眼淚沖不淡苦澀: 2.緣分

第二章 - 緣分

我叫林子日，係一個平凡嘅中四學生。興趣都係打下波，玩下卡咁。平時唔多接觸女仔，身邊嘅朋友基本上都係男仔，好鬼死毒咁。相信大家都經歷過中學生選科嘅日子，亦都為選課而苦惱過。我聽咗我父母嘅建議選擇咗bafs同economics。因為我嘅朋友全部都同我唔同科嘅關係，我自己一個升咗去唔同嘅班。而好好彩，我去到新嘅班，我都識到一班新嘅朋友。

/

返學嘅第一日，

我心驚膽顫咁一個人坐係班嘅後排，食早餐等上堂，亦都順便睇下有咩人同我邊一班。過咗一陣，鐘聲響起，班上面都慢慢開始坐滿咗人。為咗高中生涯唔好咁邊緣，我嘗試開始慢慢識下人。





我腦入面一直捻，到底點先可以同到人講嘢呢，我就開始試下周圍望，留意下啲人嘅興趣習慣。係我周圍望嘅時候，我望到前面位嗰個男仔都睇緊nba直播，我見佢都係打波嘅，我就試下厚住面皮試下同佢開話題:「乜騎士好睇咩，咪又係靠LBJ一個人打晒。」我自己講完呢一句都捻唔到人哋可以點應;原本預期大家會尷尷尬尬咁啦，點知佢一開口就話「就係睇占士撞柒班人先好睇吖嘛!」我當下嚇親，不過暗地裡都好開心，識嘅第一個就咁多嘢講，我亦都信心大增。我開始慢慢同佢傾多咗，佢個名都好得意咁叫金堅，慢慢咁我都識埋佢係班上面嘅朋友-諾言同煒發。

就係咁，我就識到班上面嘅朋友，我亦都開始同佢哋一齊食飯打波，慢慢咁熟落咗。

時間一日一日咁過，慢慢都到左11月。 11月有什麼特別?出咗係我生日嘅月份，仲係學校唔同社招募啦啦隊員嘅日子。對於女仔尼講，佢哋就梗係開心啦。但係對於男仔，就係最難頂嘅日子，日日都比人追債咁追，比人叫加入啦啦。不過都有男仔例外，好中意參加啦啦隊，而金堅就係其中一個。雖然我同金堅唔同社，但係佢好熱心咁不斷叫我加入啦啦，不過我都一如既往咁拒絕，因為嗰陣覺得一個男子去跳會好柒好尷尬。不過金堅亦都冇放棄，日日都不斷叫我加入，又叫我陪佢去搵不同嘅啦啦成員。每次我都只會陪佢去搵人敷衍過去就算，我只係見唔係去好遠，又怕佢煩多我幾獲我先肯陪佢去搵人。

我亦都好慶幸，我冇拒絕陪佢去搵人，否則我都唔會與得到佢。

「喂，劉紫蔚!」金堅係樓梯口大叫咗一聲，我都下意識咁望咗過去。一個眼大大，但係細細粒，非常可愛嘅女仔映入眼簾。當下我第一下就比呢個咁可愛嘅女仔吸引到，令我開始想認識呢個女仔。