《女朋友全家變咗隻蛋》: 23
而東武勳佢，就死死咁用手擋住，一時間雙掌齊齊滲血。
低住頭，居高臨下嘅我見到東武勳一副難以置信嘅表情。
慢慢地，刀刃開始貼住佢喉嚨......
東武勳不惜刃陷入掌，都要舉高八赤刀遠離自己喉嚨，但佢已經阻止唔到咬牙切齒嘅我。
我都無為意自己喺戰鬥期間，注入咗過多嘅狂怒。
現實中嘅搏鬥，就係一場嘔心嘅泥地戰。
就算滿身泥濘，滿身鮮血，亦或滿身骯髒，都要置對手於死地。
雙手鮮血嘅東武勳，逼不得已講出咗一句說話：「你...你......差我...一個人情......」呢句說話，令我從入神嘅戰鬥中扯返出嚟。
我慢慢企返起身，用刀指住佢：「勝負......已分。」
東武勳聽完之後眼神先係一陣茫然，然後仰天而笑：「哈哈...哈哈哈哈......」
「我係輸咗。」笑完之後，佢承認。
佢注視住我同樣鮮血淋漓嘅左掌，因為剛才用八赤刀壓向佢喉嚨時，我左掌都貼住刃背去壓。
日本刀，就係把無論前定後都一樣鋒利嘅刀。
灰色長風衣沾滿泥濘嘅東武勳，緩緩咁坐起身。
「泉叔......」我望住佢，要佢交代出去向。
「要少少時間，通知下佢。」東武勳一直注視住我神色，忽然！視線移向剛才自己雙管霰彈槍跌落嘅位置。
「你！」知道佢意圖不軌嘅我，即刻要一刀砍落佢身上。
佢小腿蓄力一撐，撲到後少少雙管霰彈槍所在嘅位置。
「嗖」更可惜嘅係我呢一刀，只係斬中佢左眼。
「嗄啊...」東武勳吟痛咗一聲，立即為槍快速填充子彈，然後舉向咗我。
「政！」向來唔會大呼小叫嘅沅彤，喊出我個名。
「呯！」繼而一槍精準咁打落東武勳持槍嘅手臂上。
原本完全瞄準住我，只要扣扳機就可以一發射到我內臟稀巴爛嘅東武勳，因為中咗沅彤一槍導致移咗少少位，加上我立即嘅閃避，令到東武勳呢一槍失準。
「呯！！」巨大嘅槍聲隨即而來。
「咔......鏗！」反之，我身體無中槍。
但八赤刀......
斷裂咗五分之一塊。
而且係最為銳利嘅刀尖部份。
我難以置信地，望住斷裂嘅部份......
憤怒漫延住我全身，雙手被怒火燒得滾燙、抖顫。
我目光無法控制咁變得猙獰，由斷刀位置移向到東武勳身上。射唔死我、雙掌浴血、左臂中槍、更失去左眼嘅東武勳，都無再作出任何舉動，而係好似默默咁等待我處置。
我衝過去就嚟一腳飛膝踢撞落佢塊臉到，捉住佢衣領不斷毆打，但始終無法釋懷我內心嘅憤怒，嗰一刻即使係打到手斷，我都感覺在所不惜。
「啊啊啊啊啊！！！！」怒不可遏嘅我打到東武勳頭破血流，憤怒嘅喊聲徊傳於山林之中。
「冷靜！政。」我居然，需要沅彤話哂俾我知冷靜。
嗰樣明明係佢嘅家傳寶物......
更加係用嚟拯救呢個世界嘅......
