《我哋已經到達終點站⋯⋯》: 第九章

星期日繼續唔返工，放心唔關飲酒事，只係我懶啫。

又到星期一，我瞓到下晝，之後換衫返工，而今日都係落第一城。

之後收到ig direct。

「Hi。」

「我喺上次嗰個男仔呀。」





咪住先，啲開場白喺邊度聽過呢？

「搵我有事？」

「介唔介意講下你今日返咩線？」

「88R。」

「Thx。」





今日揸5頭豪做88R，實不相瞞，架車飛觀繞同東廊嗰陣係幾爽㗎喎，爽過6頭豪喎，點解咁講？因為我一出東隧爬咗架行606嘅6頭豪。

做咗幾轉之後，有一單5點幾出到中環碼頭，收到Rachel Whatsapp。

「喂。」（17:45）

「做乜？」（17:45）

「今日係咪揸88R呢？」（17:46）





「係呀，你細佬同你講？」（17:46）

「唔好理啦，你依家喺邊？」（17:46）

「中環。」（17:47）

「車牌呢？」（17:48）

「HD XXXX」（17:48）

「Ok」（17:49）

講講下，原來夠鐘開車。

我扭入金鐘開門上客，啲人好有秩序咁排隊上車。





嘟～

「Hi。」

我擰頭望一望，果然係Rachel。

「係咪好surprise呢？」佢坐咗喺最近司機嗰個位。

「係呀，係呀。」

「搞錯呀，咁樣敷衍人㗎。」

「揸車呀，一陣先講啦。」





咁喺港島上咗半車人，放工時間，不論係紅隧、公主道同窩打老道，定係獅隧，甚至返到沙田，喺獅隧公路，都係塞到懷疑人生嘅。

結果返到第一城，差唔多七點。

「喂。」

「做乜？」

「你幾點要再開車？」

「我依家收工啦。」

「咁啱曬啦。」

「做乜？」





「陪我食飯呀，一個人食好悶㗎。」

「是但啦。」

「咁行啦。」

我哋行咗入去大家樂，我食叉燒飯，佢食粟米肉粒飯。

「搞錯呀，頭先喺度敷衍我。」

「我幾時敷衍你？」

「我問你係咪好surprise，你求其答嘅。」





「揸車嘛。」

「好，我比你再答一次，係咪好surprise呢？」

喂，你問曬路線同車牌喎，係人都知你等緊我車啦。

咁我當然唔會講我心諗嗰句啦，自殺咩。

「係呀，點估到你喺度等緊車。」

「咁就差唔多，不過都係要罰你。」佢喺我碗度夾走一舊叉燒。

「咁都得？」

「有無上訴？」

「無⋯⋯」

我生存喺度咁多年，學識咗盡量唔好同女人爭論，否則最後只會變成無結果嘅爭執。

～～～～～～～～～～～～～～～～～～～～～～～～～～～

各位睇文之餘，記得要留意個社會發生緊嘅事呀。

我喺度就唔多講啦。

兄弟爬山，各自努力。

各位要加油呀。

睇到哩度，唔啱聽，唔啱睇嘅就無謂睇落去啦。

多謝各位支持。