陰霾密佈令人不寒而慄《慾望共胴體》18+: 第8章 - 字謎

由於兩個英文字於一瞬間消失無蹤，我一時間亦目瞪口呆，不知所措。
「Rachael，睇嚟係妳出院之後太攰，自己嚇自己！」爸爸說。
「咁樣不如.......聽晚之後媽咪喺度陪妳瞓好嗎？」媽媽以關心的口吻說。
雖然我對媽媽的記憶依舊未恢復，但我仍感激她的安排，便答應日後跟她同房。

兩日後的早上，我依然對夢境內的第二名受害者心感同情，始終綁匪一日未落網，一日仍可逍遙法外，如果第二名女子被他脅持逃亡的話，綁匪最終更可能會加害於她。這問題在我腦海內不斷地纏繞，我獨自想了很久，最終掏出女警給我的名片。
「請問Winnie Fu傅探員喺度嘛？」我在電話內問，號碼屬於美國長途電話。
「我係，請問妳係邊位？」傅探員答。
「我係潘瑋晴，妳嚮醫院探我個陣叫我諗起咩就打俾妳。」
「潘瑋晴......唔......我記得。我依家返咗美國，妳係咪記返起咩野？如果同案件有關都可以喺度同我傾。」


「我想知你哋有冇個綁匪嘅資料？尋晚我發夢先記返起佢個樣。」
「我哋喺物業登記度搵到個綁匪嘅資料，件案依家仲調查緊，如果捉到疑犯會安排妳過嚟認人。」
「我知道原來除咗我之外，個綁匪仲綁架咗另一個女仔，佢咁啱又係亞洲人。妳哋要快D救佢出嚟。」
「間屋嘅地下室發生火災時得妳一個人，警方搵過屋內其他地方都唔見有人。但請妳放心，我哋會由失蹤人口組搵出吻合個案，再調查一下。」

電話收線後，紀明致電找我，並且相約下午到我家小敘，我爽快地答應。
「點樣？住返自己屋企慣唔慣？」紀明帶了一些適合我的護膚品和日用品上來，期間剛好爸爸媽媽一起外出。
「我.........其實我哋之間嘅感情去到咩程度？」我突然將話題一轉。
「等我示範一下。」紀明突然趨前，雙手把我摟抱入懷，並且跟我接吻。當他嘗試伸手入我衣領時，我阻止了他。
「我明白。你可唔可以先俾時間我去適應？」


「明嘅，所以我專程同妳爹地請咗一個星期假，我哋一齊飛去紐約享受二人世界好嗎？我記得妳話過想去百老匯睇音樂劇。」
「好，但畢竟件案仲查緊，我擔心......」
「唔開心嘅野應該盡快忘記，妳剩係記得同我一齊好開心就得啦。」
「其實......」我將昨晚的靈異事件跟紀明如實相告。當我說到另一名亞洲女子以及SANTA MONICA的時候，他即時面色一沉。