一下子，我悲憤交加：「沅彤！！佢打爛咗你把刀！你唔嬲咩！！？」我想出拳，但沅彤已經死死拉住我拳頭。
「最緊要......最緊要......係你人無事。」沅彤語重心沉。
怒氣沖天嘅我俾沅彤緊緊咁抱住，狂怒嘅我不斷發力咁掙扎，但好快就被陷入絕望嘅感覺佔據，身體漸漸變得無力，有些少不甘咁飲泣。
沅彤嘅擁抱就好似防止我失去理性嘅保護罩，由最初去到最後都死死咁擁護住我。
「政，我哋會無事，明唔明？」沅彤說。
按照平時呢種情況佢應該比我更憤怒，但見沅彤係仲想挽回我一絲嘅理性，我唯有停止再發晦氣，能夠為佢做嘅只有無力咁坐低，接受依個事實。
天上毛毛嘅雨水，就好似為我贈慶咁出現。
又好似宋文德臨離前夕咁，我一副嘅喪家狗模樣。
沅彤將受重傷嘅東武勳拉入小屋，將佢手腳綁好並且止血，防止佢「輕鬆」咁死去，而我就喺屋外嘅濕潤嘅泥地上沉澱。
沅彤搜出東武勳嘅手機，然後利用東武勳嘅指紋解鎖咗。喺手機入面，沅彤發現訊息內容仲需要瞳孔認證去登入，好彩嘅係東武勳仲有一隻眼可以用。
沉澱咗陣後，我拎住八赤刀行入小屋入面。
「我哋應該聽宋文德講......」輕微喪失鬥志嘅我，坐喺床邊。
佢遺計之中，叫我哋唔好互相睇對方嘅任務。
可能佢正正就係......
預計到呢一幕發生。
「咁諗下，如果遇到呢件事情......」沅彤突然向我提出，我從未思考過嘅想法：「宋文德佢會點解決？」
「佢...佢會......」經沅彤提示後，我盡力代入宋文德嘅思維：「至少要知道泉叔下落先。」
沅彤翻查緊東武勳手機：「搵到，幾日前，佢同泉叔有過聯絡。」
我哋先將八赤刀嘅事拋開一掉，搵出泉叔位置。
但當沅彤望過內容後，有少恍惚：「泉叔......要加入「西品製藥」......？」
「......」我愣住，湊過去睇埋一份。
的確如沅彤所講，對話內容係泉叔嘅加入「西品製藥」嘅採集部門，而泉叔亦只用一日就通過咗佢哋林中管理員嘅測試......
收集並交出一隻「靈魂蛋」，就可以成功入職。
我嘅腦回路，又返到去宋文德之前嘅叮囑......
千奇唔好將靈魂蛋交俾泉叔。
唔通...
唔通呢一切一切真係......
係因為宋文德預視到泉叔會加入「西品製藥」？
「叮叮...叮叮叮......叮叮叮......」突然間，東武勳手機彈出一則訊息。
係一個股市app，上面顯示住東武勳嘅個人股票資產戶口，沅彤無為意咁撳咗入去，發現咗一啲唔對路嘅小細節。
「佢戶口？」沅彤神色又再有變，不禁質疑：「有接近成十幾億嘅股份資產，仲不斷漲緊錢，點解......」
「翻查佢過往嘅買出買入。」我說。
一打開嚟睇，我哋俾東武勳嘅股票買賣稍為震驚到。
東武勳用足接近整整十年時間，近乎全部錢都係用嚟買賣「西品製藥」嘅股票。
而最近一宗嘅交易，就喺前一日。
透過預設嘅自動買賣，為佢賺咗接近本金成倍嘅金額。
「前日係佢玩咁耐以嚟，賺得最多......依家佢資產差唔多超過三十億。」我分析緊，點解會咁突然。
正常有咁大升幅下跌嘅波動，應該點都會有少少新聞提及到，特別係香港咁大嘅一間製藥公司。
結果，真係俾我搵到一則新聞。
「「西品製藥」創辦人西品盛於前日被殺，宣告不治，開市後公司股票出現大幅波動......」
睇到呢則訊息之後，我已經大概知道東武勳點解會賺咗咁多錢。
簡單嚟講，佢買咗對應「西品製藥」公司嘅熊證，熊證就係當嗰隻股票因為某啲原因一跌，就變相你會賺咗錢。
而佢咁樣突然大手買入，加上遺計上警示泉叔唔好對「西品製藥」有所行動，咁就好難唔將所有事情聯想埋一齊。
沅彤用一盤冷水，將東武勳整醒。
東武勳模糊咁打開眼皮，臉頰、鼻樑同眼角都係瘀傷：「......」
「你一早知道，西品盛會死。」佢一醒，我就講。
東武勳緩緩咁望望周圍，然後輕蔑一笑：「就好似...我咁？」
「你好快就會。」我捏住佢條頸。
「或者你可以咩都唔講，咁你嘅死亡將會既漫長又痛苦。」沅彤拎咗屋內透爐嘅噴火槍，喺東武勳瞎咗嘅左眼傷口輕輕按咗一下，火束即時噴出。
東武勳立即渾身激烈地抖顫，雖然佢強忍無叫出聲，但可想然知到底有幾痛，
沅彤只係噴咗短短兩秒左右，就令東武勳感覺生不如死，沉默咗陣。
「佢係自願加入......」東武勳連聲音都微顫，剛才嘅痛楚應該有十級。
「係泉叔殺咗西品盛，係咪。」我續問下一條問題：「佢依家人喺邊。」
「或者...佢加入係......想賺錢？你認為......」東武勳抬起頭，凝望住我哋：「殺咗嗰位身價值千萬億嘅老人家......可以安然脫身？」
我同沅彤對望一眼，了解佢嘅意思可能係泉叔的確去殺咗西品盛......
