……究竟係……係邊個？」我的牙齒在顫抖著。
細賢：「唔知呀，冇人會知。當時從焦屍中確認身份，都是從環境因素、屍體身型同DNA證明佢哋有血緣關係，從而判斷死者身份。」
我：「我打個譬喻，如果徐力同大嫂好耐之前已經攪埋一齊，生咗個私生女，而呢個私生女喺火災入面死咗，佢又同徐欣欣身型好似，咁警方會唔會誤認死者係徐欣欣？」
細賢：「絕對會。」
我：「點解會咁！點解會咁！」我有少許崩潰。
細賢：「又或者咁，根本徐欣欣就係徐力同大嫂生嘅私生女，死咗嗰個先係徐英嘅親生女。」
我差點暈了過去。
細賢：「徐英戴綠帽都未必會放火，但可能知道一直養緊個便宜女，一時興起先至全家攬炒都未定。當然啦，呢啲係我估吓嘅者，查案就係要大膽假設。」
我無法再跟細賢談下去，直接掛斷了電話。