《女朋友全家變咗隻蛋》: 01
自從嗰件事之後，
我對「蛋」患咗嚴重嘅抗拒症狀。
記得嗰晚係復活節，我搭緊小巴去女朋友屋企。成日好多人話我好幸福，因為我女朋友個樣好似西野七瀨，笑起嚟牙齒整齊又潔白。
我哋拍拖都有成三年，唯獨呢個月無見過佢，因為佢同家人去咗智利旅行，最近幾日先返嚟。奇怪嘅係，佢返嚟用手機覆我幾句後，就完全消失咗。
最後上線時間，永遠停留喺三日前嘅凌晨四點鐘。之後我無論點搵佢，佢都無應過我，我就決定親自上去搵佢。
見到開始熟識嘅街景，我就向司機喊咗聲：「翠林邨有落。」
小巴一停，我就默默行入去佢住嘅大廈，不過睇門嘅看更似乎唔喺到，我又唔知密碼而傻傻咁企咗喺門口一陣。
最後都係企喺隔離撳手機，等另一個真正住戶撳密碼先混水摸魚入到去。
行到門口，我本來都想如常咁撳門鐘，點不知，我見到佢屋企道大門未閂好......
露出咗一條小門縫。
「唔會呱...」嗰下我個心嘅第一個諗法。
幾日無覆機，然後屋企大門無鎖開住咗，好難令人唔諗到某啲恐怖的事情。特別係佢大廈走廊有些小陰沉，夜晚啲風一吹入走廊，多少都會發寒。
最後我都係吞一吞口水，慢慢推開門入去：「Chloe！？」順便叫一叫佢個名。
點知行入去第一步，就感受到自己踩到水面。
低頭一望，發現成個地下都係水跡......
再細心咁聽，可以聽到廁所嗰邊係開住水。
Chloe間屋係三房一廳，同細佬父母一齊住，但宜一刻成間屋塊地浸水咁，好難相信佢哋係喺間屋入面。
不過屋內亮住嘅白色燈管，又好似提示緊我，入面有人咁。
「Chloe？」我一邊行過去廁所，一邊叫佢個名。
唔係講笑，一個人入到間異常地靜嘅屋，真係會驚。
而且我仲隱約聽到，電視機開住嘅聲音。
就喺我差不多行到滲水嘅源頭廁所時，一個男人突然行出嚟同我迎面對住，嗰下嚇到我向後跌咗一跌，成條褲濕咗一半。
「唔好意思啊。」佢好主動咁扶起我。
對方係個頭髮灰白，同外父一樣六十幾歲左右嘅阿伯，而佢身上更加係著住套保安服裝。
「你係......樓下保安？」我定一定神。
「係啊...我收到住戶投訴呢到滲水？入嚟睇咗一睇，不過屋入面好似無人。」保安佢咳一咳：「啱啱入到廁所先見到花灑無停過，我已經閂咗個水籠頭......係嗱，你係屋主家人？」
「半個...家人。」我生硬咁答。
「明白明白。」保安點點頭，好正常咁行出間屋。
「呯」門都幫我閂好埋。
成間屋靜到，我都唔想再留喺到。
「外父外母？」我行入廳，得部開住咗嘅電視。
之後，我又慢慢扭開Chloe細佬間房道門。
佢細佬係個啱啱畢業嘅全職廢青，每日都匿間房打機、拍片咁，成日話要做實況主同youtuber，如果開門之後連佢都見唔到嘅話，就真係有啲大鑊。
「細佬！？唔好以為打飛機無人知呀！」我用力推開道門，做個「仲唔俾我發現」嘅表情。
無人。
我嘆一嘆氣，坐喺佢張床到：「佢哋去咗邊......」
「咔...嚓」一坐落床到，即刻傳出不明嘅聲音。
類似某樣嘢碎裂嘅聲，唔會坐爆咗佢啲嘢呱......
我慢慢咁掀開佢張被，發現原來坐碎咗隻蛋！黏黏嘅蛋汁一下子滲哂入張床到......
正當我下意識搵紙巾即刻抹返乾淨時，我呆咗一呆。
乜有蛋汁...
係鮮紅色嫁咩？
呢一刻，任何嘢都真係詭異到極點。
先係無鎖上嘅門、空無一人嘅屋、廁所不斷嘅流水，到宜家呢隻內膽係紅嘅雞蛋，我已經有足夠嘅理由勸自己離開呢間屋。
但亦有一個理由，令我要留喺到，就係我女朋友Chloe。
我唔知你哋明唔明嗰種感受係點，你就當係同新垣結衣去鬼屋，你會唔會忍心拋低佢一個喺入面？如果你答忍心嘅話，你係個唔值得擁有女朋友嘅人。
擦擦下張床單，我都無心機再擦，直接入Chloe房睇下佢喺唔喺到。結果一如我所料，又係一個人都無，不過部冷氣就似乎開咗好耐，令入面異常地凍。
正當我疑惑之際，我見到佢張電腦櫈上面......
放住隻蛋。
我慢慢拎起隻蛋上手，上面就好似復活蛋咁，蛋殼繪畫住人類臉孔，雖然畫風偏向得意，但我都不其然打咗個冷顫，因為隻蛋畫嘅樣子同特徵都同Chloe好似。
當一樣嘢畫到栩栩如生，人就會開始驚，但我好快就打消咗呢個不切實際嘅念頭。
同一時間，我行去原本一直滲水出嚟嘅廁所一望，發現浴缸上面浸滿咗水，並且有另一隻雞蛋浮喺水面。
同樣地，又係畫咗人類樣子嘅雞蛋，今次呢隻就似外父.......