但係走唔甩。
「咁泉叔人喺邊。」
之後嘅東武勳，異常地配合。
但佢無直接講出泉叔所在位置，而係由泉叔搵佢申請加入部門，到測試、審核、入職，用咗只係短短兩日。
泉叔做到咁，就好似有啲必定要殺死西品盛嘅理由。
「你講咁多，到底泉叔去咗邊？」沅彤唔想再聽東武勳嘅廢話，拎起咗噴火槍。
「由我暈咗之後......」東武勳語氣同臉色，都漸漸變得沉穩：「去到依家，有冇三十分鐘？」
「喂，你約咗我哋十四分去狩獵慶祝，但你已經遲咗三十分鐘，按照內部通報機制，我哋嚟搵你喇......」屋外傳嚟一把，漫不經心嘅男人聲：「東武主管。」
另一把較為渾濁嘅聲音：「估唔到新入職嗰個泉......哈哈，佢真係有膽殺咗西品盛，好彩聽你講一早買咗跌。」
「啊，入嚟之前你哋最好拎埋槍出嚟。」東武勳輕輕淡笑。
「佢叫咗人。」我同沅彤即刻知道咩事。
「多謝你哋陪我遊咗陣花園......」東武勳毫不在意，說得狠切：「要我死？可以，但你哋要陪葬。」
今次沅彤真係忍唔住，再用火槍噴佢隻瞎眼，東武勳又即時陷入巨大嘅痛楚之中......
我輕輕打開道門，發現屋外企住三個男人，同樣係跟東武勳一樣著住灰色嘅大風衣，其中一個戴咗圓灰帽，重點係佢哋三個都分別持有長槍。
係咩槍款唔清楚，但一定唔會係玩具。
「呯！呯呯......」圓帽男注意到我開咗門，即刻向我連開三槍。
我即刻閂門彎身，拎起東武勳枝雙管霰彈槍，為佢填充子彈：「沅彤......唔好殺咗佢，要有佢我哋先離開到。」
滿目冷火嘅沅彤終於停手，東武勳左邊眼窩幾乎焦黃呈黑。
我解開綁住東武勳嘅繩索，一手拎住槍一手脅持住東武勳，利用佢做人質掩護我哋離開，呢個係唯一辦法。
「東武主管，你惹咗啲咩人。」外面嘅敵人語氣之中，對呢種情況無感到意外。
沅彤望下錶，一早過咗三十分鐘有剩。
「如果過咗，咁我嘅目的已經達到。」東武勳嘴角又再勾起弧度。
話畢，屋外就傳嚟咗其他人步行至此嘅聲音。
開門之後，我哋兩班人互相對峙住。
我企前面拎霰彈槍脅持住東武勳移動，而沅彤就跟喺我身後面用獵槍做口掩護。
嗰三個人知道我哋拎東武勳做人質之後，都無輕舉妄動，只係默默跟隨著。
「東武主管......」其中，戴圓帽嘅一直係咁講嘢：「建議內部通報機制可以改做十五分鐘，咁你啱啱就可以捱少一倍嘅痛楚。」
「唔想佢死，就唔好再跟嚟，放低枝槍。」一直帶住東武勳退到山下嘅我警告。
「你知唔知咩叫恐怖平衡？當我一放低槍，話事權就會喺你手。」佢哋仍然緊緊跟住，只係無隨意開槍：「但只有我仲拎住槍，你哋都唔會有絕對話語權。」
但呢種平衡，只係維持到山腰嘅位置左右。
「開槍啊......」東武勳氣息淡薄，虛弱咁講：「我點教你哋......」
「東武主管你死咗嘅話......」虎背熊腰嘅灰衣人，第一次出聲：「你十年前一直準備嘅事，就付之流水。」
「唔緊要......」東武勳瞧向山徑一旁嘅斜坡，說：「人生呢場遊戲，總會有輸嘅一日。」
講完之後，東武勳似係深深吸咗啖氣，就突然發難掙扎衝向斜坡嗰邊，本來只用一隻手捉住佢嘅我，俾佢呢下成功突圍到，東武勳視死如歸咁，寧願跌落山下嘅斜坡。
無咗人質嘅我哋，一下子變得空蕩，槍口對住大家都唔會再有顧忌。
「呯！」我先開咗一槍，迫退佢哋三人。
繼而轉身攬住沅彤背脊，帶佢滾落旁邊嘅斜坡......
