二零五零年 – 我女神係暴徒: 第三十六章

「咔嚓」…老豆由佢間房行番出黎之後…隻手多左支又長又粗既伸縮警棍…即係佢果支「振中棒」。老豆一步一步咁行埋我度…我背脊開始感覺到一陣陣既涼氣…唔通就係殺氣?!
 
「我比你揀多次! 你寧願做曱甴丫嘛? 係唔係呀!! 你做曱甴既話咁岩晒啦! 我專打曱甴既! 我就係呢度打死你個衰仔! 我最多當自己生少個啦!」 老豆一步一步行埋黎, 我就一步一步退向後…
 
老豆係咪嬲到傻L左, 佢本身剩係得我一粒仔, 又點樣當生少個呀? 我一直向後退…退下退下…咦?! 頂! 隻腳已經退到撞到梳化…退無可退! 間屋明明千幾尺, 點解退幾步就無位退嫁?! 今次瀨野了。
 
「老豆你保持克制啦! 咁嬲好易中風嫁! 有乜野唔岩咪坐低傾下囉! 最多你放低振中棒, 我地揸揸手當無數啦…!」老豆一路行一路揮動佢支振中棒…
 
「打死你個死仔包…做曱甴丫嗱…做曱甴丫嗱…做曱甴丫嗱…」老豆好似聽唔到我講野咁…一直係度自言自語, 佢而家個樣…除左肚腩大左不少之外, 十足十之前睇影片裡面果堆Green Object…
 


老豆又好似玩太極劍咁係咁舞支棍…唔通咁樣會有型D?! 突然間…「啪!」…振中棒係老豆博大精深既棍術舞動中跌左落地。空氣突然間好似靜止左咁…我耳邊再聽唔到電視傳黎既魚生廣告聲音…
 
老豆隻手仍然好似「手中無棍, 心中有棍」一樣繼續做緊揮棍既動作…但老豆隻眼…一直呆左咁望住地上面果支振中棒。而我…雙眼不斷穿梭於地上面支振中棒同老豆舞動空氣既雙手…最後…我同老豆雙目交投, 大家都係一個錯愕既表情。
 
突然間腦裡面「叮」一聲! 似乎活命既機會黎啦! 我將身體向前傾, 然後撲向地上面既振中棒。老豆好似都意會到機不可失, 佢都同時撲向振中棒, 兩股巨大既力量…似乎將要係振中棒上空相撞。
 
我望住自己隻手同振中棒既距離由2尺…1尺…半尺…一直縮短, 點解阿媽唔生我隻手生長多少少呀? 然後…我感覺到我既膊頭同老豆既脂肪肚腩攬炒埋一齊, 而我…因為同性相距既定律…比老豆撞開左。
 
「想搶我支警棍!!」老豆急忙執起左振中棒…企番起身然後舉住支棒指住我塊面。比碌野指住塊面…我自然反應伸出右手想撥走支棍, 但最後都係撥左空氣…老豆見我用手伸向支棍, 佢就縮開左…「唔夠我快而家都重想搶警棍!!」
 


撥完空氣之後, 心入面湧出逃生既衝動, 想轉身向住大門方向逃走…但都未跑到兩步…「啵!」突然間個人無力再跑…眼前天旋地轉…雙腳發軟蹄, 我跪左係地下…剎那間思想變得好模糊。
 
「阿…熊…阿…熊…喂…你…點…呀…? 喂…」模模糊糊之間聽到老豆把聲…但唔多知道佢係度講緊乜。
 
我感覺個頭後尾枕濕濕地。