戴黑眼鏡、鼻大大、留鬚。
到最後，我索性入埋佢父母間房，發現最後一隻蛋──外母。
隻蛋喺床上面。
除咗喺細佬間房坐爆嗰隻雞蛋，宜家我手上總共收集咗三隻「人臉蛋」，我用個碗裝起佢哋，然後坐喺廳張梳化上面，呆呆咁等。
我諗...
佢哋真係失蹤咗。
雖然我有個更詭異嘅諗法係.......
佢哋因為某啲原因，變咗隻蛋。
得出宜個結論係因為，佢哋所有人嘅手機都留哂喺屋企，正常人出街點會唔戴手機......
望住個鐘，我決定咗。
只要十二點前佢哋都未返嚟，我就真係當佢哋成家唔見咗，即刻報警。
「滴嗒...滴嗒......」屋企靜到秒針每擺一下都聽到。
不安嘅空氣就好似圍繞住我全身，我有啲僵硬咁坐喺梳化，一邊翻睇Chloe嘅相定驚。
「滴嗒」
十二點，不經不覺就搭正。
「好，報警。」
就喺我一面凜然咁撥打九九九之際，門聲響起咗。
「叮噹」
「終於返嚟.......」嗰陣，我真係有少少感動，覺得自己無白等。
但事後先發覺，
察覺唔尋常嗰陣仲唔第一時間走，係件極之危險嘅事。
我行去門口，臨要開門嗰下，突然細思極恐咗一下。
嚇到...
成個身顫哂，體會到毛骨悚然嘅感覺。
假設佢哋係成家一齊落街，係無可能會撳門鐘......
因為咁代表屋企，
根本就無人。
更何況夜晚出街點會唔自己帶鎖匙？
於是我慢慢咁靠近門孔，偷睇外面企喺到嘅，究竟係咩人。
無諗過，下一秒我係驚到要用手強行撳住自己個口，唔俾自己發出一丁點聲音。
外面企住一個，著住兔子戲服嘅人。
佢造工粗糙而真實嘅兔面具，令我忘記咗戲服入面嘅佢都係一個人類個身份。
「叮噹」
佢又再撳門鐘。
「叮噹叮噹叮噹叮噹叮噹叮噹」
我好想即刻搵張被匿入去。
我決定走去廚房，拎起把刀傍身然後報警。
十分鐘？
二十分鐘？
呢種戰慄嘅感覺令時間變得好慢。
當我再次細步行去門孔偷睇時，已經發覺乜都睇唔到......
睇唔到嘅意思唔係無人，而係門孔俾某樣嘢黏住咗，咩都睇唔到。
我今晚又俾一堆又一堆嘅不安抑壓住，到咗嗰下終於忍唔住爆發，直接拉開道門，拎住把刀望向外面走廊嘅左右兩邊。
嗰個兔人唔見咗。
而痴喺門孔上嘅，係類似香口膠嘅物體。
就喺我諗緊下一步要點做時，大廈走廊後樓梯又傳嚟不明嘅腳步聲，令我迅速退返入屋中。
我隔住門，默默咁聽住腳步聲越嚟越近。
「叩...叩...叩...叩...」
「呯！」
強力嘅砍門聲，又再將我脆弱嘅心靈嚇到，一下嚇到貼住牆。
「呯！呯！呯！」
屋企嘅大門正俾人用長斧瘋狂揮砍，唔洗幾分鐘近門柄嘅位置已經砍出一個缺口，對方似乎想伸隻手入嚟開門！
面對未知事物，我好自然咁匿咗入女朋友間房嘅衣櫃入面，總言之想遠離出面正發生嘅事情，終於......長斧砍嘢嘅聲音停止。
隨而代之，係扭開門柄嘅聲音。
「噠。」
恐怖嘅聲音停止，同時代表恐怖已經入侵。我可以聽到破門而入嘅人，佢先行入最近門口嘅房，即係我身處嘅地方。
係啱啱著住戲服嘅嗰個兔人，佢雙手拎住長斧，應該潔白嘅服裝就好似無洗好耐咁，染沾不少不明污垢、泥土同血跡......
佢一行入我女朋友間房，口中就默默唸緊某隻字。
「E...g...g...」佢連聲音都好怪，就好似沙啞嘅電音。
佢喺間房亂望一輪之後，就轉身步向客廳。
呢個時候，我大可直接跑出間屋，然後離開呢橦大廈，但我竟然決定要對付佢。
唔知點解...
我腦內就係有個諗法，唔可以俾佢拎到啲畫有我女朋友家人樣子嘅雞蛋。
兔人一見到客廳上放嘅雞蛋後，終於停唔再東張西望，而係默默咁凝視住碗中嘅三隻蛋。
我就趁呢個時候從後一刀刺入佢頸側！
「嘶！」佢發出類似動物撕叫嘅聲音，居然仲可以即時轉頭凝視住我。
兔人鮮紅嘅眼睛，完完全全咁盯實住我。
「死...唔去...？」我愣然。
佢身體抽搐咗幾秒之後，隻手慢慢拎返起長斧......
一早做好最壞打算嘅我，立即向走廊外嘅後樓梯逃走，又幾快跑幾快，完全唔回望後面。
我跑到G樓嗰陣，個腦都係不顧一切咁想都要離開呢橦建築物，令我完全無為意到地上嘅陷阱。
「咔！」清脆嘅一聲，我隻腳俾捕獸器夾中。
就喺G樓大門嘅位置，差一步就走到......
「救命呀！救命啊！！」我直頭忘記痛楚，不斷咁大叫求救：「救我呀！！！」
「喂，你踩落去做乜。」大廈外某個暗位，突然跑出一個約莫四十歲尾嘅阿叔。
佢戴住鴨舌帽、牛仔背心，拎住枝唔知係真槍定氣槍嘅物體過嚟，第一時間就係用小刀幫我解除陷阱。