「呯！呯呯呯！！呯呯！！！呯呯呯！！！」下一秒果然係密集嘅槍聲，大量嘅花草樹木變成我哋掩護。
但見唔到盡頭嘅斜坡，令我哋無法停止下滑。
「啊啊啊......」我用自己背脊對住下斜緊嗰一面。
我用力想捉住任何一花一草、一木一根，但落下嘅速度根本唔俾任何機會我。我抱實沅彤，唔想佢受到半點傷害。
我喺山上嘅最後一幕，就係跌落咗再無地面嘅半空，強大嘅離心力令我分唔清天同地，短短幾秒之後我感受到全身一陣痛擊，連我意識都擊暈。
「醒啊......你醒啊！...政！」我聽到沅彤叫緊我，但我無咩力回應。
後腦好似俾棒球棍重重咁敲咗一下，無辦法起身。
沅彤將我抱起，向緊唔知邊到前進：「你要頂住......」
「沅彤......」我模糊嘅視線，只係望見佢。
「要......搵......返...泉...叔......」我用力吐出依一句。
【沅彤視覺】
到底帶住阿政跑咗幾耐，我自己都唔清楚。
摸佢後腦係滲住血，我就開始慌。
我慌，宋文德走咗、泉叔失蹤咗，再到阿政之後，就真係淨返我一個人。
呢世伴隨我最多嘅兩隻字「冷靜」，
呢刻變得格外陌生。
後來我總算走出座山，喺附近地區搵到診所。
等待結果期間，我坐喺到諗咗好多嘢。
直到診所嘅電視，播出咗西品盛新聞嘅內容。
西品盛被謀殺，重點係......警方未搵到兇手。
我自己唔太相信，一個億萬富翁身邊，無一個保鑣制服到泉叔？
而泉叔真係走到，自然會搵上我哋。
所以，我更傾向於泉叔係俾人捉住。
但點解......
泉叔要對付西品盛。
「請問你係咪嗰位傷者嘅家屬？」一位姑娘走嚟問。
「唔係，係朋友。」
「咁傷者應該係腦震盪，我哋已經轉介咗去醫院，好快有車嚟接佢，你可唔可以通知一下佢家人？」
「好...」
知道阿政嘅情況後，我打通一則電話。
「沅彤？自從照顧完你婆婆就好耐無見啦喎。」電話嘅另一頭，係位私家醫生。
呢個醫生，喺當年我阿婆婆臨離開之前，每日照顧佢嘅家庭醫生。
收費都幾貴，但婆婆俾得起。
「李醫生，我想要你照顧我一個朋友。」
「無問題啊！收費照舊？」
「係，你依家去我屋企，你記得地址？」
「好，無問題，一陣見。」
搵好人照顧後，我就交低幾百蚊俾診所姑娘，然後直接入診房將頭部包紮繃帶嘅阿政抱走。
「小姐，唔洗咁多錢嫁！」姑娘叫住我。
呢刻，除咗阿政嘅安危之外，我咩都唔想理。
去到屋企嗰陣，李醫生經已喺門外等緊，我將阿政抱到床上，交代返一啲細節俾醫生聽。
最後，係俾啲空間佢休息。
閂好房門後，我去書房拎起斷裂咗五份之一嘅八赤刀上手睇。呢種程度，就算重新鑄好，都唔可以打造返以前嘅鋒利。
就喺我專心檢查嗰陣，我發現咗啲嘢。
八赤刀嘅斷口位，有個小小嘅空縫，呢個係刀刃嘅空心位置，如果唔係要細心檢查，我都唔會發現入面放住張，好細並且卷起咗嘅紙條。
我小心翼翼咁，拎幼長鉗將紙條夾出。
呢種紙嘅質地，似係宣紙，通常古代先會用。
再打開嚟睇，入面寫住一段段好細嘅日文字。
宣紙係唐朝興盛，而唐朝嘅時候中國嘅文化經常傳出去日本，所以如果入面係寫住日文，我一啲都唔意外。
我瞇起眼睛，用力去睇到底上面寫咗啲乜。
「湧火：當邪物之血沾上八赤刀的刃，會湧現燃燒出業火。
而施有者將刀刃用力揮出，便可將業火擴散。」
當解讀出字條上嘅日文後，我拎起咗八赤刀打量，然後走去拎泉叔之前留低嘅一瓶三毫升嘅兔子血，倒落到刀刃上。
「哧～～～」
深藍而微弱嘅業火光芒，附燃喺八赤刀上。
如果唔係發現咗入面嘅玄機，我都從來無諗過八赤刀斬兔子人時產生嘅業火，並唔係憑空而生，而係沾上咗邪物之血所產生。
既然係咁......
