[少甜][短文] 一日女朋友: 女生角度

每日都慣左同你send訊息，只要有一日冇傾就會成身唔舒服。
 
以為你唔覆我，結果你凌晨覆我。
 
你淨係覆我sticker，我就搏命諗話題。
 
每次聽到電話收到訊息，個腦第一個諗法係，係唔係你？
 
如果係你，我會扮高逗唔即刻覆你。
 




如果唔係你，我就心諗點解仲未覆我。
 
我地既話題唔可以話好多，但每日都可以傾唔停。
 
我地從來唔講曖昧既說話，最多只會讚下對方你型我靚。
 
就算有少少曖昧既說話，都只會輕輕咁帶過。
 
但都令我既心跳加速跳動。
 




就係咁，每日傾下傾下，我好似對你有少少心動……
 
可惜對你既心動唔可以講出黎，因為你身邊有佢……
 
但係係我病個陣你會關心我，你唔開心又想我氹下你。
 
你又會突然講套戲好似幾好睇，所以係邀請我一齊睇既意思？
 
然後有一日，你突然問我：
 




「可唔可以做一日我既女朋友？」
 
我呆左係到，你點會講哩句野架？
 
雖然只係一日，但係我已經好開心。
 
「唔要。」
 
因為一諗到你身邊有佢，我就卻左步……
 
「就一日，就當係我既生日禮物。」
 
連生日禮物都講得出，我有拒絕既理由咩？
 
其實係我自己私心想做，是但搵個藉口姐。




 
「我仲諗住妳唔會黎，妳點解會應承我既？」
 
「我只係當同朋友行下街。」
 
「但係今日妳唔係以朋友身分喎。」
 
「我知，但係唔一樣咩？」
 
我真係咁諗？
 
「點會一樣？哩個就不同啦。」你拖起我隻手。
 
「唔得。」
 




我口裡說不，身體卻很誠實，唔抽返自己隻手出黎。
 
「點解？唔係講好左一日女朋友咩？」
 
「但係你已經有女朋友，咁樣好似唔係咁好？」
 
我明明就好期待！
 
「今日，我單身。」咁既說話你都講得出口？
 
我碌大對眼望住你。
 
「行啦，去睇戲啦。」
 
哩套戲我地由準備上映到差唔多落畫都未去睇，今日終於有機會啦。




 
係戲院入邊，你一直拖住我隻手唔放，而且仲要十指緊扣個隻。
 
你要飲我飲過既汽水，要食我餵你既爆谷。
 
可能係因為燈光暗既問題，你隻手開始唔安分。
 
你慢慢鬆開你隻手，放係我膊頭到，再慢慢咁跣去我條腰到。
 
或者都係因為燈光暗既原因，我冇推開你，由得你隻手係我條腰到遊走。
 
電影完左之後，你係我耳邊細聲講左句：
 
「好唔好睇？真係唔想咁快睇完。」
 




「咁睇多次？」
 
「可以？」
 
「梗係唔可以，我餓啦。」
 
因為我驚睇多次，你隻手唔只係我條腰到咁簡單。
 
睇完電影，下一個節目梗係食晚飯。
 
成餐飯你除左咬野，就一直傻笑咁望住我，睇到我都有啲怕醜。
 
吃完飯，你提議去海邊散下步。
 
你係突登搵一間近海邊既餐廳既係唔係？
 
係海邊，你都係一直十指緊扣咁拖住我。
 
海邊既風吹係我地身上，搞到我條裙都吹起左少少。
 
「凍唔凍？」你溫柔咁問。
 
「有啲。」
 
「咁樣有冇好啲？」你就順手咁攬住我條腰。
 
哩個動作令到我地更貼近，我既心都跳得越黎越快。
 
坐係張櫈到休息個陣，我將我個頭輕輕挨落你膊頭到。
 
「妳今日開唔開心？」
 
「哩個問題應該問你，今日係你生日。」
 
「好開心，多謝妳。」你一手將我攬實。
 
大概攬左一兩分鐘，我個腦突然閃過一樣野。
 
你係一個有女朋友既人……
 
「Er……我真係有啲凍，我地返去好唔好？」
 
「好啦，我送妳返去。」
 
你好自然咁再次拖起我隻手。
 
你送我返到屋企樓下，你突然講：
 
「我可唔可以要生日禮物？」
 
「你唔係話今日就係你既生日禮物咩？」
 
「我貪心，想要多一份。」
 
「係咩？」
 
你慢慢將你個嘴哄埋黎，我將你推開。
 
你好驚訝咁望住我：
 
「點解？」
 
「我唔要。」
 
因為你唔係我男朋友，我跨唔出哩一步……
 
「宜家仲未到12點，所以妳仲係我女朋友。」
 
「我就係唔要。」妳再次拒絕我。
 
「咁妳陪我坐多陣。」
 
今次我冇答你，直接拖起你隻手向公園方向行過去。
 
「除左個份禮物，你仲想要咩？」
 
「哩個。」你用力咁攬住我。
 
「生日快樂。」我係你耳邊講。
 
到左12點，我地離開公園，各自返去自己既屋企。
 
宜家唔再係你生日，我亦都唔再係你一日女朋友……
 
「點解你會想我做你既一日女朋友？」
 
我係電話到打左哩個問題，看到你都輸入中，即刻將每個字逐一delete。
 
你一直輸入中，請問你係咪寫緊文？
 
我擺低電話，拎住衫去沖涼。
 
「叮。」收到訊息。
 
「屌！」我睇個訊息後第一個反應。
 
我將想同你講既說話慢慢咁輸入中。
 
「恭喜你。」
 
原來對你黎講，我只係你某日既一日女朋友。
 
哼，冇錯，佢同我講「我要結婚啦。」