[奇幻］回憶博物館: (13)

兩人平常卻頗為甜蜜的日常一直持續到十二月的聖誕，他們的朋友們大多都回了香港，剛巧他們兩人都留下來便「相依為命」。

因為聽聞鄰近城市Manchester的聖誕市集很漂亮，兩人便決定平安夜當天去。在火車上施巧寧都在按捺自己興奮的心情，她現在感覺自己好像跟凌子沐去旅行一樣。

「等陣想去邊先？」凌子沐用手機上網搜索着有甚麼好玩的地方。施巧寧聳聳肩笑道：

「去邊到都得啊。」

「你今日做咩心情咁好？」





「就嚟聖誕啦嘛，你唔會好興奮咩？」

「係英國都唔會有聖誕老人，又唔會有禮物，興咩奮？」

「你地男仔係真係一啲都唔浪漫㗎喎。」

「關浪漫咩事？」

「聖誕節嘅氣氛浪漫囉。」





「你嚟多幾年英國就會明，歐洲嘅聖誕節就好似末日咁，條街咩都唔開。連人都冇，浪咩漫。」

「同你講都晒氣！」施巧寧瞪了凌子沐一眼，心裡暗罵凌子沐是塊木頭。

「喂唔好上咁耐網，等陣我手機冇電。」

「知啦。」因為施巧寧的電話plan只有很少上網數據所以經常問凌子沐借熱點上網。凌子沐雖然經常抱怨耗電量大但還是開了熱點給她。

每一次當施巧寧看見自己的電話connected 了凌子沐的Wifi就覺得有一種莫名的親密。就好像兩人真的有一種無形的連接一樣。而且只要用過他的熱點，往後只要走近就會自動connect，感覺就好像能自己感應凌子沐在哪一樣。





她總玩笑着，如果有一天她走失了便能靠熱點尋回凌子沐。