就算把刀唔完整，都應該可以繼續用。
我將八赤刀嘅斷片先收埋好，遲下再做打算。
出咗書房之後又唔知點解，會無故返入間房陪住昏迷嘅阿政，就好似我哋一直習慣咗對方喺身邊咁。
或者人嘅孤獨感，都不過係源於仲未搵到有安全感嘅人。
「佢情況唔好話好嚴重，應該三日之內會醒返。」李醫生向我交代。
「嗯。」
我嘅視線，不經意放到宋文德嘅公文袋上。
「最後計劃......」我諗住拆開嚟睇。
或者，宋文德會唔會一早估到依步，所以最後一份計劃書嘅內容都係如佢所料？
無可能吧。
佢嘅眼睛只係可以窺探到真相、事物嘅本質，而唔係未來。
未來，係將握緊喺我哋手，就好似我依家捏死床上嘅阿政一樣，就足以破壞咗一整個未來，未來係變數，無人預視得到。
但如果......
如果宋文德知道我哋嘅本質，就係唔會完全聽從第三計劃書嘅行動，咁又有冇可能？老實講，我最憎就係喺自己腦入面進行天人交戰，諗啲幾萬世都唔會得出結果嘅答案。
所以，我打開咗公文袋。
「最後......到底會係點，希望你會講我知。」
我輕輕掀開計劃書，入面納入眼內嘅第一句，令我不自覺微笑。
「失敗了吧。」
明明係一句......
一句負面嘅字句，
但唔知點解見到呢句之後，
我就係莫名地笑咗。
「的確，失敗得好徹底。」我回應一個已經唔存在嘅人，將視線移動到下一段文字。
「但之後嘅未來，就要靠你哋自己，沅彤。」
宋文德無預想咁，繼續教會我哋下一步。
但佢就好似一早清楚我，會係四個之中仍然無事嘅人。
或者係因為佢知道，另外兩個會不惜一切咁保護我。
而宋文德就好似空氣咁，呢句之後消失得無聲無色。
計劃嘅最後......
係無計劃。
「靠自己？」我放低公文袋。
又或者最後一份計劃書嘅存在，只係為咗俾我而睇。
「自己、一個人。」我合上眼睛，回想自己嘅以前。
曾經好多時間，我從頭到尾都係自己一個人。
今次何妨唔自己多一陣？
我收拾好心情，返入書房整理一下手頭上嘅嘢。
幾乎可以確定泉叔係殺咗西品盛嘅人，如果想搵佢......
就要代入佢思維，佢會點計劃暗殺西品盛嘅行動。
首先，西品盛係死喺自己屋企，咁泉叔一定係搵咗方法潛入去，我諗佢唔會有太多計謀，最簡單直接嘅方法係成為獵蛋人，咁就有籍口接近西品盛屋企。
咁點解可以接觸西品盛？我諗係因為西品盛嘅超長壽命，係需要服用靈魂蛋調配出嚟嘅靈藥，因為工廈嗰場大火之後，靈魂蛋供應變得緊張，如果可以直接靈魂蛋送上大宅都唔出奇。
之後，我上網查咗查西品盛住嘅豪宅，係深水灣嘅獨立屋，保安極為嚴密，泉叔爬牆潛入呢啲方式更加無可能，一定係偽裝成要員入去。
泉叔殺咗西品盛之後，更加無可能安然脫身。
咁佢一定係，
仲喺屋入面。
最大嘅情況可能係，俾西品家族嘅人綁架住。
為咗驗證自己嘅諗法，我用咗幾日準備好需要嘅一切，就獨自前往西品家族嘅附近，因為淨坐係唔會有任何進展。
特別係二十一號就快嚟到，要喺嗰陣之前搵返泉叔。
我用偽裝嘅方法肯定無可能，所以為咗救返泉叔，我決定採用一個極端嘅方法，亦係宋文德最後留低嘅禮物。
用彼岸花浸住嘅靈魂蛋。
當時喺重生會教育營拎返嚟，剩低嘅嗰一隻靈魂蛋，宋文德仲特登提醒我同阿政唔好交俾泉叔，依家拎返出嚟，感覺佢就好似命中注定咁，要我用喺依一次到。
既然唔可以潛入，就只有強闖。
我嘅方法係用攝拍機吊住靈魂蛋，將佢投放到西品家族嘅豪宅內。
只要時機一到，兔子人就會出現喺佢哋家族豪宅前。
我喺電單車上面，除低頭盔。
嫁電單車西品大宅外嘅一座山頭上，諗住用遙控器同手提電腦控制住航拍機飛入大宅內嘅範圍。
「機會得一次。」
如果一駕駛不慎，航拍機一失控就連靈魂蛋都失去。根據畫面，西品大宅無論入口、二樓、三樓、天台，都分別企住滿滿嘅西裝保鑣，同我預想嘅差唔多。駛入範圍之後，保鑣們果然留意到航拍機嘅存在，開始對上空指手劃腳，通知緊咩人咁。
全屋開始戒備，窗戶、門都落哂鐵閘，全員進入警戒狀態，唔知道一陣嚟嘅兔子人，會唔會有能力攻入去。
但就喺我出發之際，我見到......
泉叔。
佢著住一身灰色風衣，平日嘅鴨舌帽，走出屋外。
泉叔睇落唔似有受傷，或者被威脅嘅跡象......
點解？
呢個點解，或者我親自去問就明。
我撳低頭盔嘅鏡，就繼續駛去西品大宅附近。
沿路上，我感受到髮尾紅繩收緊，兔子人應該都喺附近。
到咗附近之後等多無耐，果見前方某個轉彎位到，有個巨大嘅背影正搖搖欲墜咁，行緊過去西品大宅嗰邊。
我唔敢發出多餘嘅聲音，因為眼前嘅係兔子人，佢準備去收集無彼岸花掩蓋氣味嘅靈魂蛋。
我吊住兔子人嘅尾，佢睇落係隻兩手空空嘅兔人？
正當我發出咁嘅疑問時，佢好似聽到我微碎嘅腳步聲，而緩緩咁轉身。我立即匿到一邊嘅垃圾桶後面，先注意到呢隻兔子人雖然無武器......
但佢有一副尖牙利嘴，如同怪物嘅口腔。
只要放任何嘢入去，佢口入面密集嘅牙齒都可以立即絞碎。
我更加聽到，越近西品大宅，佢嘅咬牙聲就越大，就好似危險嘅警號一樣。
「先生，除低你嘅戲服！」門外嘅保安，叫停兔人。
下一秒，就出現殘暴嘅一幕。
兔子人突然發出怪叫，張大咗嘴將向保安嘅臉頰，一陣肉絞嘅慘叫聲，保安成塊臉皮甩脫......
血肉模糊咁，攤喺地上。
繼而發生嘅事，唔需要多講。
兔子人用自己強大嘅力氣，不斷強敲鐵閘，正到鐵閘變形扭曲，破出一個缺口可以入去。
「咩...咩嚟......」一啲未見過兔人嘅保鑣，想要上前制服佢。
為咗搵到泉叔，我都喺入面發出陣陣嘅騷亂聲之後，跟隨兔子人打破嘅閘口入咗去。一入去，就見到兔子人正試圖拎西品大宅天台上面嘅靈魂蛋，但無路可行。
於是開始咗四處破壞。
「泉叔......泉叔......」我喺花園嘅眾身影之中，搵到灰衣嘅泉叔。
「沅彤？你點會喺到？」泉叔比我愕然。
「應該係我問你。」
我捏實佢手臂，唔想佢再亂走。
泉叔左右一望，將我拉到去西品大宅嘅車庫隔離匿埋。
「因為......我發現咗啲嘢。」
「咩嘢...」
「令我個仔......」泉叔就彷彿第一次講出，自己嘅往事：「變成靈魂蛋嘅人。」
「呢句係咩意思。」
「記唔記得......工廈見到嗰隻喺維生器皿沉睡嘅兔人。」泉叔嘅眼神，好深刻。
「記得，個陣就算好大火，你都呆咗咁望住，仲想打爆個玻璃器皿，要我拉你行你先肯走。」嗰陣，我以為泉叔只係出於對兔子人嘅惡意。
事實上，係另一個故事。
「依家搞到咁，我都無辦法查落去......」泉叔望下外面嘅情況，兔子人仍然喺西品大宅徘徊：「離開先。」
我同泉叔離開西品大宅，期間佢坐電單車後面，一路上講出自己一星期前加入西品集團嘅事。
因由，可以由二十幾年前講起。
嗰陣泉叔仲係全盛時期，幾乎春天嘅每一夜，都馬不停蹄咁喺香港各地獵兔，執行自己家族嘅天職，阻止更多人受害。
直到佢遇上一個女人，亦係佢嘅未來老婆。
因為佢，泉叔好快就萌生退休嘅念頭，想過返正常人嘅生活。
可惜係，需要金盆洗手嘅人，唔代表永遠同事件脫離關係。
幾年之後，泉叔生咗個仔，八歲大。
有足足八年無獵兔嘅佢喺某一夜，發生一件悲劇。
一隻著住貼身西裝嘅兔子人搵上門。
泉叔盡自己能力保護家人，但係佢嘅武器同工具都一早已經封藏，所以佢嘅妻兒不幸咁遭受遇害。
佢老婆當場被殺，而個仔就變成靈魂蛋，得返半條命嘅泉叔就抱住個仔嘅蛋，不斷逃走。
只此，佢重返獵兔嘅行業。
但係佢嘅目標，就變得單純只有一個。
就係嗰隻西裝兔子人，
復仇。
事過境遷，不知不覺就廿年過去。
佢遇上咗我哋，發生工廈嗰件事，呢段回憶、呢段瘡疤，彷彿再度被掀起。
一路聽嘅時候，我好理解泉叔點解要咁做。
因為復仇，正正係支撐住佢依二十年嘅人生。
支撐住佢就算失去咗人類嘅味覺，
食物變成嘔心嘅味道，
都要生存落去，繼續進食。
就算喺山到住，同人分離足足二十年，
感受過無數孤獨嘅日夜，
都要繼續生存落去，繼續忍受。
「呢個，先係你幫阿政嘅主因吧。」我說。
「佢同我好似......」泉叔講得淡然，但我知心仍然仲痛：「我唔想，佢成為另一個我。」
「咁點？我係咪搗破咗你計劃。」我笑一笑。
「無所謂......反正我就算入咗內部，都搵唔到嗰隻西裝兔人嘅一啲資訊，原本我諗住調查「西品製藥」將隻兔子人放喺邊，點知俾我問到某個老獵蛋人......佢話嗰隻係「非狩獵」對象。」
「咩意思？」我問。
「即係，西品集團內部唔容許佢旗下嘅「獵蛋人」組織，即係所謂嘅林中管理員，去對西裝兔人做任何行為。」泉叔說。
「咁點解佢哋會派你喺西品大宅軴守，仲有西品盛......係你殺？」我仲有好多疑問。
「因為我哋之前喺工廈燒咗個靈魂蛋存庫，令本應該就已經要老死嘅西品盛，無咗可以服用廷命嘅靈藥，佢急需大量獵蛋人日以繼夜採集返一定數量......因為春天仲有一、兩個星期就過，下個採蛋週期係四年後，如果存貨不足，意味西品盛將會老死。」泉叔說。
「即係話，你每日一天光就去獵蛋？獵完夜晚就即刻送返西品大宅，再等天光？」我嘅理解。
「成個採蛋部門得十幾條友，我哋可以話係西品盛要廷長性命嘅專業醫生，可惜......」
「可惜？」
一路狂駛到跨島，我先真正停車，停喺一間潮州打冷